Lucas 18:1-43
-
Xliʼakxilhtit puskat tiku xninita xchixku chu chuntiya kskima (1-8)
-
Fariseo chu xmatajina lilakgaxokgon (9-14)
-
Jesús chu laktsu kamanan (15-17)
-
Xtakgalhskinin mapakgsina tiku lhuwa tumin xkgalhi (18-30)
-
Jesús lichuwinampara pi namakgnikan (31-34)
-
Chatum lakgaxokgo tiku skiwayana lakawanampara (35-43)
18 Alistalh kalitachuwinalh akgtum liʼakxilhtit xlakata lu xlakaskinka xwanit xtlawakgolh xʼoracioneskan putum kilhtamaku chu ni xlimakgxtakgkgolh,
2 kawanilh: «Kʼakgtum lanka kachikin xwi chatum juez tiku ni xpekuani Dios, chu ni xkamaxki kakni lakchixkuwin.
3 Na xlama kʼama kachikin chatum puskat tiku xninita xchixku, chu chuntiya xlakgmin chu xwani: “Kaʼakxilhti pi kakintlawanika tuku xaʼakgstitum akxni naktalakkaxla kintalatlawana niku lakkaxtlawakan taʼakglhuwit”.
4 Titaxtulh kilhtamaku xla ni makgtayaputulh, pero alistalh lakpuwa: “Maski ni kpekuani Dios, nipara kkamaxki kakni lakchixkuwin,
5 xlakata uma puskat chuntiya kimakglhuwima, nakakxilha pi katlawanika tuku xaʼakgstitum, xlakata nialh namin kilimakglhuwi chu nialhla naktayani”».
6 Wa xlakata Malana wa: «¡Kakgaxpattit tuku wa juez, maski ni xaʼakgstitum xwanit!
7 Xlikana, ¿pi ni katitlawalh Dios tuku xaʼakgstitum xpalakata tiku kalaksaknit, tiku tasaskinikgo tantaku chu tantaskaka? Dios chuna natlawa maski tasiya pi makgapalama, xlakata xla xakgalhkgalhina.
8 Kkawaniyan pi xla tunkun nakatlawani tuku xaʼakgstitum. Pero akxni xKgawasa chixku nachin, ¿xlikana natekgsa uma takanajla* kkatiyatni?».
9 Jesús na kawanilh uma liʼakxilhtit makgapitsi tiku akstu xkalipawankan chu xlakpuwankgo pi xaʼakgstitum xwankgonit, chu nitu xkaliʼakxilhkgo amakgapitsin:
10 «Chatiy lakchixkuwin ankgolh tlawakgo oración ktemplo, chatum fariseo chu achatum xmatajina lilakgaxokgon.
11 Fariseo tayalh chu xwan kxʼoración: “Dios, kpaxtikatsiniyan xlakata akit ni xtachuna la putum amakgapitsin tiku kgalhanankgo, tiku ni xaʼakgstitum, akgskgawikgo tiku tamakgaxtokgkgo chu nipara chuna la uma xmatajina lilakgaxokgon.
12 Akgatunu semana makgtiy kkgalhxtakgnan; kmasta diezmo xlakata putum tuku kkgalhi”.
13 Pero xmatajina lilakgaxokgon, lakgamakgat xya, nipara xtalakayawaputun kʼakgapun wata xkuxmukgaxikan chu xwan: “Dios lu kakilakgalhamanti xlakata akit makglakgalhina”.
14 Kkawaniyan pi uma chixku tlakg xaʼakgstitum litaxtulh akxni alh kxchik nixawa ama fariseo. Xlakata putum tiku lanka namakgkatsikan namaktujukan, pero tiku nataktuju namalankikan».
15 Alistalh latamanin na tsukukgolh kaliminikgo laktsu xkamanankan xlakata xwililh xmakan kxʼakgxakgakan, akxni akxilhkgolh uma, xtamakgalhtawakgen kakilhnikgolh.
16 Pero Jesús katasanilh laktsu kamanan chu wa: «Kakamaxkitit talakaskin laktsu kamanan kakilakgminkgolh, ni kakamachokgotit, xlakata xTamapakgsin Dios nakalakgchan tiku likatsikgo chuna la umakgolh laktsu kamanan.
17 Xlikana kkawaniyan, pi komo wi tiku ni namakgamakglhtinan xTamapakgsin Dios xtachuna la laktsu kamanan, nikxni katitanulh».
18 Chu chatum mapakgsina kgalhskilh, chu wa: «Makgalhtawakgena tiku tlan likatsi, ¿tuku kilitlawat xlakata tlan nakmakglhtinan latamat nema ni kgalhi xlisputni?».
19 Jesús kgalhtilh: «¿Tuku xlakata kilimapakuwiya Makgalhtawakgena tiku tlan likatsi? Ni anan tiku tlan likatsi, kajwatiya Dios tlan likatsi.
20 Kalakgapasa limapakgsin: “Ni militatalakgxtumit tiku ni wa tamakgaxtokga, ni milimakgninat, ni milikgalhanat, ni miliwanat tuku ni xlikana, milimaxkit kakni mintlat chu mintse”».*
21 Wa xlakata xla kgalhtinalh: «Putum umakgolh kmakgantaxtinit lata kiliʼaktsujku».
22 Akxni kgaxmatli uma, Jesús wanilh: «Wi pulaktum tuku tsankganiman: kastat putum tuku kgalhiya chu kakamaxki xatumin limaxkgenin,* chu nakgalhiya tuku lhuwa xtapalh kʼakgapun; chu katat, kakistalani».
23 Akxni kgaxmatli uma, xla lu lipuwa, xlakata lhuwa tuku xkgalhi.
24 Jesús lakaʼakxilhli chu wanilh: «¡Lu tuwa nakakitaxtuni tiku kgalhikgo lhuwa tumin natanukgo kxTamapakgsin Dios!
25 Tlakg ni tuwa nawan pi tantum camello natanu kxʼakgxakga litsapan,* nixawa tiku kgalhi lhuwa tumin natanu kxTamapakgsin Dios».
26 Tiku kgaxmatkgolh uma, wankgolh: «¿Tiku xlikana tlan nalakgtaxtu?».
27 Xla wa: «Tuku latamanin nila makgantaxtikgo, Dios tlan makgantaxti».
28 Pero Pedro wa: «¡Kaʼakxilhti! Akinin putum kmakgxtakgnitaw tuku xakkgalhiyaw chu kkastalaninitan».
29 Xla kawanilh: «Xlikana kkawaniyan pi ni anan tiku makgxtakgnit chiki, o xpuskat* o xnatalan* lakgkgawasan, o xnatlatni, o xkamanan kaj xpalakata xTamapakgsin Dios,
30 komo ni tlakg lhuwa tuku namakglhtinan kʼuma kakilhtamaku chu kkakilhtamaku nema aku mima* latamat nema ni kgalhi xlisputni».
31 Alistalh kajwatiya kataʼalh kgalhkutiy apóstoles chu kawanilh: «¡Kaʼakxilhtit! Amaw kJerusalén chu nakgantaxtu putum tuku palakachuwinanin xtsokgkgonit xpalakata xKgawasa chixku.
32 Akgtum liʼakxilhtit, namakamastakan kxmakankan lakchixkuwin xalak atanu kachikinin chu umakgolh nalikgalhkgamanankgo chu lixkajni nalikatsinikgo chu nalakachujmanikgo.
33 Chu akxni makgsnokgkgonita nawan, namakgnikgo, pero namalakastakwanikan xliʼakgtutu kilhtamaku».
34 Pero apóstoles ni akgatekgskgolh putum uma, xlakata kamatsekgnika tuku xkilhchanima tachuwin.
35 Pero akxni Jesús xtanumacha kJericó, chatum lakgaxokgo tiku kskiwayama, xwi kxkilhpan tiji.
36 Akxni kgaxmatli pi xtitaxtumakgolh lhuwa latamanin, tsukulh kgalhskininan tuku xlama.
37 Wanika: «¡Jesús xalak Nazaret titaxtuma!».
38 Wa xlakata pixlanka* wa: «¡Jesús, xKgawasa David, kakilakgalhamanti!».
39 Tiku xpulatilhakgo tsukukgolh kilhnikgo, wanikgolh pi xtakgalhtsekgli, pero xla tlakg pixlanka xwan: «¡Kakilakgalhamanti, xKgawasa David!».
40 Wa xlakata Jesús tachokgolh chu wa pi xliminika chixku asta kxlakatin. Akxni xtalakatsuwinita, Jesús kgalhskilh:
41 «¿Tuku lakaskina naktlawa mimpalakata?». Xla wa: «Malana, katlawa pi naklakawanampara».
42 Wa xlakata Jesús wanilh: «Tlan kalakawanampara; mintakanajla mapaksanitan».
43 Chu tunkun tlan lakawanampa, chu tsukulh stalani, xmalankitilha Dios. Nachuna, akxni akxilhkgolh uma, putum kachikinin tsukukgolh maxkikgo kakni Dios.
Notas
^ O: «la uma takanajla».
^ Alakatanu wankan «mintata chu minana».
^ O: «tiku nitu kgalhikgo».
^ Alakatanu wankan «lixtokgon».
^ Alakatanu wankan «xchat».
^ Alakatanu wankan «xnatakamanan».
^ Kaʼakxilhti glosario.
^ Alakatanu wankan «akglhman».
