Lucas 19:1-48
19 Alistalh xla tanulh kJericó, chu xtipuntaxtuma.
2 Ama kilhtamaku, anta xwi chatum chixku tiku xwanikan Zaqueo; na xlitaxtu chatum xapuxku xmatajina lilakgaxokgon, chu xkgalhi lhuwa tumin.
3 Chu xʼakxilhputun tiku xwanit uma Jesús, pero nila xlakglakachan xlakata lhuwa xtsamakan chu xla aktsu chixku xwanit.
4 Wa xlakata tokgosun* kapulanilh chu xlakata naʼakxilha tawakalh kxakiwi higo, xlakata Jesús anta xʼama titaxtu.
5 Akxni Jesús chalh anta, talakayawalh chu wanilh: «Zaqueo, lakapala katakta, xlakata uku kilitamakgxtakgat kminchik».
6 Wa xlakata, xla lakapala taktalh chu xatapaxuwan makgamakglhtinalh kxchik.
7 Akxni akxilhkgolh uma, xputumkan nitlan tsukukgolh lichuwinankgo: «Tamakgxtakgli kxchik chatum makglakgalhina chixku».
8 Pero Zaqueo tayalh chu wanilh Malana: «¡Kaʼakxilhti! Lata putum tuku kkgalhi, Malana, itat nakkamaxki lakglimaxkgenin* chu putum tuku kkaʼakgskgawimakglhtilh* latamanin, makgtati nakkalakgxokgoni».
9 Wa xlakata, Jesús wa: «Uma kilhtamaku Dios lakgmaxtunit uma chixku chu xfamilia, xlakata na xkgawasa Abrahán litaxtu.
10 Xlakata xKgawasa chixku milh putsa chu milh lakgmaxtu tuku xtsankganit».
11 Akxni xlakan xkgaxmatmakgolh uma, lichuwinampa atanu liʼakxilhtit, xlakata Jerusalén lakatsu xwi chu xlakan xlakpuwankgo pi xTamapakgsin Dios lakapala xʼama min.
12 Wa xlakata wa: «Chatum xkgawasa mapakgsina alh kʼakgtum makgat kachikin xlakata namakglhtinan limapakgsin chu alistalh xʼama taspita.
13 Xla katasanilh kgalhkaw xlakskujnin, kamaxkilh lhuwa tumin* chu kawanilh: “Kaliskujtit uma tumin asta akxni nakmin”.
14 Pero xlitachiki ni xʼakxilhputunkgo, chu malakgachakgolh makatsininanin anta niku alh xkgawasa mapakgsina xlakata nawankgo: “Ni klakaskinaw pi uma chixku kimapakgsinakan nawan”.
15 »Titaxtulh kilhtamaku, xla taspitli akxni mapakgsina xlitaxtuya chu kamatasaninalh xlakskujnin tiku xkamaxkinit tumin,* xlakata nakatsi tuku xlitlajakgonit xtaskujutkan.
16 Wa xlakata xapulana talakatsuwilh chu wa: “Malana, mintumin makgkaw talhuwilh”.
17 Xla wanilh: “¡Lu tlan tlawa, xatlan skujni! Xlakata limasiya pi tlan lipawankana maski kaj tuku ni lhuwa, kakamapakgsi akgkaw kachikinin”.
18 Alistalh milh xlichatiy chu wa: “Malana, mintumin makgkitsis talhuwilh”.
19 Chu uma na wanilh: “Nachuna wix, kakamapakgsi akgkitsis kachikinin”.
20 Pero milh achatum, chu wanilh: “Malana, uwi mintumin nema xaklimakgchinit lhakgat chu xakmatsekgnit.
21 Kaʼakxilhti, akit kpekuaniyan, xlakata wix chixku tiku lhuwa tuku skin; maxtuya tumin niku ni makgmakinanita chu makiya tamakgalan niku ni chanananita”.
22 Xla wanilh: “Wa tuku wanti naklimalakgaxokgeyan, xalixkajni skujni. ¿Xkatsiyata pi akit lhuwa tuku kskin, pi ktiya tumin niku ni kmakgmakinit chu kmaki tamakgalan niku ni kchanananit?
23 Komo chuna, ¿tuku xlakata ni wili kintumin* kbanco? Akxni xakmilh, xaktitamakglhtinalh xaskgata”.
24 »Wa xlakata, kawanilh tiku anta xyakgolh: “Kamakglhtitit tumin chu kamaxkitit tiku makgkaw malhuwilh tumin”.
25 Pero xlakan kgalhtikgolh: “¡Malana, xla makgkaw malhuwinita tumin!”.
26 Xla kakgalhtilh: “Akit kkawaniyan putum tiku kgalhi, tlakg namaxkikan, pero tiku nitu kgalhi, asta tuku kgalhi namakglhtikan.
27 Nachuna, unu kakalitantit kintalatlawananin tiku ni xlakaskinkgo pi xmapakgsinakan xaklitaxtulh, chu kakamakgnitit kkilakatin”».
28 Akxni xwankgonit uma, tsukupa tlawan xlakata xʼama kJerusalén.
29 Chu akxni talakatsuwilh kBetfagué chu kBetania, ksipi nema wanikan sipi xla Olivos, kamalakgachalh chatiy xtamakgalhtawakgen,
30 chu wa: «Kapitit kʼaktsu kachikin nema tasiyayacha, chu akxni natanuyatit, natekgsatit anta chiyawakanit tantum xaskgata burro nema asta uku ni chatum chixku kgetawilanit. Kaxkuttit chu unu kakilitanitit.
31 Chu komo wi tiku nakakgalhskinan “¿Tuku xlakata xkutpatit?”, nawaniyatit “Malana maklakaskima”».
32 Wa xlakata tiku kamalakgachaka ankgolh chu tekgskgolh chuna la xkawaninit.
33 Pero akxni kxkutmakgolh xaskgata burro, tiku xtapakgsinikgo kawanikgolh: «¿Tuku xlakata xkutpatit xaskgata burro?».
34 Xlakan kgalhtinankgolh: «Malana maklakaskima».
35 Chu linikgolh Jesús, likgetlapakgolh klhakgatkan xaskgata burro chu Jesús kgetawilalh.
36 Lata xtalakatsuwitilhama, xlakan xlikatlapanitilhakgo klhakgatkan ktiji.
37 Akxni talakatsuwilh ktiji nema taktayacha ksipi xla Olivos, putum tiku kstalaninanin tsukukgolh lipaxuwakgo chu pixlanka* xmalankimakgolh Dios xlakata putum tuku xʼakxilhkgonit nema kaks malakawaninan,
38 chu xwankgo: «¡Tasikulunatlawanit tiku mima la* Mapakgsina kxtukuwani Jehová! ¡Dios chu lakchixkuwin kakgalhikgolh takaksni, chu kamalankiw Dios tiku wi kkatalhman!».
39 Pero makgapitsi fariseos tiku na anta xkatayakgolh lhuwa latamanin wanikgolh: «Makgalhtawakgena, kakakilhni mintamakgalhtawakgen».
40 Pero xla kakgalhtilh: «Kkawaniyan pi komo umakgolh xtakgalhtsekgkgolh, chiwix pixlanka xchuwinankgolh».
41 Chu akxni xtalakatsuwimaja, akxilhli kachikin chu lakgtasalh,
42 Xla wa: «Xaklakaskin pi xtiʼakgatekgsti* tuku xʼama maxkiyan takaksni, pero uku matsekgnikanita.
43 Xlakata namin kilhtamaku akxni mintalamakgasitsin nalimakgstiliwilikgoyan laklanka lakkankasajajan* kiwi chu namakgapatikgoyan.
44 Nalikatalakana katutsu, wix chu minkamanan kxpulakni mimpatsaps, chu ni katimakgxtakgnika akgtum xatalakgtsapsni chiwix nema ni katilaktilhwilika, xlakata ni akgatekgsti kilhtamaku akxni xlakputsananipaka».
45 Alistalh tanulh ktemplo chu tsukulh katamakxtu tiku kstanamakgolh,
46 kawanilh: «Tatsokgnit “Kinchik nalimapakuwikan chiki xla oración”, pero wixin xputatsekgnikan kgalhananin limaxtupatit».
47 Chuntiya chali chali xmasiyama ktemplo. Pero xanapuxkun sacerdotes chu lakgtsokgkinanin chu tiku tlakg xlakaskinka xlitaxtukgo kkachikin xputsamakgolh chuna la namakgnikgo;
48 pero ni xtekgskgo la* namakgnikgo, xlakata putum kachikin xlitamakxtumikgo chu kaks xlilakawankgo tuku xkgaxmatkgo.
Notas
^ Alakatanu wankan «tatsalh».
^ O: «tiku nitu kgalhikgo».
^ O: «kkamakglhtilh tuku xkgalhikgo xlakata kkalimawakalh tuku ni xlikana».
^ Xagriego: «akgkaw minas». Akgtum mina griego xtsinkan 340 gramos chu xlakpuwankan pi xtapalh xwanit 100 dracmas. Kaʼakxilhti glosario.
^ Xagriego: «plata».
^ Xagriego: «kimplata».
^ Alakatanu wankan «akglhman».
^ Alakatanu wankan «chi».
^ Alakatanu wankan «xtimakgachakgxi».
^ Alakatanu wankan «kankasapujwa o kankatsamanka».
^ Alakatanu wankan «chi».
