Lucas 6:1-49
-
Jesús, «xMalana Sábado» (1-5)
-
Mapaksakan chixku tiku kskaknit xmakan (6-11)
-
Kgalhkutiy apóstoles (12-16)
-
Jesús masiya chu mapaksanan (17-19)
-
Tapaxuwan chu tuku nitlan (20-26)
-
Kapaxkikan talamakgasitsin (27-36)
-
Nialh lalakputsananikan (37-42)
-
Tuku tlawakgo kalilakgapaskan (43-45)
-
Chiki nema liwana matijukanit; chiki nema ni matijukanit (46-49)
6 Ama kilhtamaku akxni Sábado xwanit, xla xtitaxtuma niku xchankanit trigo, chu xtamakgalhtawakgen kxlitaktikgo* chu xlilakgxapakgo xmakankan chu xwakgo xatawakat.
2 Wa xlakata, makgapitsi fariseos wankgolh: «¿Tuku xlakata wixin tlawayatit tuku ni xlitatlawat Sábado?».
3 Pero Jesús kakgalhtilh: «¿Ni likgalhtawakganitantit tuku tlawalh David chu lakchixkuwin tiku xkataʼan akxni xtsinksmakgolh?
4 Xla tanulh kxchik Dios chu makglhtinalh kaxtalanchu xla tamakamastan* chu katawakgolh tiku akxtum xkataʼan, xlakan ni xliwatkan xwanit uma kaxtalanchu nema kaj sacerdotes xkalakgchan nawakgo».
5 Wa xlakata kawanilh: «Wa xKgawasa chixku xMalana Sábado».
6 Atanu Sábado tanulh ksinagoga* chu tsukulh masiya. Chu anta xwi chatum chixku tiku kskaknit* xmakan kxpakgastakat.*
7 Wa xlakata lakgtsokgkinanin chu fariseos liwana xʼakxilhmakgolh komo xʼama mapaksa chixku kSábado, xlakata chuna naliyawakgo tuku nitlan.
8 Pero xla xkatsi tuku xlakpuwamakgolh, wa xlakata wanilh chixku tiku kskaknit* xmakan: «Katat chu kataya unu kxitat». Xla milh chu anta tayalh.
9 Wa xlakata Jesús kawanilh: «Kkakgalhskinan: ¿Xlilat natlawakan kSábado tuku tlan o tuku nitlan? ¿Nalakgmaxtukan akgtum latamat o namalakgsputukan?».
10 Akxni xkalakaʼakxilhnita xputumkan, Jesús wanilh chixku: «Kastonkgti mimakan». Xla stonkgli, chu xmakan paksli.
11 Pero xlakan lu sitsikgolh, chu tsukukgolh lalitachuwinankgo xchatunukan tuku xtlawanikgolh Jesús.
12 Akgtum kilhtamaku, Jesús alh kʼakgtum sipi xlakata anta alh tlawa xʼoración, chu tantaskaka tlawanilh oración Dios.
13 Chu akxni xkgakgalh katasanilh xtamakgalhtawakgen chu kalaksakxtulh kgalhkutiy chu umakgolh na kalimapakuwilh apóstoles:
14 Simón, tiku na limapakuwilh Pedro, chu Andrés xtala,* Santiago, Juan, Felipe, Bartolomé,
15 Mateo, Tomás, Santiago xkgawasa Alfeo, Simón tiku xlimapakuwikan «tiku putum tuku tlawa, xatapaxuwan tlawa»,
16 Judas xkgawasa Santiago, chu Judas Iscariote, tiku alistalh stawana litaxtulh.
17 Alistalh katataktalh, chu anta tayalh niku kaxtum, chu lhuwa xtamakgalhtawakgen anta xyakgolh, chu lhuwa latamanin xalak putum Judea chu Jerusalén chu kxkilhtun pupunu xalak Tiro chu Sidón, tiku minkgolh kgaxmatnikgo chu xlakata xkamapaksaka xtajatatkan.
18 Asta tiku xkamakgapatima xalaklixkajni espíritus xtatlanikgo.
19 Chu putum latamanin kxamaputunkgo, xlakata xlitliwakga nema xtaxtu putum xkamapaksa.
20 Xla kalakaʼakxilhli xtamakgalhtawakgen chu tsukulh wan:
«Paxuwayatit wixin tiku limaxkgenin,* xlakata wixin katapakgsiniyan xTamapakgsin Dios.
21 »Paxuwayatit wixin tiku uku tsinkspatit, xlakata nakamakgalhkgasakanatit.
»Paxuwayatit wixin tiku uku tasapatit, xlakata alistalh nalitsinatit.
22 »Paxuwayatit wixin akxni latamanin ni nakaʼakxilhputunkgoyan, chu akxni nakatamakxtukgoyan kxlakgstipankan chu nakamamaxanikgoyan chu lixkajni nalichuwinankgo mintukuwanikan xtachuna la tiku tlawa tuku nitlan, kaj xpalakata xKgawasa chixku.
23 Lu kapaxuwatit ama kilhtamaku, xlakata ¡kaʼakxilhtit!, lhuwa tasikulunalin nakalakgchanan kʼakgapun, xlakata xnatlatnikan nachuna xkalikatsinikgo xalamakgasa palakachuwinanin.
24 »Pero ¡kgoxotanin wixin tiku lhuwa tuku kgalhiyatit, xlakata wixin lipaxuwapatita putum tuku kalakgchanan!
25 »¡Kgoxotanin wixin tiku uku kgalhkgasnitantit, xlakata natsinksatit!
»¡Kgoxotanin wixin tiku uku litsinatit, xlakata alistalh nalipuwanatit chu natasayatit!
26 »¡Kgoxotanin wixin akxni putum latamanin tlan nakalichuwinankgoyan, xlakata wa uma tuku xalakgmakgan xnatlatnikan katlawanikgolh ni xaxlikana palakachuwinanin!
27 »Pero kkawaniyan wixin tiku kgaxpatpatit: Chuntiya kakapaxkitit mintalatlawanakan, katlawatit tuku tlan xpalakatakan tiku ni kaʼakxilhputunkgoyan,
28 kaskinitit Dios pi kakalakgchilh tuku tlan tiku lakaskinkgo pi kakaʼakgspulan tuku nitlan, chu katlawatit oración xpalakatakan tiku kawanikgoyan tuku lixkajni.
29 Tiku nalakgxtilasan, kalimakapini alakgxtitu milakan; chu tiku namakglhtiyan milhakgat nema wiliya kxkgalhni, na kamaxki milhakgat nema wiliya kxtampin.
30 Kamaxki tiku wi tuku skiniyan, chu tiku makglhtiyan tuku mila, ni kaskini pi kamaspitnin.
31 »Nachuna, chuna la lakaskinatit nakalikatsinikgoyan latamanin, nachuna wixin kakalikatsinikgotit.
32 »Komo kapaxkiyatit tiku kapaxkikgoyan, ¿tuku tlan kakitaxtuniyan? Xlakata asta makglakgalhinanin na paxkikgo tiku kapaxkikgo.
33 Chu komo tlawayatit tuku tlan xpalakata tiku katlawaniyan tuku tlan, ¿tuku tlan kakitaxtuniyan wixin? Asta makglakgalhinanin nachuna tlawakgo.
34 Nachuna, komo wixin kajwatiya kamasakuaniyatit* tiku lakpuwanatit pi nakaxokgoniyan, ¿tuku tlan kakitaxtuniyan? Asta makglakgalhinanin kamasakuanikgo makglakgalhinanin xlakata katsikgo pi nakamaspitniparakan.
35 Wata, chuntiya kapaxkitit tiku kasitsinikgoyan chu katlawatit tuku tlan chu kamasakuaninantit pero ni kakgalhkgalhitit nakamaspitnikanatit; chu lhuwa tasikulunalin nakgalhiyatit, chu xkamanan Tiku xala talhman nalitaxtuyatit, xlakata xla tlan kalikatsini tiku ni paxtikatsininankgo chu tiku lixkajni likatsikgo.
36 Chuntiya kalakgalhamanantit, chuna la minTlatkan* xalakgalhamana.
37 »Nachuna, nialh kalakputsanantit chu na ni nakalakputsananikanatit; chu nialhtu kakaliyawatit amakgapitsin, chu na nitu katikaliyawakantit. Chuntiya katapatinantit,* chu na nakatapatikanatit.*
38 Kalismanitit namastayatit, chu na nakamaxkikanatit. Xlakan lhuwa nakamujunikgoyan kmibolsaskan.* Xlakan naʼaklhitjukgo chu nalakchikijukgo asta natakgalhmakgan. Xlakata chuna la kalikatsiniyatit amakgapitsin, nachuna nakalikatsinikanatit».
39 Alistalh, kalitachuwinalh akgtum liʼakxilhtit: «Chatum lakgaxokgo nila pulalin atanu lakgaxokgo, ¿ni xlikana? Xchatiykan akxtum natajukgoyacha niku kapulhman, ¿ni xlikana?
40 Tamakgalhtawakgen ni tlakg katsi nixawa xmakgalhtawakgena, pero putum tiku liwana masiyanikanit nalitaxtu la xmakgalhtawakgena.
41 Chu, ¿tuku xlakata akxilha paja nema wi kxlakgastapu mintala, pero ni akxilha viga* nema wi kmilakgastapu?
42 ¿La* tlan nawaniya mintala* “Tala, kimaxki talakaskin nakmaxtuniyan paja kmilakgastapu”, pero wix ni akxilha viga nema wi kmilakgastapu? ¡Wix tiku lakpuwana pi xasanto! Pulana kamaxtu viga kmilakgastapu, chu chuna liwana naʼakxilha la namaxtuniya paja nema wi kxlakgastapu mintala.
43 »Xlakata putum xatlan kiwi ni masta xamasni xtawakat, chu xamasni kiwi ni masta xatlan xtawakat.
44 Xlakata akgatunu kiwi litalakgapasa xtawakat. Akgtum liʼakxilhtit, latamanin ni puxkgo higos klhtukun, nipara puxkgo uvas kkiwi nema kgalhi xalhtukun.
45 Chatum chixku tiku tlan likatsi taxtuyacha kxnaku tuku laktlan; pero chixku tiku nitlan likatsi taxtuyacha kxnaku tuku ni laktlan; xlakata tuku mastokgwilinit kxnaku wa tuku taxtu kxkilhni.
46 »Pero ¿tuku xlakata kiwaniyatit, “¡Malana! ¡Malana!”, pero ni makgantaxtiyatit tuku kwan?
47 Putum tiku kilakgmin chu kgaxmata kintachuwin chu makgantaxti, nakkawaniyan tiku xtachuna litaxtu:
48 Litaxtu chuna la chatum chixku, tiku tlawalh xchik, kawaxli chu kapulhman tlawalh chu anta kxkgalhni lanka chiwix matijulh. Wa xlakata akxni stakli chuchut, chuchut tliwakga makgsnokgli ama chiki, pero ni kgalhilh litliwakga nalakchiki, xlakata tlan la* xtlawakanit.
49 Pero nachuna, tiku kgaxmata kintachuwin pero nitu tlawa, litaxtu xtachuna chatum chixku tiku tlawalh xchik kxkgalhni tiyat pero ni matijulh. Chuchut makgsnokgli chu lakapala laktilhyawalh, chu putum ama chiki malakgsputuka».
Notas
^ Alakatanu wankan «tapuxli».
^ Kaʼakxilhti glosario.
^ Kaʼakxilhti glosario.
^ O: «nila xmatsuwi».
^ Alakatanu wankan «kxpakgkana».
^ O: «nila xmatsuwi».
^ Alakatanu wankan «xtakam».
^ O: «tiku nitu kgalhiyatit».
^ Wamputun ni skinkan xaskgata.
^ Alakatanu wankan «minTatakan o minTikukan».
^ O: «kamakgxtakgnantit».
^ O: «nakamakgxtakgkanatit».
^ Latamanin xalamakgasa xtlawakgo xbolsajkan niku xtalakgstokga klhakgatkan kxkuxmun. Anta xmakglhtinankgo chu xpulinkgo tuku xkamaxkikan.
^ Alakatanu wankan «lhtakala».
^ Alakatanu wankan «Chi».
^ Alakatanu wankan «mintakam».
^ Alakatanu wankan «chi».
