Lucas 8:1-56
-
Lakpuskatin talatapulikgo Jesús (1-3)
-
Liʼakxilhtit xla chanana (4-8)
-
Tuku xlakata Jesús xmaklakaskin liʼakxilhtit (9, 10)
-
Wankan tuku kilhchanima liʼakxilhtit xla chanana (11-15)
-
Makgskgot ni akgtalawilikan (16-18)
-
Xtse chu xnatalan Jesús (19-21)
-
Jesús makaksa tliwakga un (22-25)
-
Jesús kamalakgacha demonios nalaktanukgo paxni (26-39)
-
Xtsumat Jairo; chatum puskat xamani klhakgat Jesús (40-56)
8 Ni limakgas, alh klaklanka kachikinin chu klaktsu kachikinin, xlichuwinantilha xatlan tamakatsinin xla xTamapakgsin Dios. Chu xtaʼankgo kgalhkutiy apóstoles,
2 na xʼankgo makgapitsi lakpuskatin tiku xkatamakxtunikanit demonios chu xkamapaksakanit xtajatatkan: María tiku xwanikan Magdalena, tiku xtamakxtunikanit akgtujun demonios;
3 Juana xpuskat Cuza, xapuxku kskujni Herodes; Susana; chu lhuwa amakgapitsi lakpuskatin tiku xlimaklakaskinkgo tuku xkgalhikgo xlakata xkamakgtayakgolh.
4 Alistalh, akxni xtamakxtumikgonita lhuwa latamanin chu tiku xtaʼankgo kʼakgatunu laklanka kachikinin, xla kalitachuwinalh akgtum liʼakxilhtit:
5 «Chatum chanana alh chan xtalhtsi. Akxni xchananantilha, makgapitsi talhtsi tamakgocha kxkilhpan tiji chu latamanin laktayamikgolh chu tsiktsi* sakwakgolh.
6 Makgapitsi tamakgocha kkachiwixni, chu akxni punkgolh, skakkgolh xlakata ni kastakga xwanit.
7 Amakgapitsi tamakgocha kkalhtukunin, chu lhtukun nema lakxtum tastakkgolh malankgakgolh.
8 Pero amakgapitsi talhtsi tamakgocha kxatlan tiyat, chu akxni punkgolh, liwaka akgtum ciento mastakgolh xtawakatkan nichuna la xchankanit». Akxni lichuwinankgolh uma, pixlanka wa: «Tiku tlan kgaxmata, kakgaxmatli».
9 Pero xtamakgalhtawakgen kgalhskinkgolh tuku xkilhchanima uma liʼakxilhtit.
10 Xla wa: «Wixin kamaxkikanatit talakaskin naʼakgatekgsatit* tuku kaj tsekg wi xla xTamapakgsin Dios, pero amakgapitsin kkalimasiyanilh liʼakxilhtit, xlakata maski akxilhmakgo tuku ktlawa, pero ni akgatekgskgo tuku akxilhkgo, chu maski kgaxmatmakgolh tuku kwan, pero ni akgatekgskgo tuku kilhchanima.
11 Wa uma tuku kilhchanima liʼakxilhtit: Talhtsi wa xtachuwin Dios.
12 Talhtsi nema tamakgocha kxkilhpan tiji wa tiku kgaxmatkgonit, chu alistalh min Akgskgawini chu mapanu tachuwin nema wi kxnakujkan xlakata ni nakanajlakgo chu ni nalakgtaxtukgo.
13 Nema tamakgocha kkachiwixni wa tiku akxni kgaxmatkgo tachuwin, xatapaxuwan makgamakglhtinankgo, pero ni kgalhikgo xtankgaxekgkan. Kaj ni makgas kilhtamaku kanajlakgo, pero akxni kaliʼakxilhkan makgxtakgkgo takanajla.
14 Nema tamakgocha kkalhtukunin wa tiku kgaxmatkgonit, pero xlakata lhuwa tuku lilakgaputsakan, lhuwa tumin, chu tuku lipaxuwakan klatamat, tlawa pi namalankgakgo chu nikxni mastakgo xatlan xtawakatkan.
15 Pero nema tamakgocha kxatlan tiyat, wa tiku kgalhikgo lu xatlan naku chu akxni kgaxmatkgonit tachuwin, ni makgxtakgkgo chu linkgo tawakat chu tayanikgo.
16 »Niti anan tiku akxni mapasinita akgtum makgskgot liʼakgtala tlamink o wili kxtampin putama, wata wili niku talhman xlakata putum tiku natanukgo naʼakxilhkgo xkgakganat.
17 Xlakata ni anan tuku matsekgkanit nema ni katitasiyalh chu tuku liwana tsekg wilikanit nakatsikan, ni putum kilhtamaku tsekg katitawi.
18 Wa xlakata, kuentajkatlawatit chuna la kgaxpatatit, xlakata tiku kgalhi tlakg namaxkikan; pero tiku nitu kgalhi, asta tuku lakpuwan pi kgalhi namakglhtikan».
19 Alistalh minkgolh xtse* chu xnatalan* lakgkgawasan, pero xlakata lhuwa latamanin xwilakgolh nila xlakgtalakatsuwikgo.
20 Wa xlakata makatsinika: «Mintse chu minatalan lakgkgawasan yakgolh kkilhtin chu akxilhputunkgoyan».
21 Xla kakgalhtilh: «Kintse chu kinatalan wa uma tiku kgaxmatkgo xtachuwin Dios chu makgantaxtikgo».
22 Akgtum kilhtamaku, Jesús chu xtamakgalhtawakgen tajukgolh kʼakgtum barco, chu Jesús kawanilh: «Kaʼaw kxakilhtutu niku taʼakgstokgtawilanit chuchut». Wa xlakata tsukukgolh ankgo kxakilhtutu.
23 Pero akxni xʼamakgolh, Jesús lhtatalh. Chu anta niku taʼakgstokgtawilanit chuchut tsukulh min tliwakga un, chu xbarcojkan tsukulh litatsama chuchut chu xtakgtsiputun.
24 Wa xlakata, xlakan ankgolh mastakwanikgo, chu wanikgolh: «¡Makgalhtawakgena, Makgalhtawakgena, nakmuxtuyaw!».* Wa xlakata xla takilh, chu kilhnilh un chu takgayawana. Chu nialh unalh, chu takakaksli.
25 Alistalh kawanilh: «¿Tuku xlakata ni kanajlayatit pi Dios tlan nakinkamakgtayayan?». Pero xlakan lu pekuankgolh chu kaks lakawankgolh, chu xlawanikgo: «¿Tiku uma chixku? Asta kamapakgsi un chu chuchut, chu kgalhakgaxmatnikgo».
26 Chu chankgolh klanka xkachikinkan gerasenos, nema wi kxakilhtutu Galilea.
27 Chu akxni Jesús taktalh kbarco, tatanokglhli chatum chixku xalak kachikin tiku xlaktanuma demonios. Makgasa kaj xalhtantala* xlama chu ni xtamakgxtakga kʼakgtum chiki, wata xlama kxlakgstipan putaknun.
28 Akxni akxilhli Jesús, katasalh chu lakgtakilhputalh, chu pixlanka* wa: «¿Tuku lakgtanita unu, Jesús, xKgawasa Dios Tiku xala talhman? Ktasaskiniyan pi ni kintimapatiniya».
29 (Xlakata Jesús makglhuwata xlimapakgsinit ama demonio pi xlaktaxtulh chixku. Uma demonio makglhuwa xʼakgchipanit, chu makglhuwa xlichikan cadenas kxtantun chu kxmakan chu wi tiku xkuentajtlawa, pero xla xlakpucha cadenas, chu demonio xlin niku niti xlama).
30 Jesús kgalhskilh: «¿Tuku mintukuwani?». Xla kgalhtinalh: «Legión»,* xlakata lhuwa demonios xlaktanukgonit.
31 Chu xtasaskinimakgolh pi ni xkalimapakgsilh naʼankgo kkapulhman.*
32 Anta ksipi xpuchwayamakgolh lhuwa paxni, wa xlakata demonios tsukukgolh tasaskinikgo pi xkamaxkilh talakaskin nalaktanukgo paxni, chu xla kamaxkilh talakaskin.
33 Chu demonios laktaxtukgolh chixku chu kalaktanukgolh paxni, chu lhuwa paxni lakapala tamokgoskgolh ktalhpan* chu tajukgocha niku xtaʼakgstokgtawilanit chuchut chu muxtukgolh.
34 Pero akxni xkuentajtlawananin paxni akxilhkgolh tuku xlanit, tsalakgolh chu makatsininankgolh kkachikin chu klaktsu kachikinin.
35 Wa xlakata latamanin ankgolh akxilhkgo tuku xlanit. Lakgminkgolh Jesús chu tekgskgolh chixku tiku xlaktanuma demonios, klhakgananit chu akgstitum xkgalhi xtalakapastakni, xwi lakatsu kxtantun Jesús, chu xlakan pekuankgolh.
36 Chu tiku xʼakxilhkgonit kawanikgolh la* xkuchikanit ama chixku tiku xlaktanuma demonios.
37 Alistalh lhuwa latamanin xalak xkachikinkan gerasenos skinikgolh Jesús pi xtaxtulh anta, xlakata lu xpekuankgonit. Alistalh xla tajulh kbarco xlakata naʼan.
38 Pero chixku tiku xlaktanuma demonios chuntiya xtasaskinima pi xmaxkilh talakaskin kstalanilh. Pero xla ni maxkilh talakaskin, chu wanilh:
39 «Kapit kminchik, chu chuntiya kalichuwinanti tuku Dios tlawanit mimpalakata». Wa xlakata xla alh chu lakgatum kkachikin xlichuwinantilha tuku Jesús xtlawanit xpalakata.
40 Akxni Jesús taspitli, latamanin xatapaxuwan makgamakglhtinankgolh, xlakata xputumkan xkgalhkgalhimakgolh.
41 Pero ¡kaʼakxilhti!, milh chatum chixku tiku xwanikan Jairo; uma chixku xmakgpulalinan ksinagoga.* Chu lakgtatsokgostalh Jesús chu tsukulh tasaskini pi xtaʼalh kxchik,
42 xlakata kaj xachastum xtsumat tiku max akgkutiy kata xkgalhi, xnima.
Akxni Jesús xʼama, latamanin xlakxkititilhakgo.*
43 Chu na xwi chatum puskat tiku akgkutiy kata lata xlakgstajma, pero nila tiku xmapaksanit.
44 Kxchakgen lakgtalakatsuwilh chu xamanilh xkilhpan klhakgat, chu tunkun tachokgolh la* xlakgstajma.
45 Wa xlakata Jesús wa: «¿Tiku kixamalh?». Akxni niti litayalh, Pedro wanilh: «Makgalhtawakgena, latamanin tokglhmakgon chu lakxkititilhamakgon».
46 Pero Jesús wa: «Wi tiku kixamalh xlakata kkatsi pi kintaxtunilh litliwakga».
47 Akxni puskat akxilhli pi katsika tuku tlawalh, klhpipitilha* lakgmilh chu lakgtatsokgostalh Jesús chu kxlakatin putum latamanin wa tuku xlakata kxamanit, chu pi tunkun xmapaksakanit.
48 Pero Jesús wanilh: «Kintsumat, mintakanajla mapaksanitan. Kapit chu nitu kalilakgaputsa».
49 Akxni chuntiya xchuwinama, milh chatum chixku xalak xchik Jairo, chu wa: «Mintsumat nilha; nialh kamakglhuwi Makgalhtawakgena».
50 Akxni Jesús kgaxmatli uma, wanilh Jairo: «Ni kapekuanti, kajwatiya kakgalhi takanajla, chu xla nalakgtaxtu».
51 Akxni chalh kchiki, ni mastalh talakaskin pi wi tiku na natanukgo kajwatiya Pedro, Juan, Santiago chu xnatlatni aktsu tsumat.
52 Pero putum latamanin xtasamakgolh chu akstu xkakuxmukgaximaka xlakata xlakglipuwamakgolh aktsu tsumat. Wa xlakata Jesús kawanilh: «Nialh katasatit, xlakata nitu ninit, kaj lhtatama».
53 Wa xlakata, xlakan tsukukgolh lilitsinkgo chu likgalhkgamanankgo, xlakata xkatsikgo pi xninita.
54 Pero Jesús makgachipalh chu pixlanka wanilh: «Tsumat, ¡kataki!».
55 Chu xla lakastakwanalh,* chu tunkun takilh, chu Jesús limapakgsinalh pi xmaxkika tuku xwalh.
56 Nachuna, xnatlatni lu xpaxuwamakgolh, asta nila xkanajlakgo, pero Jesús kawanilh pi niti xwanikgolh tuku xlanit.
Notas
^ Alakatanu wankan «spitu».
^ Alakatanu wankan «namakgachakgxiyatit».
^ Alakatanu wankan «xnana».
^ Alakatanu wankan «xnatakamanan».
^ Alakatanu wankan «nakjikswayaw».
^ Alakatanu wankan «makglhtintili».
^ Alakatanu wankan «akglhman».
^ Kaʼakxilhti glosario.
^ Kaʼakxilhti glosario.
^ Alakatanu wankan «ktamakgwasni».
^ Alakatanu wankan «chi».
^ Kaʼakxilhti glosario.
^ Alakatanu wankan «xlakgxkgayatilhakgoy».
^ Alakatanu wankan «chi».
^ Alakatanu wankan «xtalhanama».
^ O: «taspitpa xlijaxan».
