Tito 1:1-16
1 Akit Pablo, chatum kskujni Dios chu xʼapóstol Jesucristo. Kintakanajla chu taskujut nema ktlawa chuna la apóstol xtachuna xtakanajlakan tiku Dios kalaksakli chu xtachuna xaxlikana tamasiy nema limaxkikan kakni Dios.
2 Umakgolh takilhtikgonit ktakgalhkgalhin xla latamat nema ni kgalhi xlisputni. Dios, tiku nila akgsaninan, malaknulh uma makgasata.
3 Pero akxni lakgchalh xkilhtamaku, xla limaklakaskilh xatlan tamakatsinin xlakata xmakatsininalh xtachuwin, akit kilakgayawaka naklichuwinan chuna la limapakgsinalh kiLakgmaxtunakan, Dios.
4 Ktsokgnaniman Tito, tiku xtachuna la kinkgawasa litaxtuya ktakanajla nema kinchatiykan kgalhiyaw:
Wa kinTlatkan* Dios chu Cristo Jesús kiLakgmaxtunakan, kamaxkikgon takaksni chu talakgalhaman nema ni anan xtachuna.*
5 Kmakgxtakgchan anta kCreta xlakata nalakkaxwiliya tuku talakaskin liwana natlawakan chu xlakata kʼakgatunu kachikin nalakkaxwiliya tiku lakgkgolotsin nalitaxtukgo, chuna la klimapakgsin:
6 xlakata kgolotsin nawan, xlilat pi chatum chixku nila nalimawakakan tuku nitlan, tiku kaj chatum xpuskat* kgalhi, tiku xkamanan na kstalaninanin Cristo chu ni kalimawakakan pi akglakgwa linkgo xlatamatkan chu ni lakaskinkgo nakamapakgsikan.
7 Xlakata chatum kgolotsin kuentajtlawa tuku xla Dios, xlilat pi nila nalimawakakan tuku nitlan, ni tlankajwa namakgkatsikan, ni lakapala nasitsi, ni kgotni xliwanat, ni kgaxina xliwanat,* ni xlipaxkit tumin chu ni kajwatiya naputsa tuku nalitamakgtaya,
8 wata tlan kamakgamakglhtinan amakgapitsin, paxki tuku tlan, kgalhi tlan talakapastakni, lilatama tuku xaʼakgstitum, ni makgxtakga Dios, machokgo akxni tlawaputun tuku nitlan,
9 akxni masiya, liwana maklakaskin tachuwin nema lakgchan nakanajlakan, xlakata tlan nalimatliwakglhnan* xatlan tamasiy* chu tliwakga nakastakyawa tiku lilakatakinankgo tachuwin.
10 Xlakata wilakgolh lhuwa lakchixkuwin tiku ni lakaskinkgo nakamapakgsikan, tiku wankgo tuku nitu litaxtu, chu akgskgawinanin, tlakg liwaka tiku wankgo pi chatum lataman xlilat naʼakstilichukunikan kxuwa xlichixku.*
11 Xlilat nakamakilhkaksaya, xlakata umakgolh lakchixkuwin laktlawanimakgolh xtakanajlakan akgtuminika familias akxni masiyakgo tuku ni xlilat kaj xlakata nalitlajakgo tumin.
12 Chatum palakachuwina tiku xtachikikan, wa: «Tiku xalak Creta putum kilhtamaku akgsaninankgo, xalakluku animales litaxtukgo, xalaklhkitit chu malakatsalikgo chuna la wayankgo».
13 Uma tuku lichuwinalh xlikana. Wa xlakata, chuntiya palha kakastakyawa xlakata tliwakga natawila xtakanajlakan,
14 chu ni nakanajlakgo xcuentoskan* judíos chu xlimapakgsinkan lakchixkuwin tiku tamakgatlinikgonit tuku xaxlikana.
15 Tiku xalakskulunku, putum skulunku akxilhkgo; pero tiku xkajwanankgonit chu ni kgalhikgo takanajla, nituku skulunku akxilhkgo xlakata xkajwanankgonit xtapuwankan chu xtalakapastaknikan.
16 Wankgo kxlakatinkan latamanin pi lakgapaskgo Dios, pero tuku tlawakgo limasiyakgo pi lakgmakgankgo, xlakata Dios xalaklixkajni kaʼakxilha, ni kgalhakgaxmatnankgo chu ni katikamaklakaskilh xlakata natlawakgo tuku tlan.
Notas
^ Alakatanu wankan «kinTatakan o kinTikukan».
^ O: «talakgalhaman nema ni kinkalakgchanan». Kaʼakxilhti glosario.
^ Alakatanu wankan «xchat».
^ O: «ni chatum tiku nitlan limamakgkatsininan xtachuwin».
^ O: «nalistakyawanan».
^ O: «tamasiy nema makgtayanan».
^ Kaʼakxilhti glosario.
^ O: «ni xaxlikana xlikgalhchuwinkan».
