1 Corintios 5:1-13
5 Takgaxmata pi kmilakgstipankan chatum chixku tlawama talakgxtumit nema ni xlitatlawat,* chu uma talakgxtumit* nipara xalak atanu kachikinin chuna tlawakgo: pi chatum chixku tawi xpuskat* xtlat.*
2 Wixin, ¿wata kaj lipaxuwapatit? ¿Pi ni wata kaj xlilipuwantit?, chu ¿ni wata xtamakxtutit kcongregación chixku tiku tlawalh talakgalhin?
3 Maski ni anta kkatawilachan, klilakpuwan tuku titaxtupatit chu klakputsananilha chixku tiku chuna tlawanit, xtachuna la anta xakkatatawilachan.
4 Akxni wixin natamakxtupiyatit kxtukuwani Malana* Jesús, chu xlakata wixin katsiyatit pi akit kkgalhi xlitliwakga Malana Jesús chu klilakpuwan tuku titaxtupatit,
5 kamakamaxkitit Satanás ama chixku, xlakata namapanukan nitlan talakapastakni nema manulh kcongregación, xlakata chuntiya nakgalhi xtakanajla congregación asta kxkilhtamaku Malana.
6 Nitlan tuku litatlankiyatit. ¿Ni katsiyatit pi kaj aktsu limaxkutin, maxkuti putum harina nema talakgwilhakanit chuchut?
7 Kamapanutit xalakgwan limaxkutin xlakata putum harina nema talakgwilhakanit chuchut xasasti nawan, xlakata wixin litaxtuyatit xtachuna la harina nema nitu kgalhi limaxkutin. Xlikana, Cristo mastanita xlatamat la* akgtum tamakamastan, chu litaxtulh kiborregojkan* xla Pascua.
8 Wa xlakata, katlawaw fiesta nema aku mima, pero anta kfiesta ni namaklakaskinaw limaxkutin, chu ni kilimaklakaskinatkan limaxkutin tuku xtachuna xalixkajni tatlaw chu talakgalhin. Wata kawaw kaxtalanchu nema ni kgalhi limaxkutin, nema xtachuna kgalhikan xalakatitum naku chu xaxlikana.
9 Ktatsokgni nema kkamalakgachanin anta kkatsokgnin pi nialh kakatalalipinkgotit tiku tlawakgo talakgxtumit nema ni xlitatlawat,*
10 xlakata uma ni kwamputun pi nakatamakgatlinikgoyatit latamanin tiku tlawakgo talakgxtumit nema ni xlitatlawat* xalak uma kakilhtamaku, o latamanin tiku lhuwa tuku kgalhiputunkgo, o tiku kgalhanankgo, o tiku kakninanikgo tatlawamakgxtu.* Komo chuna xwa, xtalakaskilh pi wixin xtaxtutit kkakilhtamaku.
11 Pero uku kkatsokgniman pi komo chatum tala* tlawa talakgxtumit nema ni xlitatlawat,* o lhuwa tuku kgalhiputun, o kakninani tatlawamakgxtu,* o kawani amakgapitsin lixkajni tachuwin, o kgotni, o kgalhana, nialh natalalipinatit chu nipara natawayanatit.
12 Akit ni kilakgchan nakkalakputsanani tiku ni tapakgsikgo kcongregación. Wixin xlilat nakalakputsananiyatit tiku tapakgsikgo kcongregación
13 chu Dios nakalakputsanani tiku xalak kakilhtamaku. «Katamakxtutit kcongregación ama chixku tiku lixkajni likatsi».
Notas
^ Alakatanu wankan «xchat».
^ Alakatanu wankan «xtata o xtiku».
^ Alakatanu wankan «Puchina».
^ Alakatanu wankan «chi».
^ Xagriego: «xaskgataku borrego».
^ Alakatanu wankan «tamakanitlaw».
^ Alakatanu wankan «takam».
^ Alakatanu wankan «tamakanitlaw».
