1 Juan 5:1-21
5 Putum tiku kanajlakgo pi Jesús wa Cristo, xkamanan Dios litaxtukgo chu putum tiku paxkikgo xaTlat* nachuna paxkikgo xkamanan Dios.
2 Akxni paxkiyaw Dios chu tlawayaw tuku wan xlimapakgsin, chuna katsiyaw pi kapaxkiyaw xkamanan Dios.
3 Xlakata wa uma kilhchanima pi paxkiyaw Dios: nakgalhakgaxmataw xlimapakgsin; chu xlimapakgsin ni akgtum takuka,
4 xlakata putum tiku xkamanan Dios litaxtukgo* makgatlajakgonit kakilhtamaku. Chu kintakanajlakan limakgatlajakgonitaw kakilhtamaku.
5 ¿Tiku tlan namakgatlaja kakilhtamaku? ¿Ni wa tiku kanajla pi Jesús xKgawasa Dios?
6 Analh chuchut chu kgalhni akxni milh Jesús. Ni kajwatiya xʼanan chuchut, na xʼanan kgalhni. Chu espíritu santo masiya uma xlakata lichuwinan tuku xaxlikana.
7 Anan pulaktutu tuku masiya pi Jesús wa xKgawasa Dios:
8 espíritu, chuchut chu kgalhni, umakgolh pulaktutu watiya pulaktum tuku lichuwinankgo.
9 Akinin kanajlayaw tuku wankgo latamanin, pero tuku lichuwinan Dios tlakg lanka. Xlakata wa uma tuku Dios lichuwinan: tuku lichuwinalh xpalakata xKgawasa.
10 Lataman tiku kanajlani xKgawasa Dios limasiya pi wilinit kxnaku tuku Dios masiyanilh. Lataman tiku ni kanajlani Dios akgsanina limaxtu, xlakata ni kanajla tuku lichuwinalh Dios xpalakata xKgawasa.
11 Chu wa uma tuku lichuwinalh: Dios kinkamaxkin latamat nema ni kgalhi xlisputni, chu uma latamat limakglhtinanaw xpalakata xKgawasa.
12 Tiku kstalanina xKgawasa Dios kgalhi uma latamat; tiku ni kstalanina xKgawasa ni kgalhi uma latamat.
13 Kkatsokgnaniman uma, wixin tiku kanajlaniyatit xtukuwani xKgawasa Dios, xlakata nakatsiyatit pi kgalhiyatit latamat nema ni kgalhi xlisputni.
14 Chu lipawanaw* pi tlan naskiniyaw kaxatukawa, pero chuna la xtalakaskin chu xla kinkakgaxmatniyan.
15 Chu komo katsiyaw pi xla kinkakgaxmatniyan akxni kaxatukawa skiniyaw, katsiyaw pi namakglhtinanaw tuku skinaw xlakata wa skininitaw.
16 Komo wi tiku akxilha xtala* pi tlawama talakgalhin nema ni linan klinin, xlilat natlawani oración Dios xpalakata, chu Dios namaxki latamat uma tala. Uma wa xpalakata tiku ni tlawakgo talakgalhin nema linan klinin. Anan akgtum talakgalhin nema linan klinin. Xlakata uma talakgalhin ni kwani pi katlawalh oración xlakata namakgtaya ama lataman tiku tlawa uma talakgalhin.
17 Talakgalhin litaxtu putum tatlaw nema ni xaʼakgstitum, pero anan talakgalhin nema ni linan klinin.
18 Katsiyaw pi tiku xkam Dios ni tlawa talakgalhin, wata xKgawasa* Dios kuentajtlawa, chu Akgskgawini* nila tlawani tuku nitlan.
19 Katsiyaw pi akinin tapakgsiniyaw Dios, pero putum kakilhtamaku wi kxmakan Akgskgawini.*
20 Chu katsiyaw pi xKgawasa Dios minit, chu kinkamaxkinitan taʼakgatekgsni* xlakata nalakgapasaw xaxlikana Dios. Chu akxtum tawilaw xaxlikana Dios xpalakata xKgawasa, Jesucristo. Wa uma xaxlikana Dios chu latamat nema ni kgalhi xlisputni.
21 Laktsu kinkamanan, katamakgatlinitit tatlawamakgxtu.*
Notas
^ Alakatanu wankan «xaTata o xaTiku».
^ Xagriego: «tuku Dios malakachininit».
^ O: «tlan tachuwinanaw Dios chu ni pekuaniyaw».
^ Alakatanu wankan «xtakam».
^ Uma kilhchanima, Jesucristo, xKgawasa Dios.
^ Xagriego: «Tiku lixkajni likatsi».
^ Xagriego: «Tiku lixkajni likatsi».
^ Xagriego: «liskgalala; lakpuwanankan».
^ Alakatanu wankan «tamakanitlaw».
