1 Tesalonicenses 3:1-13
3 Wa xlakata, akxni nialhla ktayaniw xlakata nitu kkatsiw mimpalakatakan, klakpuwaw pi tlakg tlan kiʼakstukan xaktamakgxtakgwi kʼAtenas;
2 pero kkamalakgachanin Timoteo, kintalakan chu kskujni Dios tiku lichuwinan xatlan tamakatsinin xpalakata Cristo, xlakata xkamatliwakglhni chu tlan xkamamakgkatsinin xpalakata mintakanajlakan,
3 xlakata ni nakamaxlajwaniyan* umakgolh takatsanajwat. Xlakata wixin na katsiyatit pi chuna naktitaxtuyaw.
4 Xlakata akxni anta xakkatawilachan, xakkawaniyana pi xakamaw titaxtuyaw umakgolh takatsanajwat, chu wa uma tuku ktitaxtumaw, chuna la wixin katsiyatit.
5 Wa xlakata, akxni nialhla kkgalhkgalhilh xlakata nitu xakkatsi mimpalakatakan, kmalakgachalh Timoteo xlakata nakkatsi la* xlilhuwa lipawampatit Dios, xlakata xakpekuan komo max Tiku matlawinamputun tuku nitlan kalitsakgsaman, chu kintaskujutkan kaj paxkat xwa.
6 Pero Timoteo tiku aku taspitli xlakata kakilakglachan, kinkamaxkinitan laktlan tamakatsinin mimpalakatakan pi ni makgxtakgatit Dios chu xlakata chuna la paxkinanatit, pi chuntiya kilalakapastakaw, chu lu kinkaʼakxilhputunatit nachuna la akinin kkaʼakxilhputunan.
7 Wa xlakata, natalan, maski wi tuku kmaklakaskimaw chu kkgalhiyaw takatsanajwat, lu kinkamatliwakglhni akxni kkatsiw mimpalakatakan chu pi ni makgxtakgatit Dios.
8 Xlakata wa tuku kinkamaxkiyan latamat, komo wixin ni namakgxtakgatit Malana.*
9 Xlikana lu kpaxtikatsiniyaw Dios mimpalakatakan, xlakata wixin kinkamakgapaxuwayatit.
10 Chali chali, kakuwani chu katsisni ktlawayaw oración xliputum kinakujkan xlakata tlan nakkaʼakxilhparayan chu tlan nakkalimakgtayayan tuku maklakaskinatit xlakata natatliwakglha mintakanajlakan.
11 Chuna, kskiniyaw kʼoración kinTlatkan* Dios pi xla chu Malana Jesús kakinkapulalin kkintijikan xlakata tlan nakkalakganachan.
12 Nachuna, klakaskinaw pi Malana katlawalh pi tlakg nalapaxkiyatit chatunu chatunu wixin chu na nakapaxkiyatit amakgapitsin, xtachuna la akinin kkapaxkiyan,
13 xlakata namatliwakglha minakujkan chu xaskulunku nakgalhiyatit minakujkan kxlakatin kinTlatkan Dios akxni Malana Jesús katawi nawan putum xasantos natalan.
Notas
^ Xagriego: «nakamatsuwiyan».
^ Alakatanu wankan «chi».
^ Alakatanu wankan «Puchina».
^ Alakatanu wankan «kinTatakan o kinTikukan».
