1 Timoteo 2:1-15
2 Wa xlakata akit kstakyawanan pi kaskinika Dios xpalakatakan latamanin, katasaskinika Dios, katlawaka oraciones chu kapaxtikatsinika Dios xpalakata putum latamanin,
2 xlakata mapakgsinanin chu putum tiku kgalhikgo limapakgsin, xlakata chuntiya nakgalhiyaw takaksni, ni namakgxtakgaw Dios chu xliputum kinakujkan natlawayaw putum tuku tlawayaw.
3 Dios, tiku kiLakgmaxtunakan, lu tlan akxilha uma chu makgapaxuwa
4 chu xtalakaskin pi putum latamanin liwana kalakgapaskgolh xaxlikana chu kalakgtaxtukgolh.
5 Xlakata kaj chatum Dios wi, chu kaj chatum tiku makgtayanan ktalakkaxlan nema Dios chu latamanin tlawakgo, uma chixku wa Cristo Jesús,
6 tiku xʼakstu tamakamastalh chu xokgolh tuku xtalakaskin xlakata nakalakgmaxtu putum latamanin ktalakgalhin. Latamanin nalichuwinankgo uma akxni nalakgchan xkilhtamaku.
7 Xlakata uma, Dios kilakgayawalh naklichuwinan xatlan tamakatsinin chu apóstol naklitaxtu. Xlakata nakkamasiyani tiku ni judíos xlakata takanajla chu tuku xaxlikana, chu ni kaj kʼakgsaninama, xlikana tuku kwan.
8 Wa xlakata, klakaskin pi xanikuta niku wilakgolh lakchixkuwin katlawakgolh oración, chu akxni chuna natlawakgo kachaxkgolh xmakankan xlakata nalimasiyakgo pi tatayakgo Dios, ni kasitsikgolh chu ni kalatatakglhuwikgolh.
9 Nachuna, lakpuskatin xlilhakganatkan chuna la nakalimaxkikan kakni, chuna la xlilat, kalimasiyakgolh tlan talakapastakni, ni xatuwa takgonkgxni namaklakaskinkgo kxchixitkan chu nipara oro o perlas o xalaktapalaxla lhakgat,
10 pero xlitakaxtayatkan chuna la xlilat, la* lakpuskatin tiku ni makgxtakgkgo Dios. Xlitlawatkan laktlan taskujut, wa uma tuku nalitakaxtayakgo.
11 Puskat kgalhtsekg* katawi akxni nakgaxmata tuku masiyamaka.
12 Ni kmasta talakaskin pi puskat namasiya nipara namapakgsi chixku, wata kgalhtsekg* kakgaxmatli tamasiy.
13 Xlakata Dios pulana tlawalh Adán chu alistalh tlawalh Eva.
14 Nachuna, Akgskgawini ni wa akgskgawilh Adán, wata wa puskat tiku akgskgawimika chu laktlawalh tuku Dios xlimapakgsinit.
15 Komo chatum puskat nakgalhi xkamanan namakgtaya ni natlawa tuku nitlan, xlakata xla* chuntiya nalipawan Dios, nalimasiya tapaxkit, Dios skulunku naʼakxilha chu nalimasiya tlan talakapastakni.
