2 Tesalonicenses 1:1-12
1 Akit, Pablo, nachuna Silvano* chu Timoteo kkamalakgachaniman uma tatsokgni wixin tiku wilatit kcongregación xalak Tesalónica, tiku tapakgsiniyatit Dios xaTlat* chu Malana* Jesucristo:
2 Dios xaTlat chu Malana Jesucristo kakamaxkin talakgalhaman nema ni anan xtachuna* chu takaksni.
3 Xlilat pi putum kilhtamaku nakpaxtikatsiniyaw Dios mimpalakatakan, natalan. Uma chuna xlitatlawat, xlakata mintakanajlakan lu staktilhama chu talhuwima mintapaxkitkan nema lakgalhiniyatit mimputumkan.
4 Xlakata uma, akinin kkamalankiyan kxlakgstipankan xcongregaciones Dios xlakata tayaninitantit chu limasiyanitantit takanajla xliputum taputsastalanit chu taʼakglhuwit* nema patipatit.*
5 Uma limasiya pi Dios xaʼakgstitum chuna la lakputsanan, chu xlakata uma akxilhkanit pi kamininiyan namakgamakglhtinanatit xTamapakgsin Dios, wa xlakata lipatinampatit.
6 Xlakata Dios xaʼakgstitum, xla nakamalakgaxokge tiku kamakgapatinaman.
7 Pero wixin tiku patipatit taʼakglhuwit, Dios nakalakgmaxtuyan chu nachuna akinin, akxni Malana Jesús naminacha kʼakgapun chu akxtum nakataminacha lakgtliwakga xʼángeles
8 klanka lhkuyat xlakata nakamalakgaxokge tiku ni lakgapaskgo Dios chu tiku ni kgalhakgaxmatkgo xatlan tamakatsinin xpalakata kiMalanakan Jesús.
9 Wa kiMalanakan nakalakputsanani chu nakamalakgaxokge akxni nakamalakgsputu putum kilhtamaku, chuna, xla nialh katikaʼakxilhli chu nialh katikalimakgtayalh lanka xlitliwakga.
10 Akxni kiMalanakan namin xlakata namalankikan chu nachuna xasantos xnatalan, putum tiku limasiyakgonit pi kanajlanikgo kaks nalilakawankgo. Chu xlakata wixin kanajlatit tuku kkawanin, na akxtum nakatatawilayatit.
11 Xlakata uma, putum kilhtamaku ktlawayaw oración mimpalakatakan, xlakata kiDioskan nakaʼakxilhan pi kamininiyan latamat nema kalitasanin chu xlakata xlitliwakga xatakgatsin katlawalh putum tuku makgapaxuwa chu kamakgatsilh putum tuku mintakanajlakan kamatlawinitan.
12 Uma chuna kgantaxtuma xlakata xtukuwani kiMalanakan Jesús namalankikan kaj mimpalakatakan chu xlakata namakglhtinanatit kakni xlakata tlan talalipinatit. Uma nalimasiya talakgalhaman nema ni anan xtachuna* nema masta Dios chu Malana Jesucristo.
Notas
^ Na limapakuwikan Silas.
^ Alakatanu wankan «xaTata o xaTiku».
^ Alakatanu wankan «Puchina».
^ O: «takatsanajwat».
^ O: «tayanipatit».
