2 Tesalonicenses 3:1-18
3 Wa xlakata, natalan, chuntiya katlawatit oración kimpalakatakan, xlakata xtachuwin Jehová chuntiya lakapala natamalakgatumi chu namalankikan kxlakgstipankan latamanin, chuna la tlawamaka kmilakgstipankan,
2 xlakata nakinkalakgmaxtukanan kxmakankan lakchixkuwin tiku lixkajni likatsikgo chu tlawakgo tuku nitlan, xlakata ni putum latamanin kgalhikgo takanajla.
3 Pero Malana* ni makgxtakgnan chu nakamatliwakglhan chu nakamakgtayayan xlakata nitu nakatlawaniyan Tiku lixkajni likatsi.
4 Nachuna, kkalipawanan xlakata wixin kstalaninanin Malana. Kkatsiyaw pi makgantaxtipatit chu chuntiya namakgantaxtiyatit tuku kkalimapakgsin.
5 Malana chuntiya kapulalilh minakujkan xlakata napaxkiyatit Dios chu natayaniyatit.
6 Natalan, uku kkalimapakgsiyan kxtukuwani kiMalanakan Jesucristo pi katamakgatlinikgotit natalan tiku ni kgalhakgaxmatnankgo chu ni lilatamakgo talismanin* nema akinin kkamasiyanin.
7 Xlakata wixin katsiyatit tuku militlawatkan xlakata natlawayatit chuna la akinin, xlakata akinin ni akglakgwa klatamaw kmilakgstipankan,
8 niti kaj xachunata kinkamaxkin liwat. Wata tantaku chu tantaskaka palha kskujwi chu klitlakgwaw kintaskujutkan xlakata ni kaj tapalaxla limawit xakkalitaxtunin.
9 Kkgalhiyaw limapakgsin xlakata wi tuku nakinkamaxkikanan, pero nichuna ktlawamaw xlakata natlawayatit chuna la akinin ktlawayaw.
10 Akxni akxtum xakkatawilachan, xakkamaxkiyan uma limapakgsin: «Komo wi tiku ni skujputun, na ni kawayalh».
11 Xlakata kkgaxmatmaw pi makgapitsi tiku wilakgolh kmilakgstipankan ni kgalhakgaxmatnankgo, chu nitu liskujkgo, wata makgtanumakgo anta niku ni xlimakgtanutkan.
12 Umakgolh latamanin kkalimapakgsiyaw chu kkastakyawayaw kxtukuwani Malana Jesucristo pi ni kamakgtanukgolh kxlatamatkan amakgapitsin chu kawakgolh liwat nema xlakan liskujkgonit.
13 Pero wixin, natalan, ni kalimakgxtakgtit chuna la tlawapatit tuku xatlan.
14 Pero komo wi tiku ni kgalhakgaxmata tuku kkawaninitan kʼuma tatsokgni, kuenta kakatlawakantit xpalakata uma lataman, chu nialh akxtum katalatit, xlakata chuna namaxanan.
15 Maski chuna, ni chatum talatlawana kaliʼakxilhtit, wata chuntiya kastakyawatit chuna la chatum tala.
16 Malana tiku kgalhi takaksni kakamakgtayan nakgalhiyatit takaksni xliputum tuku natlawayatit. Putum wixin akxtum kakatatawilan Malana.
17 Akit, Pablo, kimakan klitsokgma uma tamakgachipat. Putum kilhtamaku chuna ktsokgnan kkintatsokgni xlakata nakatsiyatit pi akit ktsokgli.
18 Wa kiMalanakan Jesucristo kakamaxkin putum wixin xtalakgalhaman nema ni anan xtachuna.*
