Jonás 4:1-11
4 Pero Jonás ni lakgatilh uma chu lu lisitsilh.
2 Wa xlakata wanilh Jehová: «Ay, Jehová, xakkatsiya pi wa uma tuku xpimpat tlawaya akxni xakwi kkinkachikin. Wa xlakata ktsalalh chu xakama kTarsis; xakkatsi pi wix tlan likatsiya, lakgalhamaninana, ni lakapala sitsiya chu limasiyaya tapaxkit nema ni makgxtakgnan, nitlan limakgkatsiya akxni kaʼakgspula tuku nitlan amakgapitsin.
3 Ay, Jehová, katlawa litlan, kakimakgni, tlakg tlan nawan nakniy nixawa naklatama».
4 Jehová kgalhskilh: «¿Lakpuwana pi xlilat lu nasitsiya?».
5 Wa xlakata Jonás taxtulh kkachikin chu alh tawila niku tlan xʼakxilhli tuku xʼama akgspula kachikin. Anta tlawalh tuku xliʼakgskgekgnalh.
6 Jehová Dios tlawalh pi kstakli xmayak nipxi xlakata Jonás xliʼakgskgekgnalh chu nialh lu xʼakgchichilh. Chu Jonás lu xpaxuwama xlakata stakli xmayak nipxi.
7 Pero lichali, Dios makamilh tantum aktsu luwa nema walh xmayak nipxi, chu skakli.
8 Akxni tlakg tsukulh chichinan, Dios na makamilh xachichi un kxʼeste kachikin, xlakata lu xchichinama, Jonás xmakgkatsi pi xlakgawitima. Chuntiya kskinima Dios pi xmakgnilh chu xwan: «Tlakg tlan nawan nakniy nixawa naklatama».
9 Dios kgalhskilh Jonás: «¿Lakpuwana pi xlilat lu nalisitsiya tuku akgspulalh xmayak nipxi?».
Jonás kgalhtinalh: «Xlilat naksitsi; lu ksitsinit pi asta kniputun».
10 Pero Jehová wanilh: «Wix lakgalhamanti xmayak nipxi, nema ni liskujti chu ni makgastakti; akgtum tsisni listakli chu akgtum tsisni liskakli.
11 Wa xlakata, ¿ni xlilat naklakgalhaman lanka kachikin Nínive, niku lamakgolh liwaka 120,000 tiku ni katsikgo tuku tlan chu tuku nitlan,* chu niku lamakgolh lhuwa animales?».
Notas
^ O: «niku wi xpakgastakatkan chu xpakgxwikikan».
