Filipenses 1:1-30
1 Pablo chu Timoteo, xlakskujnin Cristo Jesús, kkatsokgnaniman putum wixin tiku akxtum tawilatit Cristo Jesús, natalan* xalak Filipos, nachuna lakgkgolotsin chu makgtayananin kcongregación:*
2 KinTlatkan* Dios chu Malana* Jesucristo kakamaxkin talakgalhaman nema ni anan xtachuna* chu takaksni.
3 Putum kilhtamaku kpaxtikatsini kiDios akxni kkalakapastakan,
4 akxni ktasaskini Dios mimpalakatakan. Makgatunu xatapaxuwan ktasaskini
5 xlakata malakgatuminitantit nalichuwinanatit xatlan tamakatsinin lata kilhtamaku akxni makgamakglhtinantit asta uku.
6 Xlakata klipawan uma, pi Dios nakamakgtayayan namasputuyatit xatlan taskujut nema xla matsukilh kmilakgstipankan asta kxkilhtamaku Cristo Jesús.
7 Xlilat chuna naklakpuwan mimpalakatakan, xlakata lu kkapaxkiyan, wixin tiku kimakgtayatit akxni xaktanuma kpulachin, nachuna akxni kmaklakaskiw limapakgsin xlakata nakkgalhmakgtayayaw xatlan tamakatsinin. Wixin chu akit litamakgtayanitaw xtalakgalhaman Dios nema ni anan xtachuna.*
8 Xlakata Dios katsi pi mimputumkan lu kkaʼakxilhputunan xlakata kkapaxkiyan chuna la Cristo Jesús.
9 Chu wa uma tuku chuntiya kskima kkioraciones: pi mintapaxkitkan chuntiya tlakg katatalhuwitilhalh xatakgatsin takatsin chu xatlan talakapastakni;
10 xlakata nakatsiyatit tuku tlakg xlakaskinka, xlakata lakskulunku nawanatit chu ni nakamaʼakgchakgxniyatit amakgapitsin asta kxkilhtamaku Cristo;
11 chu tlakg katlawatit xaʼakgstitum tatlaw xlakata xtamakgtay Jesucristo, xlakata nalimaxkikan kakni chu lilanka Dios.
12 Natalan, klakaskin kakatsitit pi tuku kiʼakgspulalh makgtayananit xlakata natalakgatumi xatlan tamakatsinin,
13 xlakata putum Tiku Kuentajtlawakgo Mapakgsina chu putum amakgapitsin latamanin katsikgonit pi xatachin kwi xpalakata Cristo.
14 Chu lhuwa natalan tiku skujnanimakgolh Malana tlakg tatliwakglhkgonit xpalakata ktanuma kpulachin chu ni pekuankgo, wata tlakg lichuwinamakgolh xtachuwin Dios.
15 Xlikana, makgapitsin lichuwinamakgolh Cristo xlakata lakgsitsinankgo chu lakgatikgo talatlawanankgo, pero amakgapitsin xlakata kgalhikgo tlan tapuwan.
16 Tiku tlan tapuwan kgalhikgo lichuwinamakgolh Cristo xlakata paxkikgo, xlakata katsikgo pi kilaksakkanit xlakata nakkgalhmakgtaya xatlan tamakatsinin.
17 Uma tiku lakgsitsinankgo chu lakgatikgo talatlawanankgo, nitlan tapuwan kgalhikgo, xlakata kiwiliniputunkgo taʼakglhuwit kpulachin.
18 ¿Tuku kitaxtuma? Latamanin kgaxmatmakgolh tamakatsinin xlakata Cristo, maski tiku lichuwinamakgolh tlan tapuwan kgalhikgo o ni, chu akit klipaxuwa xlakata uma. Wa xlakata chuntiya naklipaxuwa,
19 xlakata kkatsi pi uma chu miʼoracioneskan chu xtamakgtay espíritu santo nema Jesucristo masta, nakilakgmaxtu.
20 Klipawan chu kkgalhi takgalhkgalhin pi ni ktitamamaxanilh. Pero xlakata ni kpekuan kchuwinan, la uku* kmalanki Cristo chuna la ktlawalh xapulana. Akit* nakmalanki komo klama o maski nakni.
21 Kimpalakata, komo klama, klama xpalakata Cristo chu komo nakni, tlan nakinkitaxtuni.
22 Chu komo chuntiya klama kkakilhtamaku* tlan tlakg nakskujnani Cristo; pero tuku akit xaklaksakli, ni ktimakatsininalh.
23 Uma pulaktiy ni kkatsi tuku naklaksaka xlakata klakgtaxtuputun chu akxtum ktatawilaputun Cristo, wa uma nema tlakg xatlan.
24 Pero tlakg xlakaskinka naklatama kkakilhtamaku mimpalakatakan.
25 Xlakata uma, kkatsi pi ni lakapala ktinilh, chuna, chuntiya nakkamakgtayayan naskujnaniyatit Dios chu xlakata nalipaxuwayatit mintakanajlakan,
26 xlakata akxni nakkalakgtaspitparayan tlakg natalhuwi mintapaxuwankan xlakata kstalaninanin Cristo Jesús litaxtuyatit.
27 Pero kalatapatit chuna la lakgchan xatlan tamakatsinin xpalakata Cristo, chu chuna, komo nakkalakganachan o ni, tliwakglh natawilayatit, akxtum talakapastakni nakgalhiyatit,* chu makxtum natawilayatit, chu akgtum naku nakgalhiyatit xlakata chuntiya nakanajlaniyatit xatlan tamakatsinin,
28 chu nipara tsinu kakamakgapekuan mintalatlawanakan, xlakata uma litasiya pi nakamalakgsputukan, pero wixin nakalakgmaxtukanatit; chu uma, Dios chuna tlawa.
29 Xlakata wixin kamaxkikantit talakgalhaman ni kajwatiya nakanajlaniyatit Cristo, wata nachuna nalipatiyatit.
30 Xlakata xtachuna talachipat kgalhipatit nema akxilhtit pi kkgalhilh, nema kgaxpatatit pi chuntiya kkgalhi.
Notas
^ Xagriego: «tiku xasantos».
^ Alakatanu wankan «KinTatakan o KinTikukan».
^ Alakatanu wankan «Puchina».
^ Alakatanu wankan «chinchuwa».
^ Xagriego: «kimakni».
^ Xagriego: «kliwa».
^ Xagriego: «kaj akgtum espíritu».
