Lucas 9:1-62
-
Kamasiyanikan kgalhkutiy la nalichuwinankgo Dios (1-6)
-
Herodes kaks lakawan xlakata Jesús (7-9)
-
Jesús kamawi akgkitsis mil (10-17)
-
Pedro wan tiku Cristo (18-20)
-
Jesús lichuwinan pi namakgnikan (21, 22)
-
Tuku litatlawat xlakata nastalanikan Jesús (23-27)
-
Talakgpali la tasiya Jesús (28-36)
-
Mapaksakan kgawasa tiku xlaktanuma demonio (37-43a)
-
Jesús lichuwinampara pi namakgnikan (43b-45)
-
Tamakgalhtawakgen litaʼakglhuwikgo tiku tlakg xlakaskinka litaxtu (46-48)
-
Putum tiku ni kinkatalatlawayan, kinkatatayayan (49, 50)
-
Akgtum aktsu kachikin xalak Samaria ni makgamakglhtinan Jesús (51-56)
-
La stalanikan Jesús (57-62)
9 Alistalh kamamakxtumilh kgalhkutiy apóstoles, chu kamaxkilh litliwakga xlakata nakatamakxtukgo putum demonios, chu xlakata tlan nakamapaksakgo tiku tatatlakgo.
2 Chu kamalakgachalh xlakata nalichuwinankgo xTamapakgsin Dios chu tlan namapaksanankgo,
3 chu kawanilh: «Nitu kalipitit xalak tiji, nipara lixtokgo, nipara murralh xla xuwa, nipara kaxtalanchu, nipara tumin;* nipara makatiyun milhakgatkan.*
4 Pero akxni natanuyatit kʼakgtum chiki, anta katamakgxtakgtit asta akxni nataxtuyatit kʼama kachikin.
5 Chu kaniwa niku ni nakamakgamakglhtinankanatit, akxni nataxtuyatit kʼama kachikin, katinkxaktitit pokgxni kmintantunkan xlakata nakatsikgo pi tlawakgonit tuku nitlan».
6 Alistalh, xlakan ankgolh lakgatum klaktsu kachikinin, xlichuwinantilhakgo xatlan tamakatsinin chu kaniwa xmapaksanantilhakgo.
7 Ama kilhtamaku, Herodes,* mapakgsina xalak Galilea, kgaxmatli putum tuku xlama, chu ni xkatsi tuku nakanajla xlakata makgapitsi xwankgo pi Juan xmalakastakwanikanit kkalinin,
8 pero amakgapitsin xwankgo pi Elías xwanit, chu amakgapitsin xwankgo pi chatum xalamakgasa palakachuwina xlakastakwananit.
9 Herodes wa: «Komo Juan akit kmapixkaktininalh, ¿tiku uma chixku, nema lhuwa tuku lichuwinankan xpalakata?». Wa xlakata lu xʼakxilhputun.
10 Akxni apóstoles kitaspitkgolh, wanikgolh Jesús putum tuku xtlawakgonit. Wa xlakata kataʼalh niku tlan xʼakstukan xtawilakgolh kʼakgtum kachikin nema wanikan Betsaida.
11 Pero lhuwa latamanin, akxni katsikgolh, stalanikgolh. Chu xla xatapaxuwan kamakgamakglhtinalh chu tsukulh kalitachuwinan xTamapakgsin Dios, chu kamapaksalh tiku xtatatlakgo.
12 Akxni xkgotanumaja, kgalhkutiy apóstoles lakgtalakatsuwikgolh chu wanikgolh: «Kakawani latamanin pi kaʼankgolha, xlakata tlan naʼankgo klaktsu kachikinin nema lakatsu wilakgolh chu tlan natekgskgo niku tlan namakglhtatakgo chu tlan natamawakgo tuku nawakgo, xlakata unu nitu anan».
13 Pero Jesús kawanilh: «Wixin kakamawitit». Xlakan kgalhtikgolh: «Kaj makkitsis kaxtalanchu chu tantiy skiti* kkgalhiyaw, max natalakaskin pi nakanaw tamawayaw liwat xlakata putum latamanin nawayankgo».
14 Xwilakgolh, max akgkitsis mil lakchixkuwin. Pero xla kawanilh xtamakgalhtawakgen: «Katlawatit pi katawilakgolh para tipuxamakaw kgamputunu».
15 Chu xlakan kgalhakgaxmatnankgolh chu tlawakgolh pi putum latamanin xtawilakgolh.
16 Tiyalh makkitsis kaxtalanchu chu tantiy skiti, talakayawalh kʼakgapun chu tlawalh akgtum oración. Alistalh xla lakgchakgalh* kaxtalanchu, chu xkamaxkitilhama xtamakgalhtawakgen xlakata xlakan xkamaxkikgolh latamanin.
17 Wa xlakata xputumkan wayankgolh chu kgalhkgaskgolh, chu nema akgataxtulh maʼakgstokgkgolh pakutiy canastas* xatalakgchakgataman.
18 Alistalh, akxni xʼakstu xtlawama xʼoración, tamakgalhtawakgen lakgminkgolh, chu xla kakgalhskilh: «¿Tiku wankgo latamanin pi akit?».
19 Xlakan kgalhtinankgolh: «Juan Mununa, pero amakgapitsin wankgo pi wix Elías, chu amakgapitsin wankgo pi chatum xamakgan palakachuwina lakastakwanalh kkalinin».
20 Alistalh kawanilh: «Pero wixin, ¿tiku wanatit pi klitaxtu?». Pedro kgalhtinalh: «Cristo tiku malakgachanit Dios».
21 Alistalh, tliwakga kastakyawalh, kalimapakgsilh pi niti xwanikgolh,
22 pero xla wa: «Talakaskin pi xKgawasa chixku lhuwa tuku napati chu nalakgmakgankgo xpulalinanin judíos, xanapuxkun sacerdotes chu lakgtsokgkinanin, chu namakgnikan, chu namalakastakwanikan xliʼakgtutu kilhtamaku».
23 Alistalh Jesús kawanipa xtamakgalhtawakgen: «Komo wi tiku kistalaniputun, xʼakstu kalakgmakganka, chu katiyalh xkiwi nema makgapatinan* chali chali chu chuntiya kakistalanilh.
24 Xlakata putum tiku nalakgmaxtuputun xlatamat namakgatsankga, pero putum tiku namakgatsankga xlatamat kaj kimpalakata wa tiku nalakgmaxtu.
25 Xlikana, ¿la* nalitamakgtaya chatum chixku komo natlaja putum tuku anan kkakilhtamaku, pero namakgatsankga o nalakglakgalhi xlatamat?
26 Komo wi tiku nakilimaxanan chu nalimaxanan kintachuwin, xKgawasa chixku na nalimaxanan ama lataman akxni namin kxlitliwakga chu kxlitliwakga xTlat chu kxlitliwakga xasantos ángeles.
27 Pero xlikana kkawaniyan, makgapitsin tiku unu yakgolh ni katinikgolh komo ni pulana naʼakxilhkgo xTamapakgsin Dios».
28 Max akgtsayan kilhtamaku xtitaxtunita akxni xwanita umakgolh tachuwin, Jesús taʼalh Pedro, Juan chu Santiago, chu xla tawakalh ksipi xlakata natlawa oración.
29 Chu akxni xtlawama oración, talakgpalilh chuna la xtasiya xlakapun, chu klhakgat lu snapapa makaxkgakgenalh.
30 Chu ¡kaʼakxilhti!, chatiy lakchixkuwin xtakgalhchuwinamakgolh Jesús; wa Moisés chu Elías.
31 Akxni tasiyakgolh, umakgolh chatiy lu xmakaxkgakgenankgo chu tsukukgolh litachuwinankgo xlakata nialh makgas xʼama an, nema xʼama kgantaxtu kJerusalén.
32 Pedro chu tiku xkatawilakgolh lu klhtataputunkgo, pero akxni liwana lakastakwanankgolh, akxilhkgolh xmakgaxkgakganat Jesús chu chatiy lakchixkuwin tiku xtayakgolh.
33 Chu akxni xlakan xtamakgatlinimakgolh, Pedro wanilh Jesús: «Makgalhtawakgena, lu tlan pi unu kwilaw. Wa xlakata, katlawaw akgtutu laktsu chiki: akgtum mila, akgtum xla Moisés chu akgtum xla Elías». Xla ni xkatsi tuku xlichuwinama.
34 Pero akxni xchuwinamajku tasiyalh akgtum puklhni nema kaʼakgtlapalh. Akxni xlakan na makgtanukgolh kpuklhni, pekuankgolh.
35 Alistalh takgaxmatli tachuwin kpuklhni chu wa: «Wa uma kinKgawasa, tiku klaksaknit. Kakgaxpatnitit».
36 Akxni xtakgaxmatmajku tachuwin, Jesús xʼakstu xya. Pero xlakan nitu wankgolh chu ama kilhtamaku niti litachuwinankgolh putum tuku xʼakxilhkgonit.
37 Lichali akxni xlakan taktakgolh ksipi, lhuwa latamanin minkgolh paxtokgkgo.
38 Chu ¡kaʼakxilhti!, chatum chixku pixlanka chuwinalh kxlakgstipankan latamanin, chu wa: «Makgalhtawakgena, ktasaskiniyan pi kaʼakxilhti kinkgawasa, xlakata kaj chastum kkgalhi.
39 Chu ¡kaʼakxilhti!, demonio laktanuy, chu kaj xalan katasa, chu malakwakami chu tlawa pi nakgalhpupu, chu makgxtakga akxni mamakkatsanajwaninita.
40 Kkatasaskinilh mintamakglhtawakgen pi xtamakxtunikgolh, pero xlakan nila chuna tlawakgolh».
41 Jesús kgalhtinalh chu wa: «Latamanin tiku nitlan likatsikgo chu ni kgalhikgo takanajla, ¿la* xlimakgas kilhtamaku chuntiya nakkatatawilayan chu nakkatapatiyan mintayatkan? Unu kalita minkgawasa».
42 Pero akxni xla xlakgtalakatsuwima, demonio likatalalh katutsu chu lu tliwakga makgalhpipilh.* Pero Jesús kilhnilh xalixkajni demonio, matlanilh kgawasa chu makamaxkilh xtlat.
43 Chu putum kaks xlilakawankgo xlakata lanka xlitliwakga Dios nema nitu xtachuna.
Akxni chuntiya kaks xlilakawankgonit xlakata putum tuku xtlawa, xla kawanilh xtamakgalhtawakgen:
44 «Liwana kakgaxpattit umakgolh tachuwin chu kalakapastaktit, xlakata xKgawasa chixku namakamastakan kxmakankan lakchixkuwin».
45 Pero xlakan ni akgatekgskgolh tuku xlichuwinama. Xlakata ni kamaxkika talakaskin naʼakgatekgskgo, chu xpekuankgo nakgalhskinkgo tuku xwamputun uma tuku xlichuwinanit.
46 Alistalh tsukukgolh litaʼakglhuwikgo xlakata tiku tlakg xlakaskinka xwanit.
47 Xlakata Jesús xkatsi tuku xlakapastakkgo kxnakujkan, tasanilh chatum aktsu kgawasa, chu yawalh kxpaxtun,
48 chu kawanilh: «Putum tiku makgamakglhtinan uma aktsu kgawasa kkintukuwani, na kimakgamakglhtinama akit; chu putum tiku kimakgamakglhtinan na makgamakglhtinama Tiku kimalakgachanit. Xlakata tiku likatsi la* ni xlakaskinka kmilakgstipankan, wa tiku tlakg xlakaskinka litaxtu».
49 Juan kgalhtinalh: «Makgalhtawakgena, wi tiku kakxilhwi pi xkatamakxtuma demonios kmintukuwani, pero xlakata ni kinkatatapakgsiyan, xakmachokgoputunaw».
50 Pero Jesús wanilh: «Ni kamachokgotit, xlakata tiku ni katalatlawayan, katatayayan».
51 Xlakata xtalakatsuwima* kilhtamaku akxni xla naʼan kʼakgapun, liwana xlakpuwanit pi naʼan kJerusalén.
52 Wa xlakata pulana kamalakgachalh makatsininanin. Chu xlakan ankgolh chu chankgolh kʼakgtum aktsu xkachikin Samaria xlakata xlakkaxwilikgolh tuku xmaklakaskilh akxni xchalh.
53 Pero tiku xala anta ni makgamakglhtinankgolh, xlakata xla liwana xlakpuwanit* naʼan kJerusalén.
54 Akxni tamakgalhtawakgen Santiago chu Juan akxilhkgolh uma, wankgolh: «Malana, ¿lakaskina nakskinaw pi kataktachi lhkuyat kʼakgapun chu kakamalakgsputulh?».
55 Pero xla kalakgtalakgaspitli chu kakilhnilh.
56 Wa xlakata xlakan ankgolh alakatanu kʼaktsu kachikin.
57 Alistalh akxni xtlawamakgolh ktiji, wi tiku wanilh: «Nakstalaniyan anta niku wix napina».
58 Pero Jesús wanilh: «Wekgni* kgalhikgo klhukukan, chu tsiktsi* xalak akgapun kgalhikgo xmasakgakan, pero xKgawasa chixku ni kgalhi niku namajaxa xʼakgxakga».
59 Alistalh wanilh achatum: «Kistalanina kawanti». Chixku kgalhtinalh: «Malana, kimaxki talakaskin pulana nakan maknu* kintlat».
60 Pero Jesús wanilh: «Kamasta talakaskin pi tiku nikgonita kamaknukgolh xninkan, pero wix kapit chu kaniwa kalichuwinanti xTamapakgsin Dios».
61 Chu achatum wampa: «Nakstalaniyan, Malana, pero pulana kimaxki talakaskin nakan kawani tiku xalak kinchik pi kama».
62 Jesús wanilh: «Nipara chatum chixku tiku lakgwaxnama kpukuxtu chu lakgtalakgaspita tuku makgxtakga kxchakgen minini natanu kxTamapakgsin Dios».
Notas
^ Xagriego: «plata».
^ O: «putiy milhakgatkan».
^ Alakatanu wankan «tamakgnin».
^ Alakatanu wankan «lakxtulilh».
^ O: «pakgxu niku mujukan taway».
^ Alakatanu wankan «chi».
^ Alakatanu wankan «chi».
^ Xagriego: «snokgli un».
^ Alakatanu wankan «chi».
^ Xagriego: «xtakgatsima».
^ Xagriego: «tsaj xlakglakachanit».
^ Alakatanu wankan «Tankiwi».
^ Alakatanu wankan «spitu».
^ O: «akgtapu».
