Rut 2:1-23
2 Noemí xkgalhi chatum xtalilakgapasni tiku xminacha kxfamilia xchixku, Elimélec. Uma chixku xwanikan Boaz chu xkgalhi lhuwa tumin.
2 Rut, tiku xalak Moab xwanit, wanilh Noemí: «Kakimaxki talakaskin nakan kkapukuxtun xlakata naksaka tuku makgxtakgtilhamakgo tiku makimakgo tachanan». Chu Noemí kgalhtilh: «Kapit kintsumat».
3 Wa xlakata xla alh chu tsukulh kastalanitilha tiku xmakimakgolh tachanan, ksaktilhama tuku xʼakgataxtutilhama. Ni xkatsi pi kapukuxtun niku chalh xtapakgsini Boaz, tiku xtalilakgapasni Elimélec xwanit.
4 Boaz taxtucha kBelén chu alh kxkapukuxtun chu kawanilh tiku xmakimakgolh tachanan: «Jehová kakamakgtayan». Chu xlakan kgalhtikgolh: «Jehová kasikulunatlawan».
5 Wa xlakata Boaz kgalhskilh tiku xkapulalin tiku xmakimakgolh tachanan: «Chu amacha tsumat, ¿tiku xfamilia?».
6 Tiku xkapulalin tiku xmakimakgolh tachanan kgalhtilh: «Uma tsumat xalak Moab tiku tamilh Noemí.
7 Xla kiwanilh: “Katlawa litlan, kakimaxki talakaskin naksaka tuku makgxtakgtilhamakgo tiku makimakgo tachanan”. Lata tsisa asta la uku chuntiya skujnit. Chu aku tawi xlakata najaxa puntsu anta niku skgekgnan».
8 Alistalh, Boaz wanilh Rut: «Kakgaxpatti, kintsumat. Ni kapit kʼatanu kapukuxtun. Unu katamakgxtakgti. Ni kakatamakgatlini laktsuman tiku kiskujnanikgo.
9 Kaʼakxilhti niku makimaka tachanan chu kakatapi. Kkalimapakgsinit lakgkgawasan pi ni kamakglhuwikgon. Akxni nakgalhputiya, kapit niku yakgolh xalu chu kawat chuchut nema namakutukgo lakgkgawasan».
10 Akxni kgaxmatli uma, tatsokgostalh chu takilhputalh, chu kgalhskilh: «¿Tuku xlakata tlan kilikatsiniya? ¿Tuku xlakata kililakgaputsaya maski xalak atanu kachikin akit?».
11 Boaz kgalhtilh: «Liwana kilitachuwinankanit tuku tlawanita xpalakata mimputiatse lata akxni nilh minchixku, chu pi makgxtakgti mintlat chu mintse chu taxtupi kminkachikin xlakata nalatapaya kʼakgtum kachikin nema ni xlakgapasa.
12 Jehová kaxokgonin tuku tlawanita. Jehová, xDios Israel, lu kasikulunatlawan, xlakata putsanita putatsekgni kxtampin xpakgen».*
13 Chu xla wanilh: «Kimalana, xaklakaskilh pi tlan xkiʼakxilhti, xlakata kimakgoxumixinita chu tlan kilimamakgkatsininita mintachuwin,* maski ni miskujni klitaxtu».
14 Chu akxni xʼamaka wayankan, Boaz wanilh: «Katiya kaxtalanchu chu kamachuwi* kvinagre». Wa xlakata Rut kapaxtutawi tiku xmakimakgolh tachanan. Boaz maxkilh xatachuchu talhtsi, chu xla wayalh asta akxni kgalhkgasli, chu asta akgataxtunilh.
15 Akxni xla tayalh xlakata chuntiya ksakli tuku xmakgxtakgtilhamaka, Boaz kalimapakgsilh kskujnin: «Kamaxkitit talakaskin kamaxtulh xatalhtsi cebada niku kapachinitantit* chu ni kamakglhuwitit.
16 Nachuna, chuna la kapachinitantit, kakamaxtutit makgapitsi chu kakamakgxtakgtit xlakata xla namaxtuni xatalhtsi. Chu ni kamachokgotit».
17 Chu xla chuntiya ksakma tuku xmakgxtakgtilhamakgo tiku xmakimakgo tachanan anta kkapukuxtun asta akxni kgotanulh. Akxni xmaxtukgonita xatalhtsi cebada, xmakgatsinit max akgkututu kilo.*
18 Alistalh tiyalh chu alh kkachikin, chu masiyanilh xputiatse tuku xmastokgnit. Nachuna maxtulh chu maxkilh liwat nema akgataxtunilh akxni xla wayalh chu kgalhkgasli.
19 Xputiatse kgalhskilh: «¿Niku kiskujti uku chu niku kisakti tuku xmakgxtakgtilhamakgolh tiku xmakimakgolh tachanan? Dios kasikulunatlawalh tiku limasiyanin talakgalhaman». Wa xlakata Rut litachuwinalh tiku taskujli. Xla wanilh: «Chixku tiku ktaskujli la uku wanikan Boaz».
20 Akxni Noemí kgaxmatli uma, wanilh: «Jehová, tiku kalimasiyaninit tapaxkit nema ni makgxtakgnan tiku lamakgolhku chu tiku nikgonita, kasikulunatlawalh». Chu wanipa: «Uma chixku kintalilakgapasnikan. Xla tlan nalakkaxtlawa kintaʼakglhuwitkan».*
21 Alistalh Rut tiku moabita xwanit chuntiya litachuwinalh: «Na kiwanilh: “Ni kakatamakgatlini kiskujnin asta akxni makikgonita nawan putum kintachanan”».
22 Chu Noemí wanilh xpuwiti:* «Chuna, kintsumat, tlakg tlan nakitaxtu komo nakatapina laktsuman tiku skujnanikgo. Chuna ni katimakglhuwikanti kʼatanu pukuxtu».
23 Wa xlakata Rut ni katamakgatlinilh laktsuman tiku kskujnanikgo Boaz chu chuntiya saktilhalh tuku xmakgxtakgtilhamakgolh tiku xmakimakgolh tachanan asta akxni makgalakgoka cebada chu trigo. Chu chuntiya talatamalh xputiatse.
Notas
^ Alakatanu wankan «xpekge».
^ Xaʼhebreo: «tachuwinanita kinaku».
^ Alakatanu wankan «kamakawi».
^ Max: «niku makxtum kawilikanit».
^ O: «Max akgtum efá». Kaʼakxilhti apén. B14.
^ O: «Xla chatum kintalilakgapasnikan tiku lakgchan nakinkalakgmaxtuyan». Kaʼakxilhti glosario, tiku nalakkaxtlawa kintaʼakglhuwitkan.
^ Alakatanu wankan «xpuwititsumat» o «xtaskin».
