Tito 2:1-15
2 Pero wix, chuntiya kalichuwinanti tuku makgtanu kxatlan tamasiy.*
2 Xlilat pi lakchixkuwin tiku linkgoya kata ni namalakatsalikgo tuku lismanikgo tlawakgo kxlatamatkan, lakatitum nalikatsikgo, nakgalhikgo tlan talakapastakni, tliwakga nakgalhikgo xtakanajlakan, lu napaxkinankgo chu chuntiya natayanikgo tuku tuwa.
3 Nachuna, xlilat pi lakpuskatin tiku linkgoya kata nakgalhikgo tayat nema nalimaxkikgo kakni Dios, ni nakalimawakakgo tuku nitlan amakgapitsin, ni namalakatsalikgo akxni nawakgo vino, makgalhtawakgenanin tiku masiyakgo tuku tlan,
4 xlakata tlan nakastakyawakgo* lakpuskatin tiku tlakg laktsumanku xlakata napaxkikgo xchixkukan chu xkamanankan,
5 xlakata nakgalhikgo tlan talakapastakni, lakskulunku nawankgo, liwana nakuentajtlawakgo xchikkan, tlan nalikatsikgo, nakgalhakgaxmatkgo xchixkukan, xlakata chuna ni lixkajni nalichuwinankan xtachuwin Dios.
6 Nachuna, chuntiya kakastakyawa tiku tlakg lakgkgawasanku xlakata nakgalhikgo tlan talakapastakni,
7 chu xatlan liʼakxilhtit kalitaxtu kxliputum tuku tlawaya kmilatamat. Kamasiya tuku xaxlikana chu xliputum minaku katlawa putum tuku tlawaya,
8 xatlan tachuwin* nalichuwinana xlakata ni lixkajni nalichuwinankana chu tiku lakatakinankgo natamamaxanikgo xlakata nila nakinkalimawakakgoyan tuku nitlan.*
9 Xlilat pi skujnin nakakgalhakgaxmatkgo xmalanakan* xliputum tuku nakalimapakgsikgokan, naliskujkgo xlakata nakamakgapaxuwakgo, ni nakatalakgalhtikgo,
10 ni nakamakgkgalhanankgo, wata kalimasiyakgolh pi tlan kalipawankan, xlakata xliputum tuku natlawakgo nalimaxkikan kakni xtamasiy kiLakgmaxtunakan Dios.
11 Xlakata Dios limasiyanit xtalakgalhaman nema ni anan xtachuna* chu tlan kalilakgmaxtukan putum latamanin.
12 Uma talakgalhaman kinkamasiyaniyan nalakgmakganaw tuku lakataki xtalakaskin Dios, tuku lu kgalhiputunkan nema nitlan xalak kakilhtamaku, nalimasiyayaw pi kgalhiyaw tlan talakapastakni chu xaʼakgstitum nalatamayaw chu naskujnaniyaw Dios kʼuma kakilhtamaku.*
13 Pero uku, chuntiya kakgalhkgalhiw kakgantaxtulh xatlan takgalhkgalhin chu akxni Dios Tiku kgalhi putum litliwakga chu kiLakgmaxtunakan Jesucristo nalimasiyakgo lilanka,
14 xla mastalh xlatamat kimpalakatakan, chuna kinkalakgmaxtun xlakata ni natlawayaw putum tuku nitlan chu kinkamaskulunkin xlakata nalitaxtuyaw akgtum kachikin nema kajwatiya xla tapakgsini, xlakata tlan natlawayaw tuku xatlan xliputum kinakujkan.
15 Xlakata kgalhiya putum limapakgsin xlakata chuna natlawaya, chuntiya kamasiya putum uma, kamatliwakglhnanti* chu kawanti tuku nitlan tlawamaka. Ni kamasta talakaskin pi wi tiku nalakgmakganan.
Notas
^ O: «ktamasiy nema makgtayanan».
^ O: «nakamasiyani».
^ O: «tachuwin nema makgtayanan».
^ O: «tuku lixkajni».
^ Alakatanu wankan «xpuchinakan».
^ O: «tlan kamamakgkatsininanti».
