Tito 3:1-15
3 Chuntiya kakamalakapastakni natalan pi kakakgalhakgaxmatkgolh mapakgsinanin chu napuxkun, tunkun katlawaputunkgolh putum tuku xatlan,
2 nitiku lixkajni kalichuwinankgolh, ni katalatlawanankgolh, liwana kalakapastaknankgolh,* ankgalhin kakalimasiyanikgolh putum latamanin pi kgalhikgo tsatata naku.
3 Xlakata makgasa, akinin na ni liwana xlakapastaknanaw, ni xkgalhakgaxmataw Dios, latamanin xkinkaʼakgskgawikgoyan, xtachuna xatachin xkinkalimaxtunitan tuku lu xtlawaputunaw chu xlipaxuwaputunaw, nitlan chuna la xlinaw kilatamatkan chu xlalakgkatsalakaniyaw, lu nitlan xlikatsiyaw chu ni xlaʼakxilhputunaw chatunu chatunu.
4 Pero Dios, tiku kiLakgmaxtunakan, limasiyalh pi kalakgalhaman chu kapaxki latamanin.
5 Xla kinkalakgmaxtun xlakata xalakgalhamana, ni wa xlakata tlawaw tuku xaʼakgstitum. Kinkalakgmaxtun akxni kinkamaskulunkin, uma kinkamaxkiparan latamat, chu akxni maklakaskilh xʼespíritu santo xlakata nakinkamasastiyan.
6 Xla limaklakaskilh Cristo Jesús, kiLakgmaxtunakan, xlakata nakinkamaxkiyan lhuwa espíritu.
7 Chuna tlawalh xlakata xkgalhkgalhiw namakglhtinanaw latamat nema ni kgalhi xlisputni, nema xla malaknunit. Tlan namakglhtinanaw xlakata kinkamaxkin xtalakgalhaman nema ni anan xtachuna,* chu uma tlawa pi xaʼakgstitum nakinkaʼakxilhan.
8 Umakgolh tachuwin tlan kalipawankan, chu klakaskin chuntiya liwana kalichuwinanti putum uma, xlakata tiku kanajlanikgonit Dios kajwatiya nalilakpuwankgo chuntiya natlawakgo tuku xatlan. Putum uma laktlan chu litamakgtayakgo latamanin.
9 Pero ni kamakgtanu xalaktonto takgalhchuwin chu ni kalakputsanani tuku tsokgwilika xpalakata xtukuwanikan xalakgmakgan natlatni,* ni kamakgtanu niku lalitalatlawamaka Limapakgsin. Uma nitu litaxtu chu ni makgtayanan.
10 Chu ama chixku tiku malakgatumi ni xaxlikana tamasiy, kalakgmakganti akxni xlimakgtum chu xlimakgtiy liwana stakyawanitata,*
11 xlakata wix katsiya pi uma chixku akgtsankgatayanit chu lakgalhinama chu xlakata xtayat xʼakstu liyawamaka pi tlawama tuku nitlan.
12 Akxni nakmalakgachaniyan Ártemas o Tíquico, lu fuerza katlawa nakilakgtana kNicópolis, xlakata klakkaxwilinit anta naktawila akxni lu lonkgnan.
13 Lu kaliskujti xlakata namakgtayaya Zenas, tiku lu lakgapasa Limapakgsin, chu Apolos xlakata nitu nakatsankgani ktiji.
14 Pero tiku kgalhikgo takanajla chuna la akinin na kakatsinikgolh chuntiya natlawakgo tuku tlan, xlakata namakgtayanankgo akxni lu natalakaskin, chu chuna natlawakgo laktlan tatlaw.
15 Putum tiku unu kintawilakgolh malakgachanikgoyan tamakgachipat. Kakamaxki kintamakgachipat tiku kgalhikgo takanajla chuna la akinin chu kinkapaxkikgoyan.
Dios kakamaxkin xtalakgalhaman nema ni anan xtachuna.*
Notas
^ O: «ni kataʼakglhuwikgolh».
^ Alakatanu wankan «natatani o natikun».
^ O: «makatsininitata».
