Dios xtapalh akxilha puskat

AKXNI Jesús xlama kKatiyatni liwana limasiyalh la likatsi xTlat xalak akgapun chu tuku tayat kgalhi. Xla wa: «Nitu ktlawa kaj xlakata kintapuwan; wa tuku klichuwinan putum uma chuna la xaTlat kimasiyaninit». Chu wampa: «Akit putum kilhtamaku ktlawa tuku makgapaxuwa» (Juan 8:28, 29; Colosenses 1:15). Wa xlakata, komo katsiputunaw tuku lakpuwan Dios xpalakata lakpuskatin chu la lakaskin nakalikatsinikan, talakaskin nalakputsananiyaw tuku Jesús tlawalh.

Lhuwa tiku lakputsananikgo Evangelios wankgo pi chuna la Jesús kalikatsinilh lakpuskatin, nipara tsinu xtachuna la xkalikatsinikan ama kilhtamaku. ¿Tuku wamputun uma? Chu tuku tlakg xlakaskinka, ¿tlan nakamakgtaya lakpuskatin xala uku tuku Jesús masiyalh?

¿La kalikatsinilh Jesús lakpuskatin?

◼ Jesús ni xkalakpuwani tuku nitlan lakpuskatin. Lhuwa xpulalinanin takanajla xlakpuwankgo pi maski kaj tsinu xkatalakatsuwinikgolh lakpuskatin xʼamaka kamatlawikan talakgxtumit. Xlakpuwankgo pi lakpuskatin la akgtum liʼakgsiyat xlitaxtukgo. Wa xlakata ni xkamaxkikgo talakaskin nakatachuwinankgo lakchixkuwin kxlakatinkan amakgapitsin chu xlitaʼakgtlapatkan xwanit akxni xtaxtukgolh. Pero Jesús nikxni masiyalh pi lakpuskatin nila akxtum xkatalakgo amakgapitsin. Wata masiyalh pi lakchixkuwin xlimachokgotkan xwanit tuku nitlan xtlawaputunkgo chu xlimaxkitkan kakni lakpuskatin (Mateo 5:28).

Atanu kilhtamaku wa: «Komo chatum chixku lakxtlawa xtamakgaxtokgat chu tatamakgaxtokga atanu puskat, akgskgawima tiku pulana xtamakgaxtokga» (Marcos 10:11, 12). Jesús nichuna xlakpuwan la makgalhtawakgenanin nema xmasiyakgo pi lakchixkuwin tlan «kaj katuwa» tuku xlilakxtlawakgolh xtamakgaxtokgatkan (Mateo 19:3, 9). Lhuwa judíos ni liwana xʼakgatekgskgo tuku xkilhchanima laʼakgskgawikan ktamakgaxtokgat. Xlakpuwankgo pi chatum chixku nitu xʼakgskgawima xpuskat maski xtatalakgxtumilh atanu puskat. Makgalhtawakgenanin xwankgo pi kajwatiya lakpuskatin xtlawakgo talakgxtumit nema ni xlitatlawat, pero lakchixkuwin nikxni chuna xtlawakgo. Chatum tiku lakputsanani Biblia wan pi «akxni Jesús lichuwinalh pi xachixku chu xapuskat watiya limapakgsin xlimakgantaxtitkan, limasiyalh pi puskat na lhuwa xtapalh xwanit».

¿La litamakgtayakgo lakpuskatin xala uku? Kcongregaciones xla xtatayananin Jehová, lakpuskatin tlan katalalinkgo lakchixkuwin chu katsikgo pi umakgolh lakchixkuwin ni katikalakpuwanikgolh tuku nitlan chu na ni katimalakatsalikgolh la katalalinkgo. Lakchixkuwin tiku kstalaninanin Cristo, liskujkgo xlakata nakalikatsinikgo “lakpuskatin tiku linkgoya kata chuna la xtsekan, chu tiku laktsumanku chuna la xnatalankan chu ni kalakpuwanikgo tuku nitlan” (1 Timoteo 5:2).

◼ Jesús limaxtulh kilhtamaku xlakata nakamasiyani. Makgalhtawakgenanin xala ama kilhtamaku xwankgo pi lakpuskatin ni xlikatsitkan xwanit tuku lakchixkuwin xkatsikgo. Pero Jesús limaxtulh kilhtamaku xlakata nakamasiyani tuku xaxlikana chu xkawani pi xwankgolh tuku xlakpuwankgo. Nachuna, Jesús ni xlakpuwan pi puskat kajwatiya xliskujat xwanit kcocina. Chuna limasiyalh akxni maxkilh talakaskin María pi xkgaxmatli tuku xla xmasiya (Lucas 10:38-42). Chu tuku Marta likgalhtilh Jesús akxni Lázaro xninita, limasiya pi xla na litamakgtayalh tuku Jesús xmasiya (Juan 11:21-27).

Jesús xkamasiyaniputun lakpuskatin. Lhuwa judías xalak xkilhtamaku lu xlakaskinka xliʼakxilhkgo nakgalhikgo chatum kgawasa tiku xlakaskinka xlitaxtulh, tlakg tlan komo palakachuwina xlitaxtulh. Wa xlakata, akxni chatum puskat wanilh: «Paxuwa ama puskat tiku lin kxpan». Xla maklakaskilh uma xlakata namasiyani pi tlakg xlakaskinka xwanit nakgalhakgaxmatkan Dios (Lucas 11:27, 28). Chuna limasiyalh pi lakpuskatin tlan natlawakgo atanu tlakg xlakaskinka taskujut nixawa tuku xtalismaninkan judíos xkamatlawikgo (Juan 8:32).

¿La litamakgtayakgo lakpuskatin xala uku? Tiku masiyakgo kcongregación xla kstalaninanin Cristo, lu xtapalh liʼakxilhkgo xtakgalhtinkan lakpuskatin. Xlakan kamaxkikgo kakni lakpuskatin tiku tliwakga kgalhikgo xtakanajlakan chu tlawakgo «tuku tlan» akxni xʼakstukan wilakgo chu na kawilinikgo tlan liʼakxilhtit amakgapitsin (Tito 2:3). Umakgolh lakpuskatin na makglichuwinankgo xatlan tamakatsinin xla xTamapakgsin Dios (Salmo 68:11; kaʼakxilhti recuadro kpágina 9,  «¿Ni xlakaskin apóstol Pablo pi lakpuskatin xchuwinankgolh?»).

◼ Jesús xtapalh xkaʼakxilha lakpuskatin. Akxni tsokgka Biblia, tlakg xlakaskinka xkaʼakxilhkan kamanan lakgkgawasan. Talmud wan: «Paxuwa tiku kgalhi lakgkgawasan, chu kgoxota tiku kgalhi laktsuman». Makgapitsin natlatni la akgtum takuka xliʼakxilhkgo akxni xkgalhikgo chatum tsumat: xtalakaskin xputsanikgolh tiku xtatamakgaxtokglhli chu xlixokgonitkan xwanit, chu max ni xʼama kakuentajtlawa akxni xlakan xkgolonkgolh.

Pero Jesús lakxtum xtapalh xʼakxilha xlatamat chatum aktsu tsumat chu xlatamat chatum aktsu kgawasa. Chuna limasiyalh akxni malakastakwanilh xkgawasa chatum puskat xalak Naín chu malakastakwanilh xtsumat Jairo (Marcos 5:35, 41, 42; Lucas 7:11-15). Atanu kilhtamaku mapaksalh chatum puskat nema «akgkutsayan kata xmakgatatatlanit demonio». Asta wa pi uma puskat «xalak xfamilia Abrahán» xwanit, akgtum tachuwin nema ni xmaklakaskinkgo judíos chu ni tatsokgtawilanit kxtatsokgnikan (Lucas 13:10-16). Akxni Jesús chuna wa, limasiyalh pi lakpuskatin tlan akxtum xkatalakgolh amakgapitsin chu na limasiyalh pi xkamaxki kakni xlakata tliwakga xkgalhikgo xtakanajlakan (Lucas 19:9; Gálatas 3:7).

¿La litamakgtayakgo lakpuskatin xala uku? Akgtum talakpuwan xalak Asia wan pi tiku makgastaka chatum tsumat xtachuna la kuentajtlawanima xjardín xtalakatsu. Pero chatum tlat tiku kstalanina Cristo, nichuna lakpuwan. Wata liwana kakuentajtlawa xkamanan, lakgkgawasan o laktsuman, kamalakgacha kʼescuela chu kamakuchininan akxni tatatlakgo.

◼ Jesús xkalipawan lakpuskatin. Ktribunales judíos, tuku xlichuwinan chatum puskat xtachuna la tuku xwan chatum skujni chu ni xlakaskinka xliʼakxilhkan. Josefo, historiador xalak siglo I xwan: «Nitu litaxtu tuku lichuwinankgo lakpuskatin, xlakata ni xlikana tuku wankgo chu ankgalhin akglakgwa chuwinankgo».

¡Jesús nichuna xlakpuwan! Xla kalaksakli lakpuskatin xlakata xmakatsininankgolh pi xlakastakwananita (Mateo 28:1, 8-10). Kaks malakawaninan pi asta apóstoles tuwa xmakgkatsikgo nakakanajlanikgo umakgolh lakpuskatin, maski umakgolh lakpuskatin na xʼakxilhkgonit akxni makgnika chu maknuka Jesús (Mateo 27:55, 56, 61; Lucas 24:10, 11). Pero akxni Jesús kalaksakli lakpuskatin xlakata wa pulana xlichuwinankgolh xtalakastakwanat, limasiyalh pi xlipawan pi umakgolh lakpuskatin tlan xʼamakgo palakachuwinankgo chuna la xtlawalh chatum chixku (Hechos 1:8, 14).

¿La litamakgtayakgo lakpuskatin xala uku? Lakchixkuwin tiku wi tuku lakgayakgo kcongregación, limasiyakgo pi kamaxkikgo kakni lakpuskatin akxni kuentajtlawakgo tuku wankgo. Chu lakchixkuwin tiku makgaxtokgkgo, limasiyakgo pi kamaxkikgo kakni xpuskatkan akxni kaks kakgaxmatnikgo (1 Pedro 3:7; Génesis 21:12).

Tastakyaw xalak Biblia kamakgapaxuwa lakpuskatin

Tiku stalanikgo xliʼakxilhtit Cristo ni xafuerza kamatlawikgo lakpuskatin tuku xlakan lakgatikgo, wata kamaxkikgo kakni chuna la Dios xlakaskin lata akxni kamalakatsukilh (Génesis 1:27, 28). Lakchixkuwin tiku makgaxtokgkgo chu kstalaninanin Cristo litaxtukgo, ni lakpuwankgo pi lakpuskatin ni xlakaskinka litaxtukgo. Wata stalanikgo xtastakyaw Biblia nema makgtayanan pi xpuskatkan napaxuwakgo (Efesios 5:28, 29).

Akxni Yelena tsukulh likgalhtawakga Biblia, xchixku lu nitlan xlikatsini chu uma lu xmakgalipuwan. Xchixku kstaknit niku xtalismani nakakgalhankan laktsuman chu xkakgaxikan lakpuskatin. Yelena wan: «Biblia kimaxkilh litliwakga. Kkatsinilh pi xwi chatum Dios tiku xlikana xkimpaxki, xlakaskinka xkiʼakxilha chu xkililakgaputsa. Kakxilhli pi kinchixku na tlan xtalakgpalilh komo xlikgalhtawakgalh Biblia». Titaxtulh kilhtamaku, kgantaxtulh tuku xlakaskin Yelena akxni xchixku tamunulh chu chatum xtatayana Jehová litaxtulh. Yelena wan: «Kinchixku katsinilh namalakgachokgo tuku xtlawaputun chu kinkawilinin akgtum tlan liʼakxilhtit. Chu kinchatiykan kliskujwi xlakata naklatapatiyaw». Xla wampara: «Xtastakyaw Biblia kimakgtayanit nakmakgkatsi pi kkintamakgaxtokgat kimpaxkikan chu kinkuentajtlawakan» (Colosenses 3:13, 18, 19).

Ni kajwatiya Yelena chuna makgkatsi. Anan lhuwa lakpuskatin tiku paxuwakgo, xlakata xlakan chu xchixkukan, lu liskujkgo nalilatamakgo kxtamakgaxtokgatkan xtastakyaw Biblia. Nachuna, kcongregación kamaxkikan kakni, tlan kamamakgkatsinikan chu ni xafuerza wi tuku kamatlawikan (Juan 13:34, 35).

Putum kstalaninanin Cristo, lata lakchixkuwin chu lakpuskatin, katsikgo pi makglakgalhinanin chu «nitu litaxtukgo». Pero katsikgo pi komo natalakatsuwinikgo xapaxkina xDioskan chu xTlatkan, Jehová, nialh kskujni katilitaxtunikgolh «talakgalhin chu linin» chu xatapaxuwan «xkamanan Dios nalitaxtukgo, xlakata nakgalhikgo lakgtaxtut nema kgalhi kakni». ¡Lu tlan tuku kgalhkgalhimakgo lakchixkuwin chu lakpuskatin tiku tapakgsinikgo xapaxkina Dios! (Romanos 8:20, 21).

[Recuadro]

 ¿Ni xlakaskin apóstol Pablo pi lakpuskatin xchuwinankgolh?

Apóstol Pablo wa pi “lakpuskatin kgalhtsekg xtawilakgolh kcongregaciones” (1 Corintios 14:34). ¿Tuku xwamputun? ¿Xlakpuwan pi lakpuskatin ni lakgskgalalan xwankgonit chu wa xlakata nila xmasiyakgo? Nichuna, Pablo lu tlan lichuwinalh taskujut nema xtlawakgo lakpuskatin (2 Timoteo 1:5; Tito 2:3-5). Kmaktum carta nema Pablo kamalakgachanilh corintios, ni kajwatiya kastakyawalh lakpuskatin, wata na kastakyawalh tiku xchuwinankgo kʼatanu tachuwin chu palakachuwinanin pi kaks xtawilakgolh akxni achatum kstalanina Cristo xchuwinama (1 Corintios 14:26-30, 33). * Xlakata lu xlakgatikgo tuku xkatsinimakgo, max makgapitsi lakpuskatin xmakgtanukgo akxni xchuwinama tiku xʼakgchuwinama xlakata xtlawakgolh takgalhskinin, chuna la xtalismaninit kʼumakgolh kachikinin. Wa xlakata, Pablo kawanilh pi “xkakgalhskinkgolh xchixkukan kxchikkan” xlakata xʼanalh takaksni kcongregación (1 Corintios 14:35).

[Nota]

[Dibujo]

[Dibujo]

Jesús laksakli María Magdalena xlakata xkamakatsinilh apóstoles pi xla xlakastakwananita

[Dibujo]

Tiku makgantaxtikgo xtastakyaw Biblia, kamaxkikgo kakni lakpuskatin chu tlan kalikatsinikgo