KAʼAKXILHTI aktsu kgawasa tiku katachuwinama lakchixkuwin tiku linkgoya kata. Xlakan makgalhtawakgananin kxtemplo Dios anta kJerusalén. Chu uma kgawasa wa Jesús. Ay lankata. La uku kgalhiy akgkutiy kata.

Makgalhtawakgananin nila makanajlakgoy xlakata Jesús lhuwa katsi xlakata Dios chu tuku tatsokgtawilanit kBiblia. Pero, ¿tuku xlakata na ni anta unu wilakgolh José chu María? ¿Niku wilakgolh? Kaʼakxilhwi.

Kata kata, José kalin kJerusalén xfamilia xlakata nawayankgoy nema nalilakapastakkgoy akxni li Israel taxtukgolh kʼEgipto, uma taway xwanikan Pascua. Nazaret asta Jerusalén makgat xwanit. Niti xkgalhi putlaw nipara aviones. Tama kilhtamaku ninajtu xʼanankgoy putlaw nipara aviones. Atsinu ni putum kristianos kaj xtlawankgoy, chu José chu xfamilia max akgtutu kilhtamaku xtlawankgoy xlakata nachankgoy kJerusalén.

La uku José ay chalhuwa kgalhi xlakkamanan. Wa xlakata José xlikuentajtlawat xnatalan Jesús nema tlakg xalaktsina. Uma kata, José, María chu xlakkamanan katataspitmaparakgolh kNazaret. Lakpuwankgoy pi Jesús katamima amakgapitsi kristianos. Pero akxni xkgotanunita putsakgolh chu ni tekgskgolh. ¡Putsakgoy anta niku xwilakgolh xparientes chu xʼamigos pero ni anta xwi! Wa xlakata taspitparakgoy kJerusalén xlakata anta naputsakgoy.

Chu anta tekgskgolh. Kakgaxmatnima makgalhtawakgananin chu katlawanima takgalhskinin. Putum kristianos nila makanajlakgoy xlakata lu skgalala. Pero María waniy: Kinkgawasa, ¿tuku xlakata chuna tlawa? Mintlat chu akit snun klilakgaputsaw chu kkaputsaman.

Jesús kgalhtinalh: ¿Tuku xlakata kimputsapatit? ¿Nixkatsiyatit pi kilitawilat anta kxchik kinTlat?

Xlikana, Jesús xlakgatiy tawila anta niku tlakg nakatsini xlakata Dios. Akinin nachuna kilitlawatkan, ¿nixlilakana? Anta kNazaret, Jesús xʼan ktamakxtumit kgatunu semana niku xkakninanikan Dios. Xlakata kuenta xtlaway, katsinilh lhuwa tuku lichuwinan Biblia. Nachuna katlawaw chuna la tlawalh Jesús.