¿PI KATSIYA wix tiku uma aktsu skgata? Wa uma aktsu skgata, wa Jesús. Kajku lakachilh anta unu niku katamaknukan burros chu wakax. María mamima Jesús anta unu niku kawilinikan xtaway burros chu wakax. Pero, ¿tuku xlakata María chu José anta unu wilakgolh niku tanumakgolh burros chu wakax? Unu niku wilakgolh lu nitlan kawan xlakata anta nalakachin aktsu skgata, ¿nixlikana?

Chuna xla, nitlan kawan. Pero José chu María anta unu wilakgolh xlakata: Chixku tiku mapakgsinan kRoma, Augusto César wililh akgtum limapakgsin pi putum kristianos naʼankgoy tatsokgtawilakgoy kkachikin anta niku lakachinkgolh. José lakachilh anta kBelén. Pero akxni José chu María chankgolh, nialh tekgskgolh niku nalhtatakgoy. Wa xlakata minkgolh anta niku xwilakgolh burros chu wakax. ¡Chu akxni tama kilhtamaku María kgalhilh aktsu skgata wa Jesús! Pero chuna la akxilhmaw lu tlan wi aktsu skgata.

¿Akxilhpat xkuentajtlawananin borrego mimakgolh akxilhkgoy Jesús? Xlakan anta xlamakgolh kkakiwin katsisni chu akgtum xkgakganat kamakgskgonilh anta niku xwilakgolh. ¡Chatum ángel xwanit! Xkuentajtlawananin borregos snun pekuankgolh. Pero uma ángel kawanilh: ¡Ni kapekuantit! Kkaliminiman xatlan tamakatsin. Uku anta kBelén, lakachilh Cristo Kimalanakan. ¡Wa nalakgmaxtuy kachikin! Litamakgswitnit lhakgat chu mamikanit anta niku kamawikan burros chu wakax. Xalan lhuwa ángeles minkgolh chu tsukukgolh malankikgoy Dios. Lakapara xkuentajtlawananin borrego ankgolh putsakgoy Jesús, chu uku tekgskgolha.

¿Katsiya wix tuku xlakata ni anan achatum la Jesús? ¿Katsiya tiku uma aktsu skgata? Kalakapastakti, kxapulana takgalhtawakga nema akxilhwi anta unu klibro lichuwinaw xKgawasa Dios. Xla taskujli Jehová xlakata natlawakan akgapun chu Katiyatni chu putum amakgapitsi tuku anan. Wa tama tiku taskujli Dios, ¡wa uma Jesús!

Chuna, Jehová tiyacha xlatamat xKgawasa anta kʼakgapun chu wililh anta kxpulakni María. Chu tsukulh staka anta kxpulakni María chuna la amakgapitsi lakgskgatan stakkgoy anta kxpulakni xtsekan. Pero uma aktsu skgata wa xKgawasa Dios. Akxni takgatsilh kilhtamaku lakachilh anta kBelén unu niku katamaknukan burros chu wakax. ¿Akxilhpat chu tuku xlakata lu lipaxuwakgolh ángeles akxni kawanikgolh kristianos pi Jesús lakachilh?