BIBLIA KALAKGPALINILH XLATAMATKAN

¿TUKU xlakata chatum chixku tiku chalhuwa lakpuskatin xkgalhi chu ni xkaʼakxilhputun xtatayananin Jehová, chatum xtatayana Jehová litaxtulh? ¿Tuku tlawalh pi chatum pastor pentecostés xlakgpalilh xtakanajla? ¿Tuku makgtayalh chatum puskat nialh xʼakstu nalakgmakgankan chu xtalakatsuwinilh Dios? ¿Tuku xlakata chatum chixku tiku lu xlakgati heavy metal kskujni Dios litaxtulh? Kaʼakxilhti xatakgalhtin.

«La uku tlakg tlan klikatsit» (RIGOBERT HOUETO)

KATA AKXNI LAKACHILH: 1941

PAÍS: BENÍN

TUKU XTLAWA: CHALHUWA LAKPUSKATIN XKGALHI CHU NI XKAʼAKXILHPUTUN XTATAYANANIN JEHOVÁ

LA XAKLAMA: Klakachilh kCotonou, akgtum lanka kachikin xalak Benín. Kimakgastakka la chatum católico, pero ni lu xakan kmisa. Lhuwa católicos chalhuwa lakpuskatin xkgalhikgo, xlakata amacha kilhtamaku limapakgsin xmasta talakaskin. Akit na kgalhtati lakpuskatin xakkgalhi.

Kkata 1970 tsukulh revolución anta kBenín. Xlakata xaklakpuwan pi uma xʼama makgtayan kkimpaís kmakgtanulh kʼuma tatalachipat chu kpolítica. Revolucionarios ni xkaʼakxilhputunkgo xtatayananin Jehová xlakata xlakan ni xmakgtanukgo ktatalachipat chu kpolítica. Akit kmakgtayanalh nakaputsastalanikan. Akxni katamakxtuka xmisioneroskan kpaís kkata 1976, klakpuwa pi nikxni xʼamakgo taspitkgo.

BIBLIA LAKGPALILH KILATAMAT: Revolución sputli kkata 1990, chu kaks klilakawa pi misioneros xtatayananin Jehová taspitparakgolh. Ktsukulh lakpuwan pi max Dios xkamakgtayama. Ama kilhtamaku klakgpalilh kintaskujut. Chatum tiku xaktaskuja xtatayana Jehová xlitaxtu chu kilitachuwinalh xtakanajla. Kilikgalhtawakganilh textos xalak Biblia niku wan pi Jehová chatum Dios tiku lakgati tuku xaʼakgstitum chu paxkinan (Deuteronomio 32:4; 1 Juan 4:8). Lu klakgatilh umakgolh tayat, chu xlakata tlakg xakkatsiputun tsukuka kilimakgalhtawakgekan Biblia.

Tunkun ktsukulh kan xtamakxtumitkan xtatayananin Jehová chu kaks kimalakawanilh tapaxkit nema xlalimasiyani: ni xlalaksakpaxki maski xkgalhikgo o ni xkgalhikgo tumin chu maski tanu tanu xkilhtsukutkan. Akxni tlakg xakkalakgapasa, tlakg liwana xakakxilha pi xaxlikana kstalaninanin Jesús xlitaxtukgo (Juan 13:35).

Kʼakgatekgsli pi komo xakskujnaniputun Jehová, xtalakaskin xakmakgxtakglhli pusikulan. Tuwa kmakgkatsilh, xlakata xaklilakgaputsa tuku xʼamakgo wankgo latamanin. Maski lhuwa kilhtamaku titaxtulh, Jehová kimakgtayalh nialh nakpekuan chu kmakgxtakglhli pusikulan.

Pero xwijku tuku kilitlawat xwanit. Anta kBiblia kkatsinilh pi Dios ni lakgati pi chatum chixku nakgalhi chalhuwa lakpuskatin (Génesis 2:18-24; Mateo 19:4-6). Xla kajwatiya tlan xakxilha xapulana kintamakgaxtokgat, wa xlakata kregistrarlilh. Amakgapitsi kilakpuskatin kkawanilh pi xʼankgolh, pero chuntiya xakkamaxki tumin xlakata xkgalhikgolh tuku xmaklakaskinkgo. Alistalh, chatiy tiku kilakpuskatin xwankgonit xtatayananin Jehová litaxtukgolh.

TUKU TLAN KINKITAXTUNINIT: Maski kimpuskat chuntiya católica litaxtu, ni lisitsi pi akit kskujnani Jehová, chu asta xla na kiwani pi la uku tlakg tlan klikatsi.

Makgasa xaklakpuwan pi política xʼama makgtayanan xlakata tlakg tlan xtawi kinkachikin, pero nichuna lalh. La uku kkatsi pi kajwatiya xTamapakgsin Dios tlan nalakkaxtlawa taʼakglhuwit nema anan kkakilhtamaku (Mateo 6:9, 10). Kpaxtikatsini Jehová xlakata kimasiyanilh la xatapaxuwan naklatama.

«Tuwa kmakgkatsilh naklakgpali kilatamat» (ALEX LEMOS SILVA)

KATA AKXNI LAKACHILH: 1977

PAÍS: BRASIL

TUKU XTLAWA: PASTOR PENTECOSTÉS XLITAXTU

LA XAKLAMA: Kstakli klanka kachikin Itu, nema tapakgsi kSão Paulo, chu lu lilakgapaskan xlakata lhuwa lamakgo tiku nitlan likatsikgo.

Xaktlawa talakgxtumit xalimaxana, lu xaluku xakwanit chu xaksta droga. Pero kakxilhli pi chuna la xaklima kilatamat xʼama tlawa pi xkintamaknuka kpulachin o xkimakgnika, wa xlakata kmakgxtakglhli putum tuku xaktlawa. Ama kilhtamaku ktsukulh katatamakxtumi pentecostés chu alistalh pastor klitaxtulh.

Xaklakpuwan pi tlan xakmaklakaskilh uma takanajla o religión xlakata xakkamakgtayalh latamanin, chu wa xlakata ktsukulh klichuwinan kradio tuku xla takanajla chu uma tlawalh pi lhuwa tiku xkilakgapaskgolh. Pero tsinu tsinu kakxilhli pi uma takanajla ni xkalilakgaputsa tiku xtapakgsinikgo chu na nipara tsinu xlilakgaputsakgo namalankikgo Dios. Tuku tlakg xlakaskinka xliʼakxilhkgo wa pi namastokgkgo tumin. Wa xlakata kmakgxtakgli uma takanajla.

BIBLIA LAKGPALILH KILATAMAT: Akxni xtatayananin Jehová tsukukgolh kilimakgalhtawakgekgo Biblia, kakxilhli pi ni xtachuna xwankgonit la amakgapitsi takanajla. Pulaktiy tuku lu kaks kimalakawanilh. Pulana, ni kajwatiya lichuwinankgo pi paxkikgo Dios chu xtalatamankan, wata limasiyakgo, chu xlipulaktiy, wa pi ni makgtanukgo kpolítica chu nipara kʼguerra (Isaías 2:4). Wa uma tuku kimakgtayalh nakkanajla pi xaktekgsnit xaxlikana takanajla: xatitsu tiji nema linan klatamat (Mateo 7:13, 14).

Kʼakgatekgsli pi xtalakaskin lhuwa tuku xaklakgpalilh xlakata tlan xakmakgapaxuwalh Dios. Akgtum liʼakxilhtit, xtalakaskin tlakg xaktaktujulh chu tlakg xaklimaxtulh kilhtamaku akxtum nakkatatawila kifamilia. Tuwa kmakgkatsilh naklakgpali kilatamat, pero Jehová kimakgtayalh. Kimpuskat wa tiku pulana tsukulh kgalhtawakga chu lu lipaxuwalh akxni akxilhli pi xaklakgpalima kilatamat chu wa xlakata tlakg lakapala tsukulh matliwakglha xtakanajla. Ni makgas titaxtulh, klakpuwaw pi xtatayananin Jehová xakamaw litaxtuyaw. Asta watiya kilhtamaku ktamunuw.

TUKU TLAN KINKITAXTUNINIT: Kimpuskat chu akit xatapaxuwan kkamakgtayamaw kgalhtutu kinkamanankan xlakata tlan natalalinkgo Jehová. Kifamilia xatapaxuwan wi. Kpaxtikatsini Dios pi kimasiyanilh tuku xaxlikana wi kxTachuwin. Biblia lakgpali xlatamatkan latamanin chu kiliʼakxilhtit liwana masiya pi chuna.

«La uku kpaxuwa, kkgalhi takaksni chu xaskulunku klin kilatamat» (VICTORIA TONG)

KATA AKXNI LAKACHILH: 1957

PAÍS: AUSTRALIA

ATANU: NI XPAXUWA AKXNI STAKLI

LA XAKLAMA: Akit xapulana xlikgalhtujun kinatalan chu kstakli Newcastle (Nueva Gales del Sur). Kintlat lu xaluku chu xakgotni xwanit. Kintse na xaluku xwanit, nitlan xkilikatsini chu xkiwani laklixkajni tachuwin. Chali chali xkiwani pi nitlan xaklikatsi chu pi xakama patinan kpupatin. Akxni chuna xkiwani lu xkimakgapekuan.

Ni xmakgasni, kintse xkiwilini chu xkimasipani, uma xtlawa pi nila xakalh kʼescuela. Akxni xakkgalhi 11 kata, mapakgsinanin nialh kamaxkikgolh talakaskin kinatlatni nakinkuentajtlawakgo chu wa tsukukgolh akxilhkgo niku xaktawilalh. Alistalh kimalakgachakgolh kʼakgtum convento chu ktsalalh akxni kmakgatsilh 14 kata. Xlakata nialh xaktaspitputun kkinchik, ktsukulh latama ktiji xla Kings Cross (nema tapakgsini Sydney) chu uma katijin xtachuna kinchik litaxtulh.

Akxni xaklama kkatijin, ktsukulh wa drogas, kuchu, ktsukulh akxilha pornografía chu ktsukulh sta kimakni. Akgtum kilhtamaku lu kpekualh. Xaktamakgxtakga kxchik chatum xmalana akgtum club nocturno, akgtum tsisni lakgapaxialhnankgolh chatiy lakchixkuwin. Xla kiwanilh pi xaktanulh kcuarto, pero maski chuna, kkgaxmatli tuku xlichuwinamakgo. Xlakpuwama pi xʼama kista, chu umakgolh chatiy lakchixkuwin xkimawakakgolh kʼakgtum barco nema xʼama kJapón xlakata xakskujli kʼakgtum bar. Xlakata lu xakpekuanit, kkgostaxtulh kventana chu kalh putsa tamakgtay.

Ktatanokglhli chatum chixku tiku xpaxialhnama kkachikin chu kwanilh tuku xaktitaxtuma chu xakkgalhkgalhima pi xkimaxkilh tumin. Pero ni kimaxkilh, wata kiwanilh pi xakalh niku xtamakgxtakgma xlakata xakpaxli chu xakwayalh. Putum uma tlawalh pi anta xaktamakgxtakglhli chu alistalh ktamakgaxtokgwi.

BIBLIA LAKGPALILH KILATAMAT: Akxni xtatayananin Jehová tsukukgolh kilimakgalhtawakgekgo Biblia, lhuwa tuku ktsukulh akgatekgsa. Lu nitlan klimakgkatsilh akxni kkatsilh pi Satanás wa xkuenta tuku nitlan lama; lata kstakli xkimasiyanikanit pi wa Dios tiku kinkamakgapatinanan. Pero nachuna, tlan kmakgkatsilh akxni kkatsilh pi Dios ni kamakgapatinan latamanin kpupatin, akgtum tamasiy nema lu xkimakgapekuan lata akxni aktsujku xakwanit.

Kaks klilakawa pi xtatayananin Jehová lilatamakgo xtastakyaw Biblia. Akit nitlan tayat xakkgalhi, pero maski xakwan o xaktlawa tuku nitlan, xlakan tlan xkilikatsinikgo chu xkilimasiyanikgo kakni.

Tuku tlakg tuwa kmakgkatsilh wa pi xaklakpuwan pi nitu xaklitaxtu chu kiʼakstu lu xkisitsinikan. Maski lhuwata kilhtamaku xtitaxtunit la xaktamununit la xtatayana Jehová, chuntiyaku chuna xakmakgkatsi. Akit xakpaxki Dios, pero xaklakpuwan pi xla nikxni xʼama paxki chatum lataman la akit.

Akgkukitsis kata alistalh akxni xaktamununita, uma tuku xaklakpuwan talakgpalilh. Kʼakgtum taʼakgchuwin nema mastaka kpukgalhtawakga xla xtatayananin Jehová, tiku xʼakgchuwinama lichuwinalh tuku wan Santiago 1:23 chu 24. Umakgolh versículos tamalakxtumi xTachuwin Dios la akgtum espejo nema kinkamakgtayayan nakinkaʼakxilhkanan chuna la kinkaʼakxilhan Jehová. Ktsukulh lilakpuwan komo nachuna xkiʼakxilhkan chuna la xkiʼakxilha Jehová. Pulana ni xakkanajla uma, xlakata xaklakpuwan pi ni xkilakgchan xtapaxkit.

Makgapitsi kilhtamaku alistalh klikgalhtawakgalh akgtum texto nema lakgpalilh kilatamat. Wa Isaías 1:18, anta kinkawaniyan tuku wan Jehová: «Katantit, chu kalakkaxtlawaw taʼakglhuwit [...]. Maski mintalakgalhinkan lu tsutsokgo xwa, xasnapapa nawan xtachuna la miki». Kmakgkatsilh pi Jehová akit xkintachuwinama chu xkiwanima: «Katat Vicky, kalakkaxtlawaw taʼakglhuwit. Klakgapasan, klakgapasa mintalakgalhin, klakgapasa minaku, pero maski chuna, kpaxkiyan».

Uma tsisni nila klhtatalh. Chuntiyaku xaklakpuwan pi Dios ni xkimpaxki, pero ktsukulh lilakpuwan xtamakamastan Jesús. Uma kilhtamaku kʼakgatekgsli pi Jehová xkilimasiyaninit pi lu xakgalhkgalhina chu pulaklhuwa la xkilimasiyaninit xtapaxkit. Pulana, xtachuna komo xakwanima: «Mintapaxkit ni kilakgchan. Xtamakamastan minKgawasa nila xapa kintalakgalhin». Xaklakgmakgama talakgmaxtut. Pero akxni ktsukulh lilakpuwan uma xtamaskiwin Jehová, kʼakgatekgsli pi xla lu xkimpaxki.

TUKU TLAN KINKITAXTUNINIT: La uku kpaxuwa, kkgalhi takaksni chu xaskulunku klin kilatamat. Kintamakgaxtokgat tlakg tlan wi, chu klipaxuwa pi tuku ktitaxtulh tlan nakamakgtaya amakgapitsin. Chuna la titaxtutilha kilhtamaku tlakg tlan ktalalin Jehová.

«Dios kgalhtilh kiʼoración» (SERGEY BOTANKIN)

KATA AKXNI LAKACHILH: 1974

PAÍS: RUSIA

ATANU: LU XLAKGATI HEAVY METAL

LA XAKLAMA: Klakachilh kʼakgtum familia nema ni xkgalhikgo tumin chu xlamakgo kVótkinsk, watiya kachikin niku lakachilh compositor Piotr Ilič Chaikovski. Kintlat tlan xlikatsi, pero lu xakgotni xwanit, wa xlakata ankgalhin xʼanan taʼakglhuwit kkinchik.

Akit ni xaklakgati xakkgalhtawakga chu chuna la titaxtulh kilhtamaku ktsukulh makgkatsi pi nila xaktlawa tuku xtlawakgo amakgapitsin. Lu xamaxana kwa chu xakkasitsini putum latamanin, chu lu tuwa xakmakgkatsi nakan kʼescuela. Akgtum liʼakxilhtit, akxni xkiwanikan pi wi tuku xaklichuwinalh kxlakatin kincompañeros, nila xaklichuwinan maski ni tuwa xwanit chu maski atanu kilhtamaku tlan chuna xaktlawanit. Makgtum, akxni xakan ksecundaria chu xʼamaja sputa clases, tsokgwilika kkilibreta umakgolh tachuwin: «Ni chuwinan; nila wan tuku lakpuwan». Umakgolh tachuwin lu kimakgalipuwa chu kimamakgkatsinilh pi nitu xaklitaxtu. Wa xlakata nialh xaklatamaputun.

Akxni kgawasaku xakwanit, ktsukulh wa kuchu. Xapulana tlan xaklimakgkatsi, pero akxni xakmalakatsali la xlilhuwa xakwa, nitlan xkimamakgkatsini. Ni xaklipaxuwa kilatamat. Chuna la xtitaxtu kilhtamaku tlakg xaklipuwan, chu xmin kilhtamaku makgas ni xaktaxtu kkinchik. Asta klakpuwa pi akstu nakimakgnikan.

Akxni kmakgatsilh 20 kata, ktekgsli tuku xkimakgtaya tsinu: wa heavy metal. Xakmakgkatsi pi uma tatlakgni xkimatliwakglha, wa xlakata ktsukulh katalalin amakgapitsi roqueros, kmastakalh kinchixit, ktaʼakgaxtokgolh o ktaʼakgalhtukulh chu ktsukulh lhakganan chuna la kiʼartistas nema lu xakkamalanki. Tsinu tsinu lu xaluku kwa chu ni xaklakapuwan wi tuku xaktlawa, chu uma tlawalh pi lu xakkatataʼakglhuwilh kifamilia.

Lu xaktalakgpalima. Xaklakpuwan pi uma tatlakgni xʼama kimakgapaxuwa, pero nichuna lalh. Chu akxni kkatsilh pi makgapitsi artistas nema lu xakkamalanki xtlawakgo tuku nitlan, lu nitlan klimakgkatsilh. Ktsukupa lakpuwan pi kiʼakstu nakimakgnikan chu xlikana chuna xaktlawaputun. Tuku kimalakgachokgolh wa pi klilakpuwa kintse. Xla lu xkimpaxki chu lhuwa tuku xtlawanit kimpalakata. Uma lu xkimakgapatinan: nialh xaklatamaputun, pero na nila akstu xkimakgnikan.

Ktsukupa lakpuwan pi kiʼakstu nakimakgnikan chu xlikana chuna xaktlawaputun. Tuku kimalakgachokgolh wa pi klilakpuwa kintse. Xla lu xkimpaxki chu lhuwa tuku xtlawanit kimpalakata. Uma lu xkimakgapatinan: nialh xaklatamaputun, pero na nila akstu xkimakgnikan.

Xlakata nialh xaklakapastakli uma, ktsukulh likgalhtawakga libros ktachuwin ruso niku xkalichuwinankan makgapitsi latamanin. Kmaktum libro xlichuwinankan chatum xpulalina takanajla. Kaj xalan kmakgkatsilh pi xakskujniputun Dios chu xakkamakgtayaputun kintalataman. Ktlawalh tuku nikxni xaktlawanit, kwanilh Dios putum tuku xakmakgkatsi chu kskinilh pi xkimakgtayalh naklipaxuwa kilatamat. Akxni ktlawalh uma oración lu tlan kmakgkatsilh chu uma kaks kimalakawanilh. Pero tuku tlakg kaks klilakawa wa tuku lalh akgtiy hora alistalh: chatum xtatayana Jehová lakgatlakglhi kimalakcha chu kiwanilh pi komo xaklakaskin xʼama kilimakgalhtawakge Biblia. Klakpuwan pi Dios kgalhtilh kiʼoración. Ama kilhtamaku ktsukulh lipaxuwa kilatamat.

BIBLIA LAKGPALILH KILATAMAT: Maski tuwa kmakgkatsilh, kmakgalh putuminika tuku xla heavy metal. Maski chuna ktlawalh, chuntiya lu xaklakapastaka uma tatlakgni. Akxni xaktitaxtu lakatum niku xtlakgnankan, xkimalakapastakapara tuku nitlan. Ni xaklakaskin pi tuku nitlan akxtum xtalalh tuku xatlan nema xakkatsinima, wa xlakata nialh ktitaxtulh niku xtlakgkan uma tatlakgni. Nachuna, akxni xaktsuku lakapastaka tuku xaktlawanit makgasa, xaktlawa oración xliputum kinaku. Uma kimakgtayalh nakkgalhi takaksni nema Dios masta chu «nema latamanin nila akgatekgskgo» (Filipenses 4:7).

Takgalhtawakga xalak Biblia kimasiyanilh pi xtalakaskin pi kstalaninanin Cristo xkalitachuwinankgolh amakgapitsin tuku xkanajlakgo (Mateo 28:19, 20). Akit xaklakpuwan pi nila chuna xakama tlawa, pero tuku xakkatsinima lu xkimakgapaxuwa chu tlan xkimamakgkatsini. Xakkatsi pi amakgapitsin latamanin na xlikatsitkan xwanit tuku xaxlikana. Wa xlakata, maski xakpekuan, ktsukulh kalitachuwinan amakgapitsin tuku xakkatsinima. Uma kimakgtayalh nakmakgkatsi pi xtapalh xaklitaxtu chu na kimakgtayalh nakmaki kkinaku tuku Biblia masiya.

TUKU TLAN KINKITAXTUNINIT: La uku kmakgaxtokga chu lu kpaxuwa chu na kkamakgtayanit kintse, kintala tsumat chu amakgapitsi latamanin nalakgapaskgo tuku xaxlikana masiya Biblia. Lu kimakgapaxuwa kskujnima Dios chu kkamakgtayama amakgapitsin nalakgapaskgo.

[Dibujo xla página 18]

[Dibujo xla página 19]

[Dibujo xla página 20]

[Dibujo xla página 21]