Biblia kalakgpalinilh xlatamatkan

¿TUKU XLAKATA nialh kakninanilh ídolos chatum puskat tiku kgalhiya liwaka 60 kata? ¿Tuku xlakata chatum sacerdote sintoísta makgxtakglhli xtakanajla chu chatum kstalanina Cristo litaxtulh? ¿Tuku makgtayalh chatum puskat nialh nalilipuwan xlakata maskiwinanka akxni skgataku xwanit? Kaʼakxilhwi tuku nakinkawanikgoyan.

«Nialh kkaskujnani ídolos» (ABA DANSOU)

KATA AKXNI LAKACHILH: 1938

PAÍS: BENÍN

ATANU: XKAKNINANI ÍDOLOS

LA XAKLAMA: Kstakli kkachikin So-Tchahoué, nema wi lakatsu kkgalhtuchokgo, anta niku kamunchuluwa. Xlakata ni anan carreteras, latamanin maklakaskinkgo barcos chu canoas xlakata wi niku naʼankgo. Latamanin skitinankgo o chakganankgo chu kamakgastakkgo wakax, cabras, borregos, paxni chu atanu animales. Chiki kalitlawakan lhtakala, paja chu min kilhtamaku kalitlawakan ladrillo. Maski lhuwa tiku ni kgalhikgo tumin, ni lhuwa anankgo tiku nitlan likatsikgo, ni xtachuna la klaklanka kachikinin.

Akxni aktsujku xakwanit, kintlat kinkamalakgachan kintala chu akit kʼakgtum convento niku kinkamasiyanikan la nakkakninaniyaw ídolos chuna la xtalismani kkinkachikinkan. Titaxtulh kilhtamaku, akit lu ktsukulh kakninani Dudua, atanu tukuwani nema na limapakuwikan dios Oduduwa nema kakninanikgo kachikin yoruba. Ktlawanilh aktsu pukaknin chu ktsukulh tlawani tamakamastan: xakmakamaxki aceite de palma, ñames, caracoles, xtilan, palomas chu atanu animales. Anta xakmakgasputa kintumin akxni xaktlawa umakgolh tamakamastan.

BIBLIA LAKGPALILH KILATAMAT: Akxni ktsukulh klikgalhtawakga Biblia, kkatsinilh pi kajwatiya anan chatum Dios xaxlikana, Jehová, chu xla ni lakgati nakakninaniyaw ídolos (Éxodo 20:4, 5; 1 Corintios 10:14). Kkatsilh tuku kilitlawat xwanit. Klakgmakgalh putum ídolos chu putum tuku anta makgtanu. Na nialh kkaputsalh katsinanin chu nialh kmakgtlawalh talismanin nema xtlawakan kkinkachikin chu tuku xtlawakan akxni wi tiku xniy.

Tuwa kmakgkatsilh. Putuminika kilatamat, liwaka tutumpuxam kata, xakkakninaninit ídolos. Nachuna, kiʼamigos, kifamilia chu kintalakatsunin sitsikgolh chu kilikgalhkgamanankgolh. Kskinilh Jehová pi xkimakgtayalh xaktlawalh tuku tlan. ¡Lu kimatliwakglhli tuku wan Proverbios 18:10! Anta wan: «Xtukuwani Jehová akgtum torre nema tliwakglh ya. Anta lakapala an tiku xaʼakgstitum, chu makgtayakan».

Na lu kimakgtayalh akxni kkalh kxtamakxtumitkan xtatayananin Jehová, niku kakxilhli pi kstalaninanin Cristo xlikana lapaxkikgo. Kaks kimalakawanilh akxni kakxilhli pi lu liskujkgo nalilatamakgo tuku wan Biblia. Kkatsilh pi xtatayananin Jehová wa xaxlikana takanajla o religión.

TUKU TLAN KINKITAXTUNINIT: Xtastakyaw Biblia kimakgtayanit tlakg tlan nakkatalalin kinkamanan. Nachuna, la uku nialh lhuwa tuku klilakgaputsa. Xapulana xakmakgasputa putum kintumin xlakata xakkaninanilh ídolos nema nikxni kimakgtayakgolh. Pero la uku kskujnani Jehová, tiku nialh makgas namasputu putum taʼakglhuwit (Apocalipsis [Revelación] 21:3, 4). La uku Nialh kkaskujnani ídolos, wata kkakninani Jehová xliputuminika kinaku. Jehová kinkuentajtlawa, kpaxuwa chu nitu klipekuan.

«Lata akxni aktsujku xakwanit xakputsama Dios» (SHINJI SATO)

KATA AKXNI LAKACHILH: 1951

PAÍS: JAPÓN

ATANU: SACERDOTE SINTOÍSTA XLITAXTU

LA XAKLAMA: Kstakli kʼakgtum aktsu kachikin nema xtapakgsi kFukuoka. Kinatlatni lu xkanajlanikgo dioses, wa xlakata kimasiyanikgolh nakkakakninani dioses sintoístas lata akxni aktsujku xakwanit. Lata ama kilhtamaku xaklilakpuwan kilakgtaxtut chu xakkamakgtayaputun tiku xkgalhikgo taʼakglhuwit. Akgtum kilhtamaku, chatum makgalhtawakgena kinkakgalhskin putum laktsu kamanan tuku xakliskujputunaw akxni xakstakwi. Kincompañeros tipalhuwa tuku wankgolh pi xliskujputunkgo, wi tiku wa pi científico xlitaxtuputun. Pero akxni akit kwa pi xakskujnaniputun Dios, putum kilitsiyankgolh.

Akxni kmasputulh kisecundaria, ktatsokgtanulh kʼakgtum escuela niku xkimasiyanika la makgalhtawakgena xla takanajla xaklitaxtulh. Anta klakgapasli chatum sacerdote sintoísta, xla xlikgalhtawakga maktum xatsitsakga libro akxni xkgalhi kilhtamaku. Akit xakakxilhnita xmakni uma libro, wa xlakata akxni kinkgalhskilh komo xakkatsi tuku libro xlikgalhtawakgama, akit kwanilh: «Biblia». Wa xlakata kiwanilh: «Putum tiku sacerdote sintoísta litaxtuputun, xlikgalhtawakgat uma libro».

Lakapala kalh tamawa maktum Biblia chu kwililh niku tlan xakakxilhli, anta niku xwilakgo amakgapitsi kilibros. Pero lhuwa atanu tuku xaklikgalhtawakgama, wa xlakata ni xakkgalhi kilhtamaku naklikgalhtawakga Biblia. Chalh kilhtamaku, kmasputulh kintakgalhtawakga chu sacerdote sintoísta klitaxtulh chu ktsukulh skuja kʼakgtum templo. ¡Kmakgantaxtilh tuku xaklakaskin!

Pero ni lhuwa kilhtamaku titaxtulh, kakxilhli pi uma nichuna la xaklakpuwanit. Lhuwa sacerdotes ni xkalilakgaputsakgo latamanin. Lhuwa tiku ni xkanajlanikgo dioses. Chatum tiku xkimpulalin kiwanilh: «Komo lakaskina pi tlan kakitaxtunin, kajwatiya kamasiya tuku lakpuwankgo lakgskgalalan lakchixkuwin. Ni kalakpuwanti nalichuwinana takanajla».

Uma lu kimakgalipuwa. Ni kmakgxtakglhli templo, pero ktsukulh kalakputsanani atanu takanajla o religión. Pero akxni tlakg xakkalakputsanani, tlakg xkimakgalipuwankgo. Xtasiya pi nipara akgtum takanajla xmasiya xaxlikana.

BIBLIA LAKGPALILH KILATAMAT: Kkata 1988 klakgapasli chatum budista tiku kiwanilh pi xaklikgalhtawakgalh Biblia. Ama kilhtamaku klakapastakli sacerdote sintoísta tiku makgasa nachuna xkiwaninit. Wa xlakata, ktlawalh tuku kiwanika chu ktsukulh likgalhtawakga Biblia. Lu klakgatilh. Xmin kilhtamaku xaklakgaxkgakgatawila kaj xlakata xaklikgalhtawakgama.

Tuku klikgalhtawakgalh kimakgpuwantinilh naktlawani oración Dios nema talichuwinan kBiblia. Ktlawalh oración chuna la masiya Mateo 6:9-13. Akgatiyun hora xakwan uma oración, asta akxni xakskujma ktemplo.

Klakapastaka pi akxni tlakg xaklikgalhtawakga Biblia, tlakg lhuwa takgalhskinin xakkgalhi. Ama kilhtamaku akit xaktamakgaxtokgnita chu xakkatsi pi xtatayananin Jehová xlimakgalhtawakgenankgo Biblia, xlakata xtachuwinankgonita kimpuskat. Ktachuwinalh chatum puskat tiku xtatayana Jehová chu ktlawanilh lhuwa takgalhskinin. Tuku tlakg kaks kimalakawanilh wa pi maklakaskilh Biblia xlakata xkinkgalhtilh putum kintakgalhskinin. Alistalh xla kawanilh natalan lakchixkuwin pi xkilimakgalhtawakgekgolh Biblia.

Ni makgas titaxtulh, ktsukulh kan ktamakxtumit kPukgalhtawakga. Xapulana ni kakxilhli, pero alistalh kkatsilh pi na anta xwilakgo makgapitsi xtatayananin Jehová nema nitlan xakkalikatsininit. Maski chuna, xlakan tlan kimakgamakglhtinankgolh chu kimpakgachipakgolh.

Kʼumakgolh tamakxtumit kkatsilh pi Dios lakaskin pi lakchixkuwin kapaxkikgolh chu xtapalh kaʼakxilhkgolh xfamiliajkan. Asta ama kilhtamaku kajwatiya lu xlakaskinka xakliʼakxilhnit nakliskuja la sacerdote chu ni kuenta xakkatlawani kimpuskat chu chatiy kinkamanan. Kakxilhli pi kaks xakkakgaxmatni latamanin tiku xminkgo kintachuwinankgo ktemplo, pero kimpuskat nipara makgtum xakkgaxmatninit.

Akxni tlakg xakkatsini xlakata Jehová, xakmakgkatsi pi tlakg xaktalakatsuwini. Lhuwa textos lakgchalh kinaku, pulaktum wa Romanos 10:13 nema wan: «Putum tiku namapakuwi xtukuwani Jehová nalakgtaxtu». Xakputsanit Dios lata akxni aktsujku xakwanit, chu la uku xaktekgsnit.

Nitlan xakmakgkatsi xlakata xakskujma ktemplo. Xapulana xaklilakgaputsa tuku xlakpuwankgolh amakgapitsin komo xakmakgxtakglhli sintoísmo, pero putum kilhtamaku xakwanit pi xakmakgxtakglhli komo xaktekgsli xaxlikana Dios alakatanu. Wa xlakata, ktlawalh tuku xaklakpuwanit chu kmakgxtakglhli templo kkata 1989, chu ktamakamastanilh Jehová.

Tuwa kmakgkatsilh naktlawa uma. Kinapuxkun tsukukgolh nitlan kilichuwinankgo chu lhuwa tuku kiwanikgolh xlakata ni xakmakgxtakglhli sintoísmo. Pero tuku tlakg tuwa kmakgkatsilh wa pi nakkawani kinatlatni tuku xaktlawama. Akxni xakama kxchikkan, lu xaklakgaputsama pi asta xakkuxmukatsama chu xakchalhpipima. Makglhuwa ktachokgolh xlakata xaktlawanilh oración Jehová chu xakskinilh xtamakgtay.

Akxni kchalh kxchikkan kinatlatni, ni tunkun kkalitachuwinalh uma. Titaxtulh lhuwa hora, akxni xaktlawanita lhuwa oración, tlan klitachuwinalh kintlat. Kwanilh pi xaktekgsnit xaxlikana Dios kʼatanu religion chu xakama makgxtakga sintoísmo xlakata tlan xakskujnanilh. Kintlat nitu kiwanilh chu lu lipuwa. Asta minkgolh makgapitsi kintalilakgapasni xlakata xkimalakgpalinikgolh kintapuwan. Ni xakkamakgasitsiputun amakgapitsin, pero na ni xakmakgxtakgputun tuku tlan, xakskujnaniputun Jehová. Titaxtulh kilhtamaku, kifamilia akgatekgsli tuku xlakata chuna xaklaksaknit.

Pero ni kajwatiya xtalakaskin xaktaxtulh ktemplo, na xtalakaskin xaklakgpalilh kintapuwan. Chuntiya xaklakapastaka kilatamat akxni sacerdote xaklitaxtu. Maski nialh xaklakapastakputun, putum tuku xʼanan, xkimalakapastaka.

¿Tuku kimakgtayalh nialh naklakapastaka uma? Pulaktiy tuku kimakgtayalh. Pulana kmamakxtumilh chu klhkuyulh putum tuku xakkgalhi kkinchik nema xmakgtanuma ksintoísmo. Kkalhkuyulh libros, cuadros chu atanu tuku lu xtapalh xwanit. Xlipulaktiy wa pi klimaxtulh lhuwa kilhtamaku xlakata akxtum nakkatatawila xtatayananin Jehová. Xlakata tlan xkintalalinkgo, tsinu tsinu nialh klakapastakli xamakgan kintalismanin.

TUKU TLAN KINKITAXTUNINIT: Xapulana ni kuenta xakkatlawani kimpuskat chu kinkamanan, chu wa xlakata xmakgkatsikgo pi xʼakstukan xwilakgo. Pero akxni ktlawalh tuku wan Biblia chu tlakg kkalimaxtunilh kilhtamaku, tlakg tlan klatalaliw. Alistalh kimpuskat na tsukulh skujnani Jehová. La uku putuminika kifamilia, kimpuskat chu akit, kinkgawasakan chu kintsumatkan chu xchixku, akxtum kkakninaniyaw xaxlikana Dios.

Akxni klilakpuwan putum tuku xaklakaskin akxni aktsujku xakwanit, pi xakskujniputun Dios chu xakkamakgtayaputun amakgapitsin, kakxilha pi chuna ktlawanit. Ni anan tachuwin xlakata nakwani Jehová la xlilhuwa kpaxtikatsini.

«Xakkatsi pi wi tuku xkintsankganima» (LYNETTE HOUGHTING)

KATA AKXNI LAKACHILH: 1958

PAÍS: SUDÁFRICA

ATANU: XMAKGKATSI PI XAKGXTAKGMAKGANKANIT

LA XAKLAMA: Klakachilh kʼakgtum aktsu kachikin nema wanikan Germiston, niku xʼanan lhuwa mina chu ni lu xlamakgo tiku nitlan likatsikgo. Kinatlatni kimaskiwinankgolh akxni kajku akgkutati kilhtamaku lata xaklakachinit, xlakata xlakpuwankgo pi nila xʼamakgo kimakgtakgalhkgo. Xaklakpuwan pi tamakgaxtokgat nema kimakgastakkgolh wa kinatlatni xwanikgonit. Pero akxni kkatsilh ni xlakan ni kinatlatni xwankgonit, kmakgkatsilh pi xkiʼakgxtakgmakgankanit. Xaklakpuwan pi xlakan nila xkiʼakgastekgsnikgo xlakata ni kinatlatni xwankgonit.

Akxni xakkgalhi 16 kata ktsukulh kataʼan kiʼamigos niku kstakan kuchu xlakata xaktlantliw o xaktiw chu xakkakgaxmatniw tiku xminkgo kilhtlikgo. Akxni xakkgalhi 17 kata xakxkuliya. Nachuna xaktasiyaputun la xalakgetsu modelos nema xtasiyakgo akxni xmalaknukan cigarro. Chu akxni kmakgatsilh 19 kata, kalh latama Johannesburgo xlakata kintaskujut. Ni makgas titaxtulh, akxtum xakkatalama tiku nitlan likatsikgo chu xakwan lixkajni tachuwin, xakxkuli chu xakwa lhuwa kuchu ksputat semana.

Pero xaktlawa lhuwa ejercicio. Xaktlawa gimnasia aeróbica, xakkgamanan fútbol chu atanu takgaman. Na lu kliskujli xlakata amakgapitsin xʼakxilhkgolh pi lu xakkatsini kmaklakaskin computadoras. Tlan xaklama chu ni xaklilakgaputsa tumin, wa xlakata makgapitsin xlakpuwankgo pi lu tlan xkinkitaxtunima. Pero uma ni xlikana xwanit: ni xakpaxuwa chu ni xaklakgati kilatamat. Lhuwa tuku xakkgalhi pero ni xakpaxuwa. Xakkatsi pi wi tuku xkintsankgani.

BIBLIA LAKGPALILH KILATAMAT: Akxni tsukuka kilimakgalhtawakgekan Biblia, kkatsinilh pi Jehová chatum xapaxkina Dios chu wa xlakata kinkamaskiwinitan xTachuwin. Biblia xtachuna maktum carta nema xla kinkatsokgninitan xlakata nakinkapulalinan kkilatamatkan (Isaías 48:17, 18). Kʼakgatekgsli pi komo xaklitamakgtayaputun xtapulalit, xtalakaskin lhuwa tuku xaklakgpalilh.

Tuku pulana ktlawalh wa pi nialh kkatalalilh tiku xakkatalalin. Ktlawalh tuku wan Proverbios 13:20: «Tiku katalalin xalakgskgalalan latamanin xaskgalala nawan, pero tiku katalalin tiku lu xalaktontos nitlan katikitaxtunilh». Lu kuenta ktlawalh uma tastakyaw, chu akxni kmakgxtakglhli tiku xapulana xakkatalalin, ktsukulh katalalin xtatayananin Jehová.

Pero tuku tlakg tuwa kmakgkatsilh wa pi nialh nakxkuli. Akxni xakliskujma xlakata nialh nakxkuli, ktaliwakalh 14 kilos. Uma lu nitlan kimamakgkatsinilh, chu titaxtulh akgkaw kata xlakata xaklitaktalh umakgolh kilo. Maski chuna, akit xakkatsi pi kilimakgxtakgat xwanit lixkuli. Putum kilhtamaku xaktlawani oración Jehová, chu xla kimaxkilh litliwakga xlakata xakmakgxtakglhli lixkuli.

TUKU TLAN KINKITAXTUNINIT: La uku tlakg tlan kwi. Nachuna, kimakgapaxuwa tuku kkgalhi. Nialh kputsama tapaxuwan nema limin akxni kgalhikan tlan taskujut, tumin o akxni amakgapitsin xlakaskinka naʼakxilhkgoyan. Kinchixku chu akit lu kpaxuwayaw akxni kkamasiyaniyaw amakgapitsin tuku xaxlikana masiya Biblia. Chu kkamakgtayanit na naskujnanikgo xaxlikana Dios, kgalhtutu tiku xapulana xakkataskuja. Nachuna, akxni nina xnikgo kinatlatni nema kimakgastakkgolh, kkalitachuwinalh xlakata talakastakwanat nema naʼanan kKatiyatni akxni akgtum paraíso nawan.

Xlakata lu tlan ktalalin Dios nialh kmakgkatsi pi kiʼakgxtakgmakgankanit. La uku kmakgtapakgsi kʼakgtum familia xla xtatayananin Jehová xlikalanka katiyatni. Anta kkakgalhi natsetni, natlatni chu natalan (Marcos 10:29, 30).

[Dibujo]

Kakxilhli pi xtatayananin Jehová xlikana lapaxkikgo

[Dibujo]

Ktemplo sintoísta niku xakskujma