Klakachilh kʼakgtum aktsu kachikin nema xtapakgsi kSajonia, nema na xlitalakgapasa República Democrática Alemana (RDA). Kkinchik lu xaklapaxkiyaw, chu kinatlatni kimasiyanikgolh pi xakkgalhilh laktlan tayat. Xlakata RDA akgtum kachikin comunista xwanit, lhuwa latamanin xalak Sajonia ni xlakaskinka xliʼakxilhkgo takanajla. Akit ni xakkanajla pi Dios lama. Xʼanan akgtiy tapuwan nema klilatamalh akgkutsayan kata: ni xakkanajla pi Dios lama chu xaktataya comunismo.

¿Tuku xlakata xaklakgati comunismo? Xaklakgati xlakata uma tapuwan xmasiya pi putum latamanin lakxtum xwankgonit. Xaklakpuwan pi xlakata ni xʼanankgolh tiku xkgalhikgo lhuwa tumin chu tiku ni, xtalakaskin lakxtum xkamakgpitsinika tumin latamanin. Wa xlakata kmakgtanulh kʼakgtum organización nema xlitalatlawanan uma tapuwan chu xmakgtanumakgo lhuwa lakgkgawasan. Akxni xakkgalhi 14 kata lu kliskujli xlakata nakmakgtayanan ni lu namakaxkajwikan kplaneta chu xakmakgtayanan nareciclarlikan o namaklakaskimparakan kapsnat. Mapakgsinanin xalak kachikin Aue lu lakgatikgolh tuku xaktlawama chu asta wi tuku kimaskiwikgolh. Maski aktsujku xakwanit kkalakgapasli makgapitsi xlakaskinka políticos xalak país. Xakmakgkatsi pi tlan tuku xaktlawama chu xaklakpuwan pi tlan xʼama kinkitaxtuni kkilatamat.

Pero ama kilhtamaku wi tuku talakgpalilh. Kkata 1989 masputuka xpatsaps Berlín, chu alistalh lakxlalh bloque comunista xalak Europa del Este. Pulakatunu pulakatunu laklatilhalh. Alistalh kkatsilh pi xtlawakanit lhuwa tuku nitlan. Akgtum liʼakxilhtit, tiku ni xtatayakgo comunismo ni lu xlakaskinka xkaliʼakxilhkan. Pero ¿tuku xlakata chuna xtlawakgo? Comunismo xmasiya pi putum latamanin lakxtum xwankgonit. ¿Kaj akgtum taʼakgsanin uma tuku xmasiyakgo? Putum uma lu kimakgalipuwa.

Klakgpalilh kintapuwan chu wa tuku tlakg xlakaskinka ktsukulh liʼakxilha wa pi naktlakgnan chu nakmaninan. Ktsukulh kan kʼakgtum escuela niku xmasiyakan la tlakgnankan xlakata alistalh tlan xakalh kʼuniversidad; xaklakpuwan pi kajwatiya xakama maninan chu tlakgnan. Nialh klilatamalh laktlan tayat nema xkimasiyanikanit akxni aktsujku xakwanit. Kajwatiya xakpaxuwaputun, wa xlakata asta chalhuwa kintaskin o kinliʼit xakkgalhi. Pero chuntiya xaklipuwan maski xaktlakgnan, xakmaninan chu xaklima kilatamat chuna la xaklakgati, chu kintalipuwan xtasiya akxni wi tuku xakmani. ¿La xʼama wan latamat? ¿Tuku xlakata minitaw latamayaw?

Kaks klilakawa akxni ktekgsli xatakgalhtin kintakgalhskinin. Akgtum kilhtamaku, akxni xakwi kʼescuela, kkalakgtalakatsuwilh makgapitsi compañeros nema xlichuwinamakgo kilhtamaku nema aku mima. Na anta xwi Mandy, * chatum xtatayana Jehová, nema kimaxkilh lu tlan tastakyaw. Kiwanilh: «Andreas, komo katsiputuna xatakgalhtin mintakgalhskinin xlakata latamat chu kilhtamaku nema aku mima, kalakputsanani tuku wan Biblia».

Ni lu xaklikgalhtawakgaputun Biblia, pero na xakkatsiputun tuku wan. Mandy kimasiyanilh capítulo 2 xla xlibro Daniel, chu kaks klilakawa tuku klikgalhtawakgalh. Anta kalichuwinankan makgapitsi laklanka tamapakgsin nema lu lakgpalikgonit la wi kakilhtamaku asta la uku. Alistalh, Mandy kimasiyanilh atanu tuku Biblia lichuwinan pi ama la kkilhtamaku nema aku mima. ¡Xaktekgsnit xatakgalhtin kintakgalhskinin! Pero ¿tiku tsokgwililh uma tuku xʼama la? ¿Tiku ama lichuwinalh tuku xʼama la chu xlikana kgantaxtulh? ¿Xlimasiya uma pi xwi chatum Dios?

Mandy kimalakgapasnilh Horst chu Angelika, akgtum tamakgaxtokgat nema xtatayananin Jehová xwankgonit. Xlakan kimakgtayakgolh tlakg nakʼakgatekgsa tuku wan Biblia. Tunkun kakxilhli pi kajwatiya xtatayananin Jehová putum kilhtamaku maklakaskinkgo xtukuwani Dios chu kamasiyanikgo amakgapitsin (Salmo 83:18; Mateo 6:9). Kkatsinilh pi Jehová lakaskin pi latamanin kalatamakgolh putum kilhtamaku kʼakgtum paraíso unu kKatiyatni. Salmo 37:9 wan: «Tiku lipawankgo Jehová wa nakamaxkikan katiyatni». Lu kpaxuwalh akxni kkatsilh pi putum latamanin tiku lu liskujmakgo nalilatamakgo xlimapakgsin Dios tlan nalatamakgo anta.

Tuwa kmakgkatsilh naklakgpali kilatamat chu naklilatama tuku wan Biblia. Lu tlankajwa xakwanit xlakata lu tlan xkinkitaxtuninit akxni xaktlakgnan chu xakmaninan, wa xlakata kliskujli naktaktuju. Nachuna, tuwa kmakgkatsilh nialh naktlawa talakgxtumit nema ni xlitatlawat. Lu kpaxtikatsini pi Jehová ni lakapala kasitsini, kaʼakgatekgsni chu kapaxki tiku lu liskujmakgo xlakata natlawakgo tuku wan Biblia.

Akgkutsayan kata ni xakkanajla pi Dios lama chu ktatayalh comunismo, pero Biblia kimakgtayalh naklakgpali kilatamat. Tuku kkatsinilh kimakgtayalh naklipaxuwa kilatamat chu nialh lu klilakgaputsalh akxni xaklilakpuwan tuku aku xʼama la. Ktamunulh kkata 1993 chu chatum xtatayana Jehová klitaxtulh, chu kkata 2000 ktatamakgaxtokglhli Tabitha, tiku na xtatayana Jehová. Kinchatiykan klimaxtuyaw kilhtamaku xlakata nakkamasiyaniyaw latamanin tuku wan Biblia. Kkatekgsnit lhuwa latamanin tiku nachuna lakpuwankgo chuna la akit xaklakpuwan. Lu tlan klimakgkatsi akxni kkamakgtaya latamanin nalakgapaskgo Jehová.

Akxni ktsukulh katalalin xtatayananin Jehová, kinatlatni lu pekuankgolh. Pero chuna la titaxtunit kilhtamaku akxilhkgonit pi uma lu kimakgtayanit kkilatamat. La uku lu kpaxuwa xlakata likgalhtawakgamakgo Biblia chu ankgo ktamakxtumit nema ktlawayaw xtatayananin Jehová.

Tabitha chu akit lu kliskujaw naktlawayaw tuku kawani Biblia tiku tamakgaxtokgkgonit, chu uma lu kinkamakgapaxuwayan. Akgtum liʼakxilhtit, xlakata kkgalhakgaxmataw tastakyaw niku wan pi ni naʼakgskgawiyaw tiku tamakgaxtokgaw, kinkamakgtayanitan tlan natawila kintamakgaxtokgatkan (Hebreos 13:4).

Nialh klilakgaputsa latamat chu kilhtamaku nema aku mima. Kmakgtapakgsi k’akgtum familia kxlikalanka katiyatni nema na xtatayananin Jehová. Tiku makgtapakgsikgo k’uma familia kgalhikgo takaksni, makxtum wilakgo chu lakxtum lalikatsinikgo, chuna la akit xaklakaskin chu lhuwa kilhtamaku kputsalh.