Kstakli klanka kachikin xla Puerto Limón chu kachikinin nema xlimakgstili, kxʼeste Costa Rica. Kinatlatni kgalhikgolh kgalhtsayan kamanan, akit xlikgalhtujun. Pero kintlat nilh akxni xakkgalhi akgtsayan kata, wa xlakata kintse xʼakstu kinkamakgastakni.

Béisbol lu xlakaskinka xlitaxtu kkilatamat, lata aktsujku xakwanit lu xaklakgati xakkgamanan. Akxni kgawasaku xakwanit ktsukulh kgamanan kʼakgtum aktsu equipo. Akxni xakkgalhi 20 kata, chatum tiku kaputsa xatlan kgamananin kiwanilh pi tlan xakmakgkgamanalh kʼakgtum equipo nema xtapakgsi kNicaragua. Pero ama kilhtamaku ni xakamputun latama kNicaragua xlakata kintse xtatatla chu akit xakkuentajtlawama. Wa xlakata ni kmakgamakglhtinalh tuku xkimalaknunimaka. Titaxtulh kilhtamaku, atanu tiku kaputsa xatlan kgamananin kiwanilh pi tlan xakmakgtapakgsilh kʼequipo xla béisbol xalak Costa Rica chu uma kilhtamaku kwa pi tlan. Uma equipo xlitakgatsi kgamananin nema xkalaksakkanit klaktsu equipos. Kmakgtapakgsilh kʼequipo xla uma país lata kkata 1949 asta 1952 chu kkgamanalh makgapitsi partidos kCuba, kMéxico chu kNicaragua. Xkiyawakan kbase chu lu tlan xakkgamanan. Makgtum, kkgamanalh 17 partidos chu putum tlan kintaxtunicha. Lu xaklakgati akxni latamanin pixlanka xkimapakuwikgo.

Pero tuku nitlan, wa pi lixkajni ktsukulh lin kilatamat. Maski xakkgalhi kintaskin o kiliʼit, xakkaputsa atanu lakpuskatin chu xakwa lhuwa kuchu. Akgtum kilhtamaku lu kkgachilh chu lichali akxni kstakwanalh kkimputama ni xaklakapastaka la xakchinit kkinchik. Nachuna, xakkgamanan dominó xlakata xaktlajalh tumin chu xaktamawa billetes de lotería.

Ama kilhtamaku kintse xtatayana Jehová litaxtulh. Xla xlakaskin pi na xakkatsilh tuku xkatsinima, pero ni matlanilh xlakata akit kajwatiya takgaman xaklilakgaputsa. Akxni xakmakgatawakga, ni xaktsinksa maski kiliwayanat xwanit. Kajwatiya xaklilakpuwan takgaman. Lu xaklakgati kgamanan béisbol.

Pero akxni xakkgalhi 29 kata, kiʼakgspulalh tuku nitlan akxni xakchipaputun pelota xla béisbol. Ktatlanipa, pero nialh kkatakgamanalh tlakg xalaklanka equipos. Maski chuna, chuntiya xakkgamanan béisbol chu xakkamamakgatawakge akgtum aktsu equipo lakatsu kkinchik.

Kkata 1957, kkilalh kʼakgtum asamblea xla xtatayananin Jehová nema tlawaka kʼestadio niku xakkgamananit béisbol. Akxni anta xakwi, kaks klilakawa pi xtatayananin Jehová lu tlan xlikatsikgo, nixtachuna xlikatsikgo la latamanin tiku xʼankgo akxilhkgo béisbol. Tuku kakxilhli kʼuma asamblea kimakgpuwantinilh nakkatalikgalhtawakga Biblia xtatayananin Jehová chu nakan kxtamakxtumitkan.

Lu kaks kimalakawanilh tuku xakkatsinima kBiblia. Akgtum liʼakxilhtit, Jesús xlichuwinanit pi kxaʼawatiya kilhtamaku kstalaninanin xʼamakgo lichuwinankgo xatlan tamakatsinin xla xTamapakgsin Dios kxlikalanka katiyatni (Mateo 24:14). Na kkatsinilh pi xaxlikana kstalaninanin Cristo ni kaxokgonikan xlakata lichuwinankgo Dios. Jesús wa: «Kaj xachunata makglhtinantit; kaj xachunata kamastatit» (Mateo 10:8).

Chuna la xakkatsinitilhama tuku masiya Biblia, xakakxilha pi xtatayananin Jehová xlilatamakgo tuku xkatsinikgo kBiblia. Xaklakgati pi xlakan lu xliskujkgo nalichuwinankgo xTamapakgsin Dios kxlikalanka katiyatni. Kkatsilh pi xlakan xkgalhikgo tayat nema Jesús kamasiyanilh kstalaninanin, pi xmastakgolh tuku xkgalhikgo. Wa xlakata, akxni klikgalhtawakgalh tuku wan Marcos 10:21 niku Jesús wan: «Katat, kakistalani», xtatayana Jehová klitaxtuputulh.

Pero tuwa kmakgkatsilh naklaksaka makgapitsi tuku xakama tlawa. Akgtum liʼakxilhtit, akglhuwa kata xakʼapostarli «kinúmero xla suerte» akgatanu semana klotería nacional. Pero kBiblia kkatsinilh pi Dios ni lakgati tiku kakninanikgo «dios tiku masta Suerte» nipara tiku lhuwa tuku kgalhiputunkgo (Isaías 65:11; Colosenses 3:5). Wa xlakata, klaksakli pi nialh xakama kgamanan. Xapulana domingo akxni nialh ktamawalh lotería, ¡«kinúmero xla suerte» tlajanalh! Latamanin kilikgalhkgamanankgolh xlakata ni xakkgamananit uma semana chu xkimafuerzajlinimakgo xlakata xakkgamanampa, pero nialh makgtum kkgamanampa.

«Xasasti kintayat» liʼakxilhparaka watiya kilhtamaku akxni ktamunulh kʼakgtum asamblea xla xtatayananin Jehová (Efesios 4:24). Katsisni, akxni ktaspitli khotel niku xaktamakgxtakgnit, ktatanokglhli tiku kintaskin xwanit chu xkinkgalhkgalhima kkimalakcha. Kiwanilh: «Sammy, kaw paxuwayaw». Tunkun kkgalhtilh: «¡Ni!». Kwanilh pi la uku xaklilatama xtastakyaw Biblia (1 Corintios 6:18). Xla kinkgalhtilh: «¡¿Tuku wamputuna?!». Xla ni xlakaskinka xliʼakxilha tuku wan Biblia xlakata talakgxtumit nema ni xlitatlawat chu kiwanilh pi tlan kintaskin xwampa. Pero lakapala ktanulh kkincuarto chu liwana kmalakchuwalh. La uku lu kpaxuwa xlakata lata kata 1958, akxni xtatayana Jehová klitaxtulh, kmakgxtakglhli nixatlan latamat nema xaklin pulana.

Komo xaklichuwinalh putum tuku tlan kinkitaxtuninit xlakata klilatama xtastakyaw Biblia, xakmalakgatsamalh maktum libro. La uku kkgalhi xatlan amigos chu lu kpaxuwa.

Chuntiya klakgati kkgamanan béisbol, pero la uku pulana kwili tuku tlakg xlakaskinka. Akxni xakkgamanan lu xkilakgapaskan chu xakkgalhi tumin, pero uma ni putum kilhtamaku makgapala. Tuku putum kilhtamaku namakgapala wa la ktalalin Dios chu xlakskujnin. Biblia wan: «Kakilhtamaku nasputa, chu putum tuku latamanin lakgatikgo kkakilhtamaku na nasputa, pero tiku tlawa xtalakaskin Dios putum kilhtamaku nalatama» (1 Juan 2:17). La uku, atanu tuku lu klakgati: kskujnani Jehová chu kmakgtapakgsi kxkachikin. Wa uma tuku tlakg xlakaskinka kakxilha kkilatamat.