JEHOVÁ xkatsi pi akgtum kilhtamaku xʼama makamasta xlatamat xKgawasa wantiku lu xpaxki. Maski ni lu lakatanks xwan Génesis 3:15 chuna xlichuwinan. Xlakata latamanin xʼakgatekgskgolh la xlilhuwa xlipuwa Dios akxni xmakgnika xkgawasa, Dios tlawalh pi xtatsokgtawilalh kBiblia tuku lalh akxni skinilh Abrahán pi xmakamastalh xkgawasa Isaac wantiku lu xpaxki.

Kalakapastakwi pi Dios xmalaknuninit pi Lakgmaxtuna xʼama min kxfamilia Isaac. Xla lu xkanajlani uma tuku xmalaknunikanit chu xlipawan pi komo xtalakaskilh, Dios xmalakastakwanilh Isaac. Wa xlakata kgalhakgaxmatninalh chu xʼama makamasta xkgawasa. Pero akxni xʼama makgni Jehová malakgachalh chatum ángel chu machokgolh Abrahán. Alistalh, Dios tlan lichuwinalh uma pulalina xlakata lhuwa xkanajla chu liwana limasiyanilh pi xlikana namakgantaxti tuku malaknunilh.

Titaxtulh kilhtamaku, Isaac kgalhilh chatiy lakgkgawasan: Esáu chu Jacob. Kajwatiya Jacob paxkilh tuku xla Dios chu wa xlakata sikulunatlawaka. Dios lakgpalinilh xtukuwani chu limapakuwilh Israel, chu kgalhakutiy xkamanan makilhtsukikgolh xalaklanka familia xalak Israel. Pero ¿la lanka kachikin wa uma familia?

Litsukulh akxni xanapuxkun xnatalan José tsukukgolh sitsinikgo. Lu lhuwa xsitsinikgo wa xlakata stakgolh xlakata skujni xwa. Tiku tamawakgolh linkgolh kʼEgipto, niku lhuwa tuku nitlan titaxtulh. Pero, Dios makgtayalh uma kgawasa tiku ni xmakgatsankganani chu nixpekuan, akgtum kilhtamaku faraón lakgayawalh akgtum taskujut lu xlakaskinka. Uma tlan kalimakgtayalh xfamilia akxni analh tatsinksni chu tlawalh pi Jacob xkamalakgachalh makgapitsi xlakgawasan xlakata xʼankgolh tamawakgo liwat kʼEgipto. ¿Tiku xlakgayawakanit namasta liwat? ¡Wa José! Akxni José katatanokglhli xnatalan paxuwalh chu uma kilhtamaku nitlan xlimakgkatsikgo xlakata tuku xtlawanikgonit, José katapatilh chu alh kamatiyinan amakgapitsi xfamilia. Faraón kamaxkilh tlakg xatlan tiyat, chu anta tsukulh staka xfamilia chu tlakg tlan latamakgolh. José liwana katsilh pi wa Jehová tiku chuna tlawalh xlakata xmakgantaxtilh tuku xmalaknunit.

Jacob katalatamalh xfamilia tiku xkapaxki kʼEgipto asta akxni nilh. Akxni xʼama niy, lichuwinalh pi Lakgmaxtuna tiku xwankanit pi namin chatum lu tliwakga Mapakgsina nawan chu kxfamilia Judá xʼama min. Titaxtulh kata, José lichuwinalh pi Dios xʼama katamakxtu kʼEgipto xfamilia Jacob.

(Takilhtinit kGénesis capítulo 20 asta 50 chu kHebreos 11:17-22.)