XTITAXTUNITA 350 kata akxni milh Munkaklat. Anta kʼUr, akgtum kachikin niku xʼanan tuku tlan, kachikin nema xwi anta niku la uku wi Irak, xlama Abrahán. Xla lu xkanajla, pero xʼama taliʼakxilha komo xkanajlani Dios. Kaʼakxilhwi tuku lalh.

Jehová wanilh pi xmakgxtakgli xkachikin chu xʼalh atanu kachikin wanikan Canaán. Xla kgalhakgaxmatninalh chu tunkun alh. Makgat alh niku xwanikanit, lilh xpuskat Sara, xpuxnimat Lot chu putum tiku xwilakgo kxchik. Akxni xlamacha kCanaán xtalakxijtilha chu xtawila klaktsu chiki nema xlitatlawanit xuwa. Jehová tatlawalh Abrahán akgtum talakkaxlan: wanilh pi xlakata Abrahán, putum familias xalak katiyatni xʼamaka kasikulunatlawakan, xfamilia lanka kachikin xʼama wan chu Canaán xlakan xʼama wan.

Abrahán chu Lot kgalhikgolh lhuwa borregos chu wakax. Abrahán tlan likatsilh chu maxkilh talakaskin pi xpuxnimat xlaksakli tiyat nema tlakg xlakgatilh niku tlan xkalilh xʼanimales. Lot laksakli tiyat nema xwi kkgalhtuchokgo wanikan Jordán, uma tiyat tlakg xmakgalanan chu tamakgxtakgli lakatsu kSodoma. Pero tiku xlamakgolh kʼama kachikin lu lixkajni xlikatsikgo, xlimakgalipuwankgo Jehová xalixkajni xtalakgalhinkan.

Akxni Abrahán xmakgxtakgnitta Lot, Jehová malaknunilh pi lanka familia xʼama kgalhi chuna la xlilhuwa wilakgo staku kʼakgapun. Abrahán xkanajlani Jehová, pero xpuskat Sara nila xkgalhi kskgata. Chu akxni Abrahán xkgalhi 99 kata chu Sara atsinu nina xchan 90, Dios makatsinilh pi xʼama kgalhi chatum skgata. Chu chuna lalh: Sara kgalhilh kskgata nema wanika Isaac. Chu maski Abrahán kgalhilh amakgapitsi kamanan, wantiku xwankanit kʼEdén pi Nalakgmaxtunan, xʼama min kxfamilia Isaac.

Chu Lot antiya xkatalama xfamilia kSodoma. Pero xla ni tlawalh talakgxtumit xalimaxana nema xtlawakgo latamanin tiku anta xlamakgolh, xlakata xla tlan xlikatsi. Wa xlakata, akxni akgtum kilhtamaku Jehová lakapastakli namasputu Sodoma, pulana kamakgalakgchalh ángeles xlakata namakatsini Lot. Xlakan wanikgolh pi xkatatsalalh xfamilia chu nipara chatum xtalakgaspitli. Chu Dios malakgachalh lhkuyat chu azufre, kamasputulh xalaklixkajni latamanin xalak Sodoma chu xalak Gomorra kachikin nema lakatsu xwi. Lot chu chatiy xlaktsuman ni kamasputuka. Pero xpuskat talakgaspitli, max xlakapastakma tuku xʼakgxtakgwilima kxchik. Xlakata ni kgalhakgaxmatninalh, makgatsankgalh xlatamat.

(Takilhtinit kGénesis 11:10–19:38.)