AKGLHUWA ciento kata akxni nina xtanukgo kCanaán kachikin Israel, Jehová xmalaknuninit Abrahán pi ama tiyat xʼama kamaxki xfamilia. Chu uku, atsinu tsankga xlakata israelitas xʼakgchipakgolh Tiyat nema xKawanikanit Nakamaxkikan chu wa Josué tiku xkapulalima.

Dios wa pi xalak Canaán xkalakgchan nakamasputukan, xlakata xlatlawani tuku lu nitlan chu lu lixkajni tuku xtlawakgo. Wa xlakata, kawanilh israelitas pi xmasputukgolh putum kachikinin nema xwilakgo kCanaán.

Pero akxni nina aʼxtanukgo kCanaán, Josué malakgachalh chatiy xlakata xʼankgolh skgalakgo tiyat. Xlakan tanukgolh kJericó chu tatsekgkgolh kxchik chatum puskat wanikan Rahab. Maski xla xkatsi pi israelitas xwankgonit, kamaxkilh talakaskin pi xtatsekgkgolh kxchik. ¿Tuku xlakata? Xlakata xkgaxmatnit laklanka tuku nila tamakanajla nema xtlawanit Jehová akxni kalakgmaxtulh xkachikin chu la uku xkanajlani Jehová. Rahab tlawalh pi skgalananin xmaxkikgolh xtachuwin pi xla chu xfamilia ni xkamakgnika akxni xtanukgolh kJericó.

Alistalh, israelitas tanukgolh kCanaán chu masputukgolh Jericó. Jehová tlawalh pi xpatsaps Jericó xtatilhli, chu soldados masputukgolh kachikin pero Rahab chu xfamilia lakgtaxtukgolh. Chuna Josué chu ksoldados lhuwa tiyat tsukukgolh akgchipakgo anta niku xKawanikanit Nakamaxkikan chu akgchaxan kata chuna tlawakgolh. Alistalh, akgatunu laklanka familia xalak Israel kamaxkika tiyat nema xkawanikanit pi xʼamaka kamaxkikan.

Akgtum kilhtamaku, akxni kgoluta xwanit Josué kamamakgstokgli putum kachikin. Kamalakapastakalh tuku xtlawanit Dios xlakata xfamiliajkan chu kawanilh pi ni xmakgatsankgananikgolh. Pero, akxni nilh Josué chu tiku xmakgtayakgo, israelitas makgxtakgkgolh Jehová chu tsukukgolh kakninanikgo nixaxlikana dioses. Chu akgtutu ciento kata nema titaxtulh makglhuwa ni kgalhakgaxmatkgolh xlimapakgsin Dios. Chu akxni nixkgalhakgaxmatkgo, Jehová xkamakamaxki filisteos chu amakgapitsi xtalamakgasitsin. Pero akxni kskinikgo tamakgtay, xkamaxki tiku nakalakgmaxtu. Kgalhkutiy lakgmaxtunanin kamaxkilh, xkawanikan jueces.

Libro xalak Biblia nema lichuwinan uma, tsuku lichuwinan juez Otniel chu lisputa chatum chixku tiku tlakg tliwakga xwanit xliputum latamanin: wa juez Sansón. Tuku lichuwinan libro xla Jueces wa uma tuku lu xlakaskinka kinkamasiyaniyan: komo kgalhakgaxmataw Jehová, tlan nakinkakitaxtuniyan, komo ni nakgalhakgaxmataw, nitlan kintikakitaxtunin.

(Takilhtinit kJosué, Jueces chu Levítico 18:24, 25.)