XAʼAWATIYA libro xalak Biblia Apocalipsis o Revelación kamaxki takgalhkgalhin putum latamanin. Uma libro tsokgli apóstol Juan, lichuwinan lhuwa tuku maʼakxilhnika chu lisputa akxni Jehová makgantaxti tuku lakapastaknit natlawa.

Xapulana tuku maʼakxilhnika, Jesús tiku xmalakastakwanikanit kamatliwakglha chu kastakyawa lhuwa congregaciones. Chu atanu, lichuwinan xputawilh Dios anta kʼakgapun chu na kaʼakxilhli espíritus nema xmalankimakgo Jehová.

Akxni xtalakatsuwima xlakata nakgantaxtu tuku lakapastaknit natlawa Dios, Aktsu Borrego (Jesucristo) maxkikan akgtum rollo nema kgalhi akgtujun tuku limalakchuwakanit. Akxni maxtuni akgtati tuku limalakchuwakanit taxtukgo kgalhtati tiku kgewilakgolh kawayu. Xapulana wa Jesús, tiku wilikanit xliMapakgsina chu kgewi xasnapapa kawayu. Chu amakgapitsi kgewilakgolh kawayu xatanu tanu color, chu kilhchanima guerra, tatsinksni chu lhuwa tajatat nema litalakgapasa uma kakilhtamaku chu nialh makgas namasputukan. Akxni maxtunika xliʼakgtujun tuku xlimalakchuwakanit takgaxmatli akgtujun trompeta, uma kilhchanima akxni natalichuwinan tuku nitlan nalimin Dios. Chu uma na liminpara akgtujun tuku nitlan o xtasitsi Dios.

Alistalh, Juan akxilhli pi lakachilh aktsu kgawasa, uma wamputun pi lakkaxwilika xTamapakgsin Dios kʼakgapun. Akxilhli pi lalh guerra, kamaxtukancha kʼakgapun Satanás chu xdemonios chu kamakaminka kKatiyatni. Chu takgaxmatli tachuwin nema wan: «Kgoxutanin wanti lamakgo nkatuxawat». ¿Tuku xlakata? Xlakata Akgskgawini katsi pi nialh makgas kilhtamaku kgalhi chu lu sitsinit (Apocalipsis 12:12).

Tasiyapa Jesús kʼakgapun la aktsu borrego, chu xpaxtuyakgo 144,000 latamanin tiku kalaksakkanit «natamapakgsinankgoy». Klibro wanikan Apocalipsis katsipat pi tiku natamapakgsinankgo Cristo litakgatsi 144,000 (Apocalipsis 14:1; 20:6).

Alistalh, mapakgsinanin xalak Katiyatni tamakxtumikgo kʼArmagedón o «ntlanka xkilhtamaku [...] Dios nti mpaks kgalhiy xlitliwakga» xlakata natalatlawakgo tiku kgewi xasnapapa kawayu, Jesús chu xsoldados xalak akgapun. ¿Tuku lisputa uma guerra? Kamasputukan mapakgsinanin chu lakgachinukan Satanás. Jesús chu 144,000 mapakgsinankgo akgtum mil kata kKatiyatni chu akxni nasputa akgtum mil kata, namasputukan Satanás (Apocalipsis 16:14; 20:4).

¿Tuku natlawa xTamapakgsin Cristo xaʼAkgtum Mil Kata xlakata tiku kgalhakgaxmatkgo? Juan tsokgnalh: «Na paks naxakanikgo Dios xlakgpixtajatkan: na niʼalh katiʼanalh linin; chu na niʼalh katiʼanalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wantu xʼanan xakgasiyaj, paks lakgsputli» (Apocalipsis 21:4). Xlikana, ¡Katiyatni akgtum paraíso wampara!

Chuna, libro xla Apocalipsis limasputu tamakatsin nema limin Biblia: Jehová nalimaklakaskin xTamapakgsin Mesías xlakata namasputuni tuku nitlan limawakanit xtukuwani chu liwana nalimasiya xliputum kilhtamaku pi kajwatiya xla lakgchan namapakgsinan.

(Takilhtinit klibro xla Apocalipsis.)