CHUNA la talhuwikgolh latamanin kKatiyatni, talakgalhin chu tuku nitlan talakgatumikgolh kkakilhtamaku. Enoc, max wantiku kajwatiya kskujni Dios xlama kKatiyatni, lichuwinalh pi Jehová xʼama kamasputu tiku nitlan xtayatkan xkgalhikgo. Pero ni kuenta tlawakgolh tuku kamakatsinilh wata tlakg tsukulh talhuwi tuku xalixkajni. Tuku tlakg nitlan, makgapitsi ángeles ni kgalhakgaxmatkgolh Jehová, makgxtakgkgolh xtaskujutkan nema xkgalhikgo kʼakgapun, la latamanin litaxtukgolh chu lhuwa lakpuskatin tatawilakgolh. Xlakata ángeles tatalakgxtumikgolh lakpuskatin xkamanankan lu laklanka chu lakgtliwakga wankgolh, kalilakgapaska nefilim, xlakan tamalakgatumilh nalatlawanikgo tuku nitlan kKatiyatni. Lu lipuwa Dios akxni akxilhli pi putum tuku tlan xtlawanit nitlan la xlimakgolh xlatamatkan.

Akxni nilh Enoc latamapa atanu chixku tiku tlan xlikatsi: xwanikan Noé. Xla chu putum xfamilia liskujkgolh xlakata xmakgapaxuwakgolh Dios. Akgtum kilhtamaku, Jehová lakapastakli nalimin akgtum munkaklat xlakata tlan xkamasputulh tiku nitlan xlikatsikgo. Pero, ni xlakaskin nanikgo animales chu nipara Noé tiku ni xmakgatsankganani Dios. Wa xlakata wanilh pi katlawalh akgtum arca, wamputun akgtum lanka caja. Noé chu xfamilia xtanukgolh kʼarca xlakata tlan xlakgtaxtukgolh chu na xtamaknukgolh lhuwa animales nema xʼanankgo. Noé kgalhakgaxmatli Dios chu 40 o 50 kata titaxtulh xlakata tlan xtlawakgolh arca. Uma kilhtamaku, Noé «na xlichuwinama wantuku xaʼakgstitum» (2 Pedro 2:5, NM). Kamakatsinilh latamanin pi xtalakatsuwima Munkaklat, pero ni kgaxmatnikgolh. Chu chalh kilhtamaku akxni Noé chu xfamilia tanukgolh kʼarca chu animales. Dios malakchuwalh arca, chu tsukulh senan.

Uma lanka sen, makgapalalh tipuxum kilhtamaku chu tipuxum tsisni, chu Katiyatni litatsamakgolh chuchut. Kamasputukgoka putum tiku nitlan xlikatsikgo. Chuna la titaxtulh papaʼ, chuchut tsukulh skaka chu arca xakgstin sipi tamakgxtakgli. Akxni Noé chu xfamilia taxtukgolh kʼarca, xtitaxtunita akgtum kata. Noé paxtikatsinilh Jehová chu maxkilh tamakamastan. Dios wanilh Noé chu xfamilia pi nialh xʼama makamin Munkaklat xlakata xkamasputulh tuku staknankgo kKatiyatni. Limaklakaskilh chamakxkulit, Jehová wa uma tuku limasiyalh pi nialh chuna xʼama tlawa. Akxni xakxilhkgolh, latamanin xlakapastakkgolh xtachuwin xMalakatsukinakan.

Akxni xtitaxtukgonita Munkaklat, Dios kamaxkilh laksasti limapakgsin. Mastalh talakaskin tlan xwakgolh xliwa animales, pero ni xliwatkan xwanit xkgalhni. Nachuna mapakgsinalh pi latamanin xtalakgatumikgolh kxlitilanka Katiyatni. Pero, makgapitsi ni takgalhakgaxmatli uma limapakgsin, lhuwa tamakgxtakgolh kʼakgtum kachikin chu tsukulh tatlawa akgtum lanka torre chu xkapulalima Nemrod. Pero Dios lakxtlawalh tuku xtlawamakgolh. ¿La tlawalh? Tlawalh pi tiku xlamakgolh kʼuma kachikin nema pulana lilakgapaska Babel, chu alistalh Babilonia, xtsukukgolh chuwinankgo tanu tanu tachuwin. Xlakata ni xlaʼakgatekgsni, nialh tatlawalh uma taskujut chu alakatanu ankgolh.

(Takilhtinit kGénesis kcapítulos 6 asta 11 chu Judas 14, 15.)