DANIEL kajku kgawasa xwanit chu ni xmakgatsankganani Dios akxni linka kBabilonia, chu tsinu xtsankga akxni nina xmasputukan Jerusalén. Chuna la Daniel, amakgapitsi judíos tiku xkachilinkanit kBabilonia na tlan xkalikatsinikan. Akglhuwa kata nema latamalh kʼama kachikin, Dios xliputum kilhtamaku makgtayalh Daniel. Asta lakgmaxtulh xlakata ni xnilh akxni xmujukanit niku xtajumakgo leones chu maʼakxilhnilh tuku xʼama la kilhtamaku nema aku xmima. Tuku lichuwinalh Daniel nema tlakg xlakaskinka wa xlakata Mesías chu xTamapakgsin.

Kilhtamaku nema xʼama min Mesías. Daniel wanilh xkachikin Dios tukuya kilhtamaku akxni xʼama min «Pulalina Mesías». Daniel wanika pi akxni xʼamaka wankan pi nakaxtlawaparakan xpatsaps Jerusalén xʼama titaxtu 69 semanas uma wamputun pi akgatunu kilhtamaku xla semana xkilhchanima akgtum kata. Xlakata akgtum semana kgalhi akgtujun kilhtamaku, akgtum semana nema lichuwinamaw kgalhi akgtujun kata. Kata 455 a.n.J. wanka pi nakaxtlawaparakan xpatsaps Jerusalén, akxni xlatamanita Daniel. Komo kkata 455 natsukuyaw putlakgayaw 69 «semanas» wamputun, 483 kata, kitayayaw kata 29 a.x.J. ¿Tuku lalh ama kilhtamaku? Alistalh naʼakxilhaw. Daniel na makatsinika pi Mesías xʼamaka «kakan» o makgnikan xlakata kxokgolh xtalakgalhinkan putum latamanin (Daniel 9:24-26).

Mesías Mapakgsina nawan kʼakgapun. Kʼakgtum tamanaxnat, Daniel akxilhli pi xtalakatsuwima kxputawilh Dios «chatum la xkgawasa chixku» chu uma wa Mesías xwanit. Jehová xmaxki «tamapakgsin chu lilanka chu pumapakgsin», akgtum tamapakgsin nema xʼama tawila xliputum kilhtamaku. Alistalh Daniel makatsinika atanu xlakata xTamapakgsin Mesías: xMapakgsina natamapakgsinan makgapitsi tiku kawanika «xtalaksaknin Dios» (Daniel 7:13, 14, 27).

Wa xTamapakgsin Dios nakamasputu putum tamapakgsin xalak kkatiyatni. Dios tlawalh pi Daniel tlan xwa tuku xwamputun xtamanaxnat Nabucodonosor mapakgsina xalak Babilonia xlakata xla nixkatsi tuku xkilhchanima. Xla xʼakxilhnit akgtum lanka imagen nema xʼakgxakga xlitatlawanit oro, xkuxmun chu xmakxpan xlitatlawanit plata, xpan chu xʼakglhtantun o xchakgen xlitatlawanit cobre, xchaxpan o xchan xlitatlawanit hierro chu xtantun litatlawanit hierro chu tiyat. Kʼakgtum sipi xtaxtu akgtum chiwix chu xlaktala uma imagen chu laktsu laktsu xtlawa. Daniel wanilh mapakgsina pi xʼakgxakga nema xlitatlawanit oro xkilhchanima Babilonia chu amakgapitsi xkilhchanima laklanka tamapakgsin nema xʼamakgo anankgo alistalh. Xtamapakgsin Dios xʼama makgtanu akxni xʼamakgo tawilakgo xaʼawatiya tamapakgsin chu xkamasputulh putum tamapakgsin xalak katiyatni. Chu alistalh namapakgsinan xliputum kilhtamaku xlikalanka katiyatni (Daniel, capítulo 2).

Daniel makgas latamalh xlakata tlan xʼakxilhli akxni masputuka Babilonia. Chuna la xwankanit, mapakgsina Ciro akgchipalh Babilonia. Titaxtulh tsinu kilhtamaku, akxni xtakgatsima 70 kata akxni niti xlama kJerusalén, judíos taspitkgolh kxkachikinkan. Xlakata kapulalinkgolh mapakgsinanin, sacerdotes chu palakachuwinanin tiku nixmakgatsankgananikgo Dios, kaxtlawaparakgolh Jerusalén chu xtemplo Jehová. Pero ¿tuku lalh akxni titaxtulh 483 kata nema xwankanit?

(Takilhtinit kDaniel.)