¿Tuku xlakata xlakaskinka naputsananiyaw Biblia?
Chuna la titaxtunit kilhtamaku Biblia, maktum libro nema tlakg lhuwa makgpitsikanit. ¿Likgalhtawakganita wix uma lu xatlan libro? Lhuwa kata nema titaxtunit, lhuwa latamanin kamakgtayanit akxni xlipuwamakgolh chu kamaxkinit takgalhkgalhin xlakata tuku lichuwinan chu kamakgtayanit xtastakyaw. Pero, wilakgolhku lhuwa latamanin tiku nina likgalhtawakgakgo chu amakgapitsi maski kgalhikgo xtakanajlakan o nitu kgalhikgo tlakg katsiputunkgo tuku lichuwinan Biblia. Komo wix na tlakg lakgapasputuna Biblia uma folleto namakgtayayan.
PULANA wi tuku kilikatsitkan xlakata Biblia chu alistalh natsukuyaw likgalhtawakgayaw. Biblia nema na litalakgapasa Tatsokgni xaSanto, 66 laktsu libro litatlawanit. Xapula libro wanikan Génesis chu xaʼawatiya wanikan Apocalipsis o Revelación.
¿Tiku xtalakapastakni tuku tatsokgnit kBiblia? Uma lu xatlan takgalhskinin. Tipuxum lakchixkuwin tsokgkgolh Biblia chu 1,600 kata litsokgkgolh. Pero, nipara chatum wa pi xtalakapastakni tuku tsokgli. Asta chatum wa: «Xlipaks yuma ntatsokgnun, paks ntimapuwanikgolh Dios lantla natsokgkgoy wanti ntsokgkgonit» (2 Timoteo 3:16). Chu achatum na wa: «Xespíritu Jehová wa chuwinalh kinpalakata chu xtachuwin xwi kkisimakgat» (2 Samuel 23:2). Chuna la akxilhwi, tiku tsokgkgolh Biblia wankgolh pi Jehová Dios, tiku tlakg xaLanka xlikalanka kakilhtamaku wa xTalakapastakni tuku wi kBiblia. Anta kBiblia kinkawaniyan pi Jehová kinkamaxkin uma libro xlakata tlan natalakatsuwiniyaw.
Na lu xlakaskinka nakatsiyaw tema nema kgalhi Biblia: Dios nalakkaxwili akgtum tamapakgsin kʼakgapun xlakata natakatsi chu natamaxki kakni pi wa lakgchan nakamapakgsi latamanin. Kʼuma folleto nakatsiya pi wa uma tuku lichuwinan putum Biblia, litsuku Génesis chu lisputa Apocalipsis.
Kkawaniyan pi wa uma tuku nalakapastaka akxni nakatsinitilhaya tuku lichuwinan tlakg xlakaskinka libro nema anan kkakilhtamaku.
^ párr. 9 Kxatutsu makatunu página xla uma folleto chuna naʼakxilha (a.n.J.), wamputun akxni nina aʼxmin Jesús, lhuwa latamanin chuna lilakgapaskgo kilhtamaku akxni nina aʼxmin Jesús, pero Jesús skgatalh max kata 2 akxni nina a xtsuku kata 1. Chu akxni naʼakxilha (a.x.J.) wamputun akxni xminita Jesús.
Max na nalakgatiya uma
XLAKATA AKININ
¿Tuku xlakata nalikgalhtawakgaya Biblia?
Biblia kamakgtayanit millones latamanin xlikalanka katiyatni xlakata tlan nakgalhikgo xtakgalhtin xtakgalhskininkan. ¿Na lakaskina nakgalhtikana mintakgalhskinin?
