Xaʼawatiya tsisni akxni Jesús xkatawi xʼapóstoles, kawani: «Akxni kimalakastakwanikanita nawan nakkapulaniyan kʼGalilea xlakata anta natanokglhachaw» (Mateo 26:32; 28:7, 10). La uku, chalhuwa xtamakgalhtawakgen amakgo anta, pero ¿tuku natlawakgo kʼGalilea?

Anta, Pedro kawani kgalhchaxan apóstoles: «Kama skitinan». Chu xkgalhchaxankan wanikgo: «Na nakkataʼanan» (Juan 21:3). Maski chuna, putum katsisni ni chipakgo skiti o tamakgnin. Akxni kaxkgakga, Jesús katasiyani kxkilhtun pupunu, pero apóstoles ni lakgapaskgo. Wa xlakata Jesús pixlanka kawani: «Kinkamanan, ni kgalhiyatit tuku nawayatit, ¿ni xlikana?». Xlakan kgalhtinankgo: «¡Ni kkgalhiyaw!». Jesús kawani: «Kamakapitit tsalh kxpakgastakat barco, chu natekgsatit» (Juan 21:5, 6). Akxni chuna tlawakgo, tsalh litatsama lhuwa skiti pi asta nila makutukgo.

Uma kilhtamaku, Juan wani Pedro: «¡Wa Malana!» (Juan 21:7). Pedro tunkun wili klhakgat nema xtapuxtunit xlakata xchipama skiti. Taju kpupunu chu paxtawakatnan max 90 metros asta kxkilhtun pupunu chu amakgapitsin stalanitilhakgo kbarco, chu kxlhtanklimimakgo tsalh nema litsama skiti.

Akxni chankgo kxkilhtun pupunu, akxilhkgo pi anta wi «lhkuyat chu kjalanat xmapukanit skiti, chu kaxtalanchu». Jesús kawani: «Kakalitantit skiti nema aku kachipatit». Wa xlakata Pedro xwatalimin tsalh, niku tajuma 153 xalaklanka skiti. Alistalh Jesús kawani: «Katantit, chu kawayantit». Nipara chatum lakpuwan nakgalhskin ¿tiku wix?, xlakata katsikgo pi wa Jesús (Juan 21:9-12). Uma xlimakgtutu la Jesús katasiyani makgapitsi xtamakgalhtawakgen.

Jesús kamaxki xputumkan aktsu kaxtalanchu chu skiti. Alistalh, max Jesús akxilhma skiti nema wi ktsalh akxni kgalhskin Pedro: «Simón xkgawasa Juan, ¿tlakg kimpaxkiya nixawa umakgolh?». Jesús katsiputun komo Pedro tlakg xlakaskinka akxilha xtaskujut o taskujut nema Jesús lakaskin pi katlawalh. Pedro kgalhti: «Chuna, Malana, wix katsiya pi kpaxkiyan». Chu Jesús wani: «Kakamawi laktsu kiborregos» (Juan 21:15).

Alistalh, Jesús kgalhskimpara: «Simón xkgawasa Juan, ¿kimpaxkiya?». Max Pedro lilakgaputsa tsinu chu kgalhtinampara: «Chuna, Malana, wix katsiya pi kpaxkiyan». Wa xlakata Jesús amakgtum wanipara tuku xlitlawat: «Kakakuentajtlawa laktsu kiborregos» (Juan 21:16).

Xlimakgtutu, Jesús kgalhskin: «Simón xkgawasa Juan, ¿kimpaxkiya?». Max Pedro lakpuwan pi Jesús ni kanajla pi xla paxki. Wa xlakata lakatitum kgalhtinan: «Malana, wix putum katsiya; wix katsiya pi kpaxkiyan». Amakgtum Jesús wani Pedro tuku xlitlawat: «Kakamawi laktsu kiborregos» (Juan 21:17). Chuna, tiku pulalinkgo congregación xlimakgtayatkan tiku tapakgsikgo kxkachikin Dios.

Jesús chipaka chu makgnika xlakata tlawalh tuku Dios xlimapakgsinit. La uku wani Pedro pi nachuna naʼakgspula, wani: «Akxni tlakg kgawasaku xwanita, wix klhakganana chu xpina niku xpimputuna. Pero akxni nakgolona, nakastonkga mimakxpan chu atanu tiku namalhakganiyan chu nalinan niku wix ni pimputuna». Maski chuna, Jesús wani: «Chuntiya kakistalani» (Juan 21:18, 19).

Pedro akxilha apóstol Juan chu kgalhskin Jesús: «Malana, ¿tuku naʼakgspula uma chixku?». ¿Tuku naʼakgspula apóstol nema Jesús lu paxki? Jesús kgalhti: «Komo kintalakaskin pi xla nalatama asta akxni nakmin, ¿tuku xlakata wix katsiputuna?» (Juan 21:21-23). Pedro xlistalanit Jesús chu ni xlilakgaputsat tuku tlawakgo amakgapitsin. Maski chuna Jesús wan pi Juan tlakg makgas nalatama nixawa amakgapitsi apóstoles chu namaʼakxilhnikan la Jesús nataspita la chatum Mapakgsina.

Xlikana, tlakg lhuwa tuku tlawalh Jesús, pero ni anan lhuwa rollos xlakata natsokgkan putum.