Jesús kamasiyanikgonita kgalhtati apóstoles ksipi xla Olivos chu kakgalhtinita takgalhskinin nema tlawanikgolh xlakata akxni katawi nawan chu xlakata xlisputni kakilhtamaku.

Lu lakatsuku o lakgasiyu titaxtunit 11 xla nisán. Max akxni Jesús taspitma kBetania xlakata anta nalakgtunkuwi, kawani xʼapóstoles: «Wixin katsiyatit pi tsankga akgtiy kilhtamaku xlakata natatlawa Pascua, chu xKgawasa chixku namakamastakan xlakata namawakakan kkiwi» (Mateo 26:2).

Martes, kawanilh xpulalinanin takanajla kxlakatin latamanin pi nitlan tuku tlawamakgo, chu xlakan makgniputunkgo Jesús. Wa xlakata, miércoles 12 xla nisán ni katasiyani latamanin, wata akxtum katatawila xʼapóstoles niku nitu nakamaʼakglhuwi. Ni lakaskin pi wi tuku namalaktlawi nakatatlawa Pascua nema xlitatlawat lichali akxni tsankganita Chichini, akxni tsuku 14 xla nisán.

Pero xapuxku sacerdotes chu lakgkgolotsin ni kaj chuntiya tamakgxtakgkgo akxni nina lakgchan Pascua. Tamakxtumikgo kxkilhtin xchik Caifás. ¿Tuku xlakata? Lu sitsinikgonit Jesús xlakata masiyanit tuku nitlan tlawamakgo. Wa xlakata makxtum lakgo xlakata «nachipakgo Jesús chu namakgnikgo». ¿Tuku kilhtamaku chu la natlawakgo? Xlakan wankgo: «Nichuna natlawayaw akxni tlawamaka fiesta, xlakata ni nataʼakglhuwikgo latamanin» (Mateo 26:4, 5). Kapekuanikgo latamanin xlakata lhuwa tiku tatayakgo Jesús.

Ama kilhtamaku, wi tiku an kalakgapaxialhnan xpulalinanin takanajla. Kaks lilakawankgo pi chatum xʼapóstol Jesús: wa Judas Iscariote. Satanás malakpuwaninit pi namakamasta xmakgalhtawakgena. Wa xlakata Judas kakgalhskin: «¿Tuku nakimaxkiyatit komo nakkamakamaxkiyan?» (Mateo 26:15). Xlakan lakgatikgo tuku kawanimaka  chu malaknunikgo «tumin» (Lucas 22:5). ¿La xlilhuwa tumin? Xatapaxuwan maxkikgo 30 tumin xaplata, nema max xtachuna 30 siclos, wa uma xtapalh chatum skujni (Éxodo 21:32). Akxni chuna tlawakgo, xpulalinanin takanajla limasiyakgo pi lakgmakgankgo Jesús, pi ni xlakaskinka liʼakxilhkgo. Judas tsuku «lakputsa chuna la tlan xkamakamaxkilh» akxni ni xʼanankgolh lhuwa latamanin (Lucas 22:6).

Kilhtamaku 13 xla nisán tsuku miércoles akxni tsankganita Chichini. Uma xliʼakgchaxan tsisni chu xaʼawatiya tsisni nema Jesús lakgtunkuwi kBetania. Lichali, xtamakgalhtawakgen xlilakkaxtlawatkan tuku natamaklakaskin kPascua. Xliputsatkan borrego, xlimakgnitkan chu xlixpuputkan akxni aku tsukunit 14 xla nisán. ¿Niku nawakgo chu tiku nakaxtlawa? Jesús nina liwana kawani, wa xlakata Judas nila kawani xanapuxkun sacerdotes.

Max jueves akxni xtastununita, akxni xwilakgojku kBetania, Jesús kamalakgacha kkachikin Pedro chu Juan chu kawani: «Kapitit chu kakaxtlawatit tuku nawayaw kPascua». Xlakan kgalhskinkgo: «¿Niku lakaskina pi naklakkaxtlawayaw?». Jesús kawani: «Akxni natanuyatit klanka kachikin, nakatatanokglhan chatum chixku tiku lima chuchut kxalu. Kastalanitit asta kchiki niku natanu. Chu kawanitit xmalana chiki: “Makgalhtawakgena waniyan: «¿Niku wi cuarto niku tlan nakkatawa[yan] [...] kintamakgalhtawakgen?»”. Chu ama chixku nakalinan [klanka] cuarto kxlikilhmaktiy chiki. Uma cuarto kgalhiya niku tlan natawilayaw xlakata tlan anta nawayanaw» (Lucas 22:8-12).

Xmalana chiki, chatum xtamakgalhtawakgen Jesús. Max xkatsi pi Jesús xʼama makgskin xchik xlakata anta xtlawakgolh Pascua. Akxni chatiy apóstoles chankgo kJerusalén, chuna kakitaxtuni tuku Jesús xkawaninit. Wa xlakata, kuenta tlawakgo pi nitu nakitsankga xlakata xkgalhkututukan, Jesús chu kgalhkutiy xʼapóstoles, natlawakgo taway xla Pascua.