Akxni lakastakwananita Jesús, kawani 11 xʼapóstoles pi kaʼankgolh kʼakgtum sipi xalak Galilea xlakata natatamakxtumikgo. Na anta wilakgo max 500 tamakgalhtawakgen. Makgapitsi tiku anta wilakgo nina kanajlakgo pi Jesús lakastakwananit, pero tuku aku kawani kamakanajli (Mateo 28:17; 1 Corintios 15:6).

Jesús kawani pi Dios maxkinit putum limapakgsin kʼakgapun chu kKatiyatni, chu kalimapakgsi: «Kapitit chu kakamakgtayatit latamanin xliputum kachikinin xlakata kistalaninanin nawankgo, kakamunutit kxtukuwani xaTlat chu xaKgawasa chu kxtukuwani espíritu santo, kakamasiyanitit namakgantaxtikgo putum tuku kkalimapakgsinitan» (Mateo 28:18-20). Liwana tasiya pi Jesús lakastakwananit chu chuntiya lakaskin pi katalichuwinalh xalakwan tamakatsin xla Tamapakgsin.

Putum kstalaninanin Jesús, lakchixkuwin, lakpuskatin chu kamanan, kamaxkikanit taskujut pi namakgalhtawakgenankgo. Maski xtalamakgasitsinkan ni katimaxkiputunkgolh talakaskin nalichuwinankgo chu namasiyakgo, Jesús kawani: «Putum limapakgsin kimaxkikanit kʼakgapun chu kkatiyatni». ¿Tuku wamputun uma? Wampara: «¡kaʼakxilhtit!, kkatawilan chali chali asta kxlisputni kakilhtamaku». Nitu kawanima pi putum tiku namakgtlawakgo uma taskujut tlan natlawakgo milagros. Pero espíritu santo nakamakgtaya.

Jesús katasiyani xtamakgalhtawakgen «tipuxam kilhtamaku». Tipalhuwa la katasiyani chu lhuwa tuku kalimasiyani pi staknama chu kalitachuwinan «xTamapakgsin Dios» (Hechos 1:3; 1 Corintios 15:7).

Max akxni apóstoles wilakgojku kʼGalilea, Jesús kawani pi kaʼankgolh kJerusalén. Chu akxni katatamakxtumi kJerusalén kawani: «Ni nataxtuyatit kJerusalén, wata chuntiya kakgalhkgalhitit tuku malaknunit xaTlat, nema kkalitachuwinanitana; xlakata Juan, [...] chuchut limununalh pero wixin espíritu santo nakalimunukanatit nialh makgas» (Hechos 1:4, 5).

Alistalh, Jesús katatamakxtumipara xʼapóstoles chu kalin «asta kBetania», nema wi kxkasipijni Olivos (Lucas 24:50). Maski Jesús makglhuwata kawaninit pi naʼan, xlakan chuntiya lakpuwankgo pi nalakkaxwili xTamapakgsin kKatiyatni (Lucas 22:16, 18, 30; Juan 14:2, 3).

Wa xlakata, apóstoles kgalhskinkgo Jesús: «Malana, ¿kaxwilipapara xtamapakgsin Israel uma kilhtamaku?». Jesús kakgalhti: «Kajwatiya xaTlat xalak akgapun kgalhi limapakgsin xlakata nalaksaka tuku kilhtamaku chuna nala putum uma, chu ni talakaskin pi wixin nakatsiyatit xlakata tuku kilhtamaku putum chuna nala». Alistalh, kawanipara tuku xlitlawatkan: «Namakglhtinanatit litliwakga akxni espíritu santo nakalakgminan, chu nalichuwinanatit kimpalakata kJerusalén, kputum Judea chu kSamaria, chu kxlikalanka katiyatni» (Hechos 1:6-8).

Apóstoles antaku wilakgo ksipi xla Olivos, akxni kaj xalan Jesús tsuku an kʼakgapun. Chu akgtum puklhni matsekga. Lata lakastakwanalh, katasiyani xtamakgalhtawakgen la chatum lataman. La uku lakgpali xmakni nema maklakaskinit xlakata nakatasiyani chu an kʼakgapun la chatum espíritu (1 Corintios 15:44, 50; 1 Pedro 3:18). Akxni apóstoles akxilhmakgo la Jesús an, kaj xalan tayakgoyachi kxpaxtunkan «chatiy lakchixkuwin tiku maksnapapa» lhakganankgonit. Umakgolh lakchixkuwin ángeles chu kawanikgo: «Lakchixkuwin xalak Galilea, ¿tuku xlakata kaks lakapinitantit kʼakgapun? Uma Jesús tiku linka kʼakgapun, namimpara chuna la wixin akxilhtit pi alh kʼakgapun» (Hechos 1:10, 11).

Akxni Jesús an kʼakgapun ni lhuwa latamanin akxilhkgo. Kajwatiya akxilhkgo xtamakgalhtawakgen tiku ni makgxtakgkgo. Akxni nataspita, chuna «namimpara» ni lhuwa tiku nakatsikgo. Kajwatiya xtamakgalhtawakgen nakatsikgo pi xla Mapakgsina litaxtu.

 Alistalh, apóstoles taspitkgo kJerusalén, chu kilhtamaku nema titaxtu katatamakxtumikgo atanu xtamakgalhtawakgen Jesús. Chu na anta wilakgo «María xtse Jesús, chu xnatalan lakgkgawasan» (Hechos 1:14). Putum ankgalhin tlawakgo oración. Pulaktum tuku skinikgo Dios, wa pi kakamakgtayalh nalaksakkgo tiku natawila xlakgxokgo Judas Iscariote xlakata amakgtum 12 apóstoles nawankgo (Mateo 19:28). Lakaskinkgo pi tiku nalaksakkgo, wa tiku akxilhnit tuku tlawalh Jesús chu akxilhli akxni xlakastakwananita. Wa xlakata limakankgo suerte xlakata nakatsikgo tuku lakaskin Dios. Uma wa xaʼawatiya nema lichuwinan Biblia pi chuna tlawakgolh (Salmo 109:8; Proverbios 16:33). Tiku laksakkan wa Matías, max tiku xkatatapakgsi 70 xtamakgalhtawakgen Jesús nema kamalakgachalh nalichuwinankgo Dios. Lata uma kilhtamaku «na katatapakgsilh kgalhkawitu apóstoles» (Hechos 1:26).

Akgkaw kilhtamaku alistalh lata Jesús alh kʼakgapun, judíos tlawakgo Fiesta xla Pentecostés kkata 33. Uma kilhtamaku, max tamakxtumikgonit 120 xtamakgalhtawakgen Jesús kxlikilhmaktiy chiki kJerusalén. Kaj xalan wi tuku takgaxmata, xtachuna tliwakga un chu litatsama chiki. Xtamakgalhtawakgen Jesús xalan akxilhkgo pi kxʼakgstipunkan tasiyakgo la simakgat xalhkuyat. Chu putum tiku anta wilakgo tsukukgo chuwinankgo kʼatanu tachuwin. Chuna kgantaxtu xtamalaknun Jesús pi xʼamaka kamaxkikan espíritu santo (Juan 14:26).