Akxni makgapitsi judíos wankgo pi Jesús ni kgalhakgaxmata limapakgsin xla sábado xlakata mapaksalh chatum chixku uma kilhtamaku, Jesús kawani: «Wa kinTlat chuntiya skujma asta uku, chu akit na chuntiya kskujma» (Juan 5:17).

Jesús nitu lakatsalama xlimapakgsin Jehová xla sábado. Wata akxni lichuwinan Dios chu kamapaksa latamanin kaxatukawa kilhtamaku, tlawama xatlan taskujut la xTlat. Wa xlakata Jesús tlawa tuku tlan putum kilhtamaku. Pero tuku Jesús kawani uma judíos, tlakg kamakgasitsi, chu asta makgniputunkgo. ¿Tuku xlakata chuna tlawaputunkgo?

Pulana, xlakata lakpuwankgo pi Jesús ni kgalhakgaxmata limapakgsin xla sábado, chu xlipulaktiy, xlakata Jesús wan pi xKgawasa Dios. Lakpuwankgo pi lixkajnit tuku wan akxni kawani pi Dios wa xTlat, lakpuwankgo pi tatalakxtumima Dios. Pero Jesús ni pekuan chu tlakg kalitachuwinan pi lu tlan talalin Dios. Kawani: «Xlakata xaTlat paxki xaKgawasa chu masiyani putum tuku xla tlawa» (Juan 5:20).

Wa xaTlat tiku masta latamat, chuna limasiyalh makgasata akxni kamaxkilh kskujnin litliwakga xlakata xmalakastakwanikgolh makgapitsi latamanin. Wa xlakata, Jesús kawanipara: «Chuna la xaTlat kamalakastakwani tiku nikgonita chu kamaxki latamat, xaKgawasa na maxki latamat tiku xla lakaskin» (Juan 5:21). Tuku wa kinkamaxkiyan lu tlan takgalhkgalhin. La uku, tlan nawanaw pi xaKgawasa kamalakastakwanimaja tiku xanin wilakgo kxtakanajlakan. Wa xlakata wan: «Tiku kgaxmata kintachuwin chu kanajlani tiku kimalakgachanit, kgalhi latamat nema ni kgalhi xlisputni, chu ni katilakputsananika wata litaxtu chuna la tiku xninit chu la uku kgalhi latamat» (Juan 5:24).

Ni anan tuku masiya pi Jesús wi tiku xmalakastakwaninita, pero kawani tiku limawakamakgo tuku ni xaxlikana pi tiku nikgonita xlikana nalakastakwanankgo. Malaknu: «Mima kilhtamaku akxni putum tiku wilakgolh kputaknun nakgaxmatkgo xtachuwin chu nataxtukgo» (Juan 5:28, 29).

Maski lhuwa limapakgsin kgalhi, Jesús masiya pi xTlat tlakg lanka, akxni wan: «Nila tuku kiʼakstu ktlawa. [...] Ni ktlawa kintalakaskin wata xtalakaskin tiku kimalakgachalh» (Juan 5:30). Uma xliwaku akxni Jesús wan kxlakatin lhuwa latamanin pi xla wi tuku lu xlakaskinka lakgaya xlakata nakgantaxtu xtalakaskin Dios. Pero tiku limawakakgo tuku ni xlikana ni kajwatiya katsikgo tuku Jesús kawanima. Jesús kamalakapastaka: «Wixin malakgachanitit Juan [tiku xMununan] makgapitsi lakchixkuwin, chu xla lichuwinanit xaxlikana» (Juan 5:33).

Max liwana katsikgo pi kgalhi akgtiy kata lata akxni Juan katachuwinalh xpulalinanin judíos chu kawanilh pi wi tiku xʼama min, wa tiku xlakan limapakuwikgolh «Palakachuwina» chu «Cristo» (Juan 1:20-25). Wa xlakata kamalakapastaka tapaxkit nema xkgalhinikgo Juan, tiku la uku tanuma kpulachin, chu kawani: «Wixin kaj ni lhuwa kilhtamaku lu lipaxuwapututit kxkgakganat» (Juan 5:35). Pero tamakatsin nema Jesús kalitachuwinama tlakg xlakaskinka nixawa tuku mastalh Juan tiku xMununan.

Jesús wan: «Taskujut nema kilimalakgachanit kinTlat naktlawa [na anta makgtanuma pi kamapaksanit tatatlanin], wa uma limasiyakgo pi wa xaTlat tiku kimalakgachanit». Chu wampara: «Chu xaTlat tiku kimalakgachanit lichuwinanit kimpalakata» (Juan 5:36, 37). Pulaktum tuku chuna limasiya, wa tuku wa Dios akxni Jesús tamunulh (Mateo 3:17).

Tatsokgni nema judíos wankgo pi likgalhtawakgakgo, lichuwinan Jesús, wa xlakata ni kgalhikgo tuku nalikilhankgo chu nalakgmakgankgo Jesús. Xaʼawatiya Jesús kawani: «Komo xkanajlanitit Moisés, na xkinkanajlanitit, xlakata xla tsokgli kimpalakata. Pero komo ni kanajlayatit tuku xla tsokgnit, ¿la nakanajlayatit tuku kwan?» (Juan 5:46, 47).