Jesús tlan akxilha Juan Mununa, pero ¿tuku lakpuwankgo latamanin xlakata Juan? Jesús wan xpalakata latamanin xala ama kilhtamaku: «Xtachuna la laktsu kamanan nema wilakgolh kplaza niku stanankan chu katasanikgo tiku katakgamanankgo, chu wankgo: “Kkatlakgnanin flauta pero wixin ni tantlitit; lu ktasaw, pero ni limasiyatit pi xlipuwampatit”» (Mateo 11:16, 17).

¿Tuku wamputun Jesús? Xla wan: «Juan ni wayan chu ni way vino, pero latamanin wankgo: “Kgalhi demonio”. Pero xKgawasa chixku wayan chu way vino, chu latamanin wankgo: “¡Kaʼakxilhtit! Chatum chixku tiku lu puxtokgwayan chu lu lakgati way vino, lu katalalin xmatajinanin lilakgaxokgon chu tiku tlawakgo talakgalhin”» (Mateo 11:18, 19). Juan xataktujun lin xlatamat chu ni way vino xlakata nazareo, pero latamanin wankgo pi kgalhi demonio (Números 6:2, 3; Lucas 1:15). Pero xlakata Jesús wayan chu way vino, chuna la amakgapitsi latamanin, wankgo pi malakatsali. Nila kamakgapaxuwakan latamanin.

Wa xlakata, Jesús katamalakxtumi ama latamanin la laktsu kamanan tiku wilakgolh kplaza niku stanankan chu ni tantliputunkgo akxni katlakgnikan flauta nipara lipuwankgo akxni amakgapitsin tasaxnimakgo. Xla wan: «Pero tuku xaʼakgstitum tlawa chatum lataman, limasiya pi skgalala» (Mateo 11:16, 19). Chuna, tuku tlawakgo Juan chu Jesús limasiya pi tuku wankgo latamanin kaj taʼakgsanin.

Akxni lichuwinalh xlakata xtayat ama latamanin, Jesús palha kastakyawa kachikinin xla Corazín, Betsaida chu Capernaúm, niku tlawanit lhuwa milagros. Wan pi komo ama milagros xtitlawalh kkachikinin xalak Tiro chu Sidón, latamanin xalak ama kachikinin xmakgxtakgkgolh nixatlan xtayatkan. Kaks lilakawanaw pi Jesús mapakuwi Capernaúm, kachikin niku latamanit. Lhuwa latamanin xala anta ni lakgatikgo xtamasiy. Wa xlakata, wan xpalakata ama kachikin: «Wix tlakg nitlan katikitaxtunin nixawa Sodoma kKilhtamaku akxni Nalakputsanankan» (Mateo 11:24).

Alistalh, Jesús malanki xTlat xlakata kamatsekgni «tiku kgalhtawakgakgonit chu tiku lakgskgalalan» tuku lu xtapalh xla takanajla, pero kamasiyani tiku taktujukgo chuna la laktsu kamanan (Mateo 11:25). Jesús kawani tiku taktujukgo: «Kakilakgtantit, putum wixin tiku lu tlakgwanitantit chu lu tsinka mintakukakan, chu akit nakkamajaxayan. Kalipitit kimukiwi chu katlawatit chuna la akit, xlakata akit ni xaluku chu ktaktuju, komo chuna natlawayatit natatliwakglhatit. Xlakata kimukiwi ni tuwa linkan chu tuku kkaskiniyan nalipinatit ni tsinka» (Mateo 11:28-30).

Tiku pulalinkgo takanajla kawilinikgo laktuwa talismanin latamanin. Akgtum li’akxilhtit, wilikgonit laktuwa limapakgsin xlakata tuku tlan o nitlan tlawakan sábado. Pero Jesús kamasiyani xaxlikana xlakata Dios chu kalakgmaxtu k’uma nixatlan talismanin. Nachuna, tlan kamamakgkatsini tiku mapakgsinanin kamapatininamakgo chu tiku nitlan limakgkatsikgo xpalakata talakgalhin nema tlawakgonit. Kawani tuku xlitlawatkan xlakata nakatapatikan xtalakgalhinkan chu tlan natalalinkgo Dios.

Tiku namakglhtinankgo xmukiwi Jesús, nema ni tuwa linkan, tlan namakamaxkikgo xlatamatkan xalakgalhamana kinTlatkan xalak akgapun chu naskujnikgo. Uma ni tuwa, xlakata «xlimapakgsin ni akgtum takuka» (1 Juan 5:3).