Jesús lhuwa tuku tlawanit chu lu tlakgwanit. Akxni tsiswan, kawani xtamakgalhtawakgen: «Kaʼaw kxakilhtutu pupunu», wamputun kxakilhtutu niku wi kachikin xla Capernaúm (Marcos 4:35).

Amakgo kxakilhtutu pupunu xalak Galilea niku taxtu Chichini, kxtiyat gerasenos, niku lilakgapaskan Decápolis. Kachikinin xalak Decápolis kgalhikgo xtalismaninkan chu xtachuwinkan griegos, pero na wilakgo lhuwa judíos.

Latamanin akxilhkgo pi Jesús taxtu kkachikin Capernaúm, chu amakgapitsi barcos na tsukukgo patakutkgo pupunu (Marcos 4:36). Xakilhtutu pupunu ni lu makgat wi. Pupunu xalak Galilea pulhman, 21 kilómetros xlilhman chu 12 kilómetros xlitilanka, xchuchut xtachuna chuchut xalak kgalhtuchokgo.

Maski Jesús ni kgalhi talakgalhin, lu tlakgwanit xlakata lhuwa tuku tlawanit uma kilhtamaku. Wa xlakata, akxni barco tsuku tlawan, an tama kxtankgen barco, liʼakxtikatnan akxtikat chu lhtata.

Makgapitsi apóstoles liwana katsinikgo linkgo barco, pero la uku tuwa tuku natitaxtukgo. Kxlimakgstilili pupunu xalak Galilea wilakgolh lhuwa sipi, chu lu taliwaka xlichichi chuchut. Akxni xakgawiwi un nema taxtuyacha klaklanka sipi lu lakapala takta chu snokga xachichi chuchut, tlawa pi lakapala naʼanan unisen chu talhman natakgayawa chuchut. Wa uma tuku lay. Taʼakgayawana tsuku snokga barco, chu barco tsuku «litatsama chuchut» chu takgtsiputun (Lucas 8:23). ¡Pero Jesús chuntiya lhtatama!

Lakchixkuwin fuerzajtlawanikgo xlakata barco ni nataʼakgtsi, chuna la tlawakgonit atanu kilhtamaku. Pero la uku nila tuku tlawakgo. Tsukukgo pekuankgo, lakgankgo Jesús chu tasaskinikgo: «¡Malana, kakilalakgmaxtuw, xlakata nakmuxtuyaw!» (Mateo 8:25). Xtamakgalhtawakgen pekuamakgo, ni muxtuputunkgo.

Akxni Jesús stakwanan, kawani: «¿Tuku xlakata lu pekuampatit? ¡Lu ni lhuwa mintakanajlakan!» (Mateo 8:26). Chu kilhni un, chu wani pupunu: «¡Kgalhtsekg! ¡Katakaksti!» (Marcos 4:39). Nialh unan chu pupunu tunkun takaksa. (Marcos chu Lucas tsokgwilikgolh uma tuku lalh. Pulana lichuwinankgo milagro nema tlawalh Jesús, chu alistalh pi xtamakgalhtawakgen ni xkgalhikgo lhuwa takanajla).

¡Kalilakpuwanti la kaks lilakawankgolh tamakgalhtawakgen! Aku akxilhkgolh la Jesús makaksalh tliwakga unisen. Ama kilhtamaku xtamakgalhtawakgen tsukukgo pekuankgo xlakata tuku akxilhkgonit chu tsukukgo lawanikgo: «¿Tiku uma chixku? Asta un chu pupunu kgalhakgaxmatnikgo». Alistalh, tlan chankgo kxakilhtutu pupunu chu nitu lanikgo (Marcos 4:41–5:1). Max amakgapitsi barcos taspitkgo niku xtaxtukgonit.

Lu tlan kinkamamakgkatsiniyan pi xKgawasa Dios kgalhi litliwakga xlakata tlan makaksa unisen chu pupunu. Akxni xla namapakgsinan kKatiyatni, putum latamanin nakgalhikgo takaksni, xlakata nialh katiʼanalh tuku masputunan.