Lakgtsokgkinanin chu fariseos tiku chuntiya ni kanajlakgo pi Jesús kalitamakxtu demonios xlitliwakga Dios, xtachuna la lixkajni lichuwinamakgo espíritu santo. Wa xlakata xlilaksakatkan tiku natatayakgo: Dios o Satanás. Wa xlakata Jesús kawani: «Komo litaxtuyatit xatlan kiwi, namastayatit xatlan tawakat; pero komo litaxtuyatit nixatlan kiwi, namastayatit xamasni tawakat, xlakata kgantum kiwi xtawakat lilakgapaskan» (Mateo 12:33).

Ni xlilat nawankgo pi xatlan tawakat nema masta Jesús akxni katamakxtu demonios wa xlakata taskujma Satanás. Jesús masiyalh kxTaʼakgchuwin xalak Sipi pi xamasni kiwi ni masta xatlan tawakat. Pero ¿tuku masiya xtawakatkan fariseos, uma wamputun, ta’akgsanin nema limawakakgo Jesús? Pi xamasni. Wa xlakata Jesús palha kastakyawa: «Xkamanan luwa, wixin lixkajni likatsiyatit ¿la tlan wanatit lakwan tachuwin? Xlakata tuku litsama naku wa tuku taxtuyacha kkilhni» (Mateo 7:16, 17; 12:34).

Uma xlikana: tuku wanaw masiya tuku wi kkinakujkan, chu nakinkaliputsananikanan uma. Jesús chuna masiya akxni wan: «Kkawaniyan pi lakchixkuwin namastakgo kuenta kKilhtamaku akxni Nalakputsanankan xlakata putum tuku nalichuwinankgo nema nitu litaxtu; xlakata mintachuwin xaʼakgstitum nalimaxtukana, chu xlakata mintachuwin nalimalakgaxokgekana» (Mateo 12:36, 37).

Maski Jesús xtlawama milagros nema kaks malakawaninan, lakgtsokgkinanin chu fariseos wanikgo: «Makgalhtawakgena, kakxilhputunaw tuku nalimasiyaya pi Dios malakgachanitan» (Mateo 12:38, 39). Maski uma xpulalinanin takanajla akxilhkgonit o ni akxilhkgonit xmilagros Jesús, latamanin tiku akxilhkgonit umakgolh milagros kalitachuwinankgonit. Wa xlakata Jesús kawani: «Laklixkajni latamanin xla uma kilhtamaku chu tiku makgxtakgkgonit Dios akxilhputunkgo akgtum milagro, pero ni katikamasiyanika, kajwatiya milagro nema akgspulalh palakachuwina Jonás» (Mateo 12:38, 39).

Alistalh Jesús kawani tuku wamputun uma: «Chuna la Jonás xwi kxpulakni lanka skiti akgtutu kilhtamaku chu akgtutu katsisni, nachuna xKgawasa chixku natawila kxtampin katiyatni akgtutu kilhtamaku chu akgtutu katsisni». Jonás xwi kxpulakni tantum skiti, pero akxni taxtulh xtachuna la xlakastakwananit. Jesús maklakaskin uma xlakata nalichuwinan pi nani chu nalakastakwanan xliʼakgtutu kilhtamaku. Akxni chuna nala, xpulalinanin takanajla nalakgmakgankgo «milagro nema akgspulalh palakachuwina Jonás», xlakata ni katilakgpaliputunkgolh xlatamatkan (Mateo 27:63-66; 28:12-15). ¡Nipara tsinu xtachunakan latamanin xalak Nínive! Xlakan nitlan limakgkatsikgolh xtalakgalhinkan akxni Jonás kalitachuwinalh Dios, wa xlakata, xliʼakxilhtit uma kachikin natlawa pi Israel ni natapatikan. Jesús na lichuwinan mapakgsina xalak Seba, xliʼakxilhtit uma mapakgsina limasiya pi umakgolh latamanin ni katikatapatika.  Uma puskat lakgapaxialhnalh Salomón xlakata nakgaxmata xliskgalala chu kaks lilakawa. Pero Jesús wan: «Unu wi tiku tlakg xlakaskinka nixawa Salomón» (Mateo 12:40-42).

Jesús tamalakxtumi latamanin «xla uma kilhtamaku» la chatum chixku tiku laktaxtu demonio (Mateo 12:45). Xlakata uma chixku ni lakpuwan tuku tlan akxni nixatlan espíritu taxtuni, uma espíritu kalimin akgalhatujun espíritus nema tlakg lixkajnit likatsikgo. Xtachuna, kachikin Israel xmaskulunkikanit chu xmasastikanit. Pero titaxtulh kilhtamaku lakgmakgankgolh xpalakachuwinanin Jehová chu la uku lakgmakgamakgo Jesús, tiku kgalhi xʼespíritu Dios. Uma tlawa pi tlakg nitlan natawilakgo nixawa xapulana.

Akxni Jesús chuwinamajku chinkgo xtse chu xnatalan chu tayakgo kxchakgenkan latamanin. Wa xlakata makgapitsi tiku lakatsu wilakgo wanikgo: «Mintse chu minatalan lakgkgawasan yakgolh kkilhtin chu akxilhputunkgoyan». Ama kilhtamaku Jesús limasiya la xlilhuwa katalalin xtamakgalhtawakgen, nema xla kaliʼakxilha la xnatalan chu xnatsitni. Kalakglakan xtamakgalhtawakgen chu wan: «Kintse chu kinatalan wa uma tiku kgaxmatkgo xtachuwin Dios chu makgantaxtikgo» (Lucas 8:20, 21). Chuna limasiya pi maski xlakaskinka kaʼakxilha xfamilia, tlakg xlakaskinka akxilha la katalalin xtamakgalhtawakgen. Akinin na lu tlan limakgkatsiyaw pi tlan katalalinaw kinatalankan tiku watiya takanajla kgalhikgo la akinin, liwaka akxni amakgapitsi latamanin nitlan kinkalichuwinankgoyan o wankgo tuku nitlan kaj xlakata tlawayaw tuku tlan.