Akxni mapaksanita kgawasa tiku xlaktanuma demonio anta kCesarea xalak Filipo chu akxni Jesús kamaʼakxilhninita xʼapóstoles xlilanka, an kCapernaúm. Kajwatiya kataʼan xtamakgalhtawakgen xlakata niti nakatsi (Marcos 9:30). Uma maxki talakaskin xlakata chuntiya nakamasiyani xlakata taskujut nema natlawakgo akxni xla ninita nawan. Jesús kawani: «Wa xKgawasa chixku namakamastakan kxmakankan lakchixkuwin, chu namakgnikan chu xliʼakgtutu kilhtamaku namalakastakwanikan» (Mateo 17:22, 23).

Ni xlilat pi kaks nalilakawankgo uma. Jesús kawaninita pi namakgnikan, maski Pedro ni kanajla (Mateo 16:21, 22). Chu kgalhtutu xʼapóstoles akxilhkgolh akxni talakgpalilh la xtasiya kkasipijni chu kgaxmatkgolh pi xlichuwinamakgo xlakata «nialh makgas xʼama an» (Lucas 9:31). La uku xtamakgalhtawakgen lu lilipuwankgo tuku kalitachuwinanit Jesús, maski ni akgatekgskgo putum tuku kawaninit (Mateo 17:23). Maski chuna ni kgalhskinkgo.

Alistalh, chankgo kCapernaúm, anta niku tamakgxtakga Jesús chu niku lakachinkgonit makgapitsi xʼapóstoles. Anta, lakchixkuwin tiku matajinankgo lilakgaxokgon xalak templo talakatsuwinikgo Pedro, max xlakata nalimawakakgo pi Jesús ni xokgo lilakgaxokgon, tlawanikgo akgtum takgalhskinin «¿Ni xokgo mimakgalhtawakgenakan lilakgaxokgon?» (Mateo 17:24).

Pedro kawani pi xokgo. Akxni wilakgolha kchiki, Jesús litachuwinan Pedro tuku kgalhskinkgolh lakchixkuwin: «¿Tuku lakpuwana Simón? Lilakgaxokgon nema makglhtinankgo mapakgsinanin xalak katiyatni, ¿tiku kamaxkikgo? ¿Wa xkamanankan o atanu?». Pedro kgalhti: «Atanu». Wa xlakata Jesús wani: «Uma wamputun pi kamanan ni xlimastatkan lilakgaxokgon» (Mateo 17:25, 26).

Xtlat Jesús wa tiku Mapakgsi putum tuku anan chu wa Dios nema kakninanikan kTemplo. Wa xlakata, xkgawasa Dios ni lakgchan namasta lilakgaxokgon xalak templo. Pero Jesús wani Pedro: «Xlakata ni nakamaʼakgchakgxniyaw, kapit kpupunu, kamakapi anzuelo chu kamakutu xapulana skiti nema nachipaya, chu akxni namakgalhpitsiya, natekgsa okgxtum tumin xla plata [akgtum estater o tetradracma]. Katiya chu kakamaxki kimpalakata chu mimpalakata» (Mateo 17:27).

Alistalh, akxni xtamakgalhtawakgen akxtum wilakgo, lakgankgo Jesús chu kgalhskinkgo tiku tlakg xlakaskina nalitaxtu kTamapakgsin. Pulana ni xkgalhskimputunkgo xlakata tuku xʼama lay akxni xnilh, pero la uku kgalhskinkgo xlakata tuku nakaʼakgspula alistalh. Jesús katsi tuku lakpuwamakgo. Wa uma tuku xlichuwinamakgo akxni xtaspitmakgo kCapernaúm. Wa xlakata kakgalhskin: «¿Tuku xlitakglhuwipatit ktiji?» (Marcos 9:33). Xtamakgalhtawakgen maxanankgo, chu nitu wankgo xlakata xlalimakglhuwimakgo xlakata tiku tlakg xlakaskinka. Alistalh, litachuwinankgo tuku xlitakglhuwimakgo: «¿Tiku xlikana tlakg xalanka litaxtu kTamapakgsin xalak akgapun?» (Mateo 18:1).

Lu kaks malakawaninan pi xtamakgalhtawakgen lalimakglhuwimakgolh xlakata tiku tlakg xlakaskinka maski akgtutu kata la akxilhkgonit chu kgaxmatnikgonit Jesús. Maski chuna, xlakan makglakgalhinanin chu stakkgonit niku lu xlakaskinka akxilhkan tiku kgalhi limapakgsin. Nachuna, nina makgas Jesús malaknunilh Pedro pi xʼama maxki «llaves» xla Tamapakgsin. ¿Tlakg xlakaskinka makgkatsikan Pedro xlakata uma  nixawa amakgapitsin? Max Santiago chu Juan chuna makgkatsikgo xlakata akxilhkgolh akxni Jesús lakgskgolh chu tasiyalh xlilanka.

Maski ni liwana katsiyaw tuku xlakata, Jesús kastakyawa. Tasani chatum aktsu kgawasa, anta yawa kxlakgstipankan xtamakgalhtawakgen chu kawani: «Komo ni nalakgpaliyatit putum mintayatkan, chu nalikatsiyatit chuna la laktsu kamanan, ni katitanutit kTamapakgsin xalak akgapun. Wa xlakata, putum tiku nataktuju chuna la uma aktsu kgawasa, wa tlakg xalanka kTamapakgsin xalak akgapun; chu putum tiku makgamakglhtinan chatum aktsu kgawasa kkintukuwani, na kimakgamakglhtinama akit» (Mateo 18:1-5).

¡Lu tlan la masiyalh! Jesús ni kasitsini chu ni kawani pi lhuwa tuku kgalhiputunkgo. Wata maklakaskin chatum aktsu kgawasa xlakata wi tuku nakamasiyani. Xpalakata laktsu kamanan ni anan tiku tlakg xlakaskinka chu tiku tlakg kgalhi limapakgsin. Jesús kamasiyani pi xlalikatsinitkan chuna la kamanan lalikatsini. Wa xlakata kawani: «Tiku likatsi la ni xlakaskinka kmilakgstipankan, wa tiku tlakg xlakaskinka litaxtu» (Lucas 9:48).