Pakganacha kBetsaida, Jesús tlawalh milagro xlakata xkamawilh lhuwa mil latamanin chu alistalh alakatanu alh xlakata mapakgsina xtlawaputunkgo. Katsisni kgalhtlawalh chuchut chu lakgmaxtulh Pedro, tiku na kgalhtlawalh chuchut chu alistalh tsukulh lakgtsankga xlakata xlajwanalh xtakanajla. Jesús na makaksalh un, max xlakata xtamakgalhtawakgen nitu xlanikgolh.

Jesús wilapa kxaʼakilhtutu pupunu lakatsu kCapernaúm. Latamanin tiku kamawilh tatanokglhkgolh chu kgalhskinkgolh: «¿Tuku kilhtamaku chita unu?». Jesús palha kastakyawa xlakata putsakgo kaj xlakata nakamawipara. Kawani pi kaliskujkgolh «taway nema ni lakxla chu masta latamat nema ni kgalhi xlisputni» chu ni wa «taway nema lakxla». Akxni kgaxmatkgo uma, xlakan kgalhskinkgo: «¿Tuku kilitlawatkan xlakata Dios tlan nakinkaʼakxilhan?» (Juan 6:25-28).

Akxni kgalhskinkgo uma max lakpuwamakgo tuku skin Limapakgsin, pero Jesús kalitachuwinama tuku tlakg xlakaskinka: «Wa uma tuku militlawatkan xlakata Dios tlan nakaʼakxilhan: nalimasiyayatit pi kanajlaniyatit tiku xla malakgachanit». Pero latamanin ni kanajlanikgo. Maski lhuwata tuku tlawanit skinikgo katlawalh akgtum milagro xlakata nakanajlanikgo. Kgalhskinkgo: «¿Tuku milagro natlawaya xlakata nakakxilhaw chu nakkakanajlaniyan? ¿Tuku natlawaya? Xalakgmakgan kinatlatnikan wakgolh maná kxakaskakni tiyat, chuna la tatsokgnit: “Kaxtalanchu xalak akgapun kalimawilh”» (Juan 6:29-31; Salmo 78:24).

Xlakata nakakgalhti, Jesús kawani tiku tlawa pi kalalh uma milagros: «Lu xlikana kkawaniyan pi Moisés ni kamaxkin kaxtalanchu xalak akgapun, pero kinTlat kamaxkiyan xaxlikana kaxtalanchu xalak akgapun. Xlakata kaxtalanchu nema masta Dios wa tiku taktanitanchi kʼakgapun chu kamaxki latamat latamanin». Pero xlakata ni akgatekgskgo tuku kawaniputun, tasaskinikgo: «Malana, putum kilhtamaku kakilamaxkiw uma kaxtalanchu» (Juan 6:32-34). Pero ¿tuku kilhchani kaxtalanchu nema lichuwinama Jesús?

Xla kawani: «Akit kaxtalanchu xla latamat. Putum tiku nakilakgmin, nikxni katitsinkspa, chu putum tiku nalimasiya pi kinkanajlani nikxni katikgalhputipa. Pero chuna la kkawanin: wixin kiʼakxilhnitantit, pero maski chuna ni kanajlayatit. [...] Xlakata ktaktanitanchi kʼakgapun xlakata naktlawa, ni kintalakaskin, wata wa xtalakaskin tiku kimalakgachanit. Wa uma xtalakaskin tiku kimalakgachanit, ni nakmakgatsankga nipara chatum ama tiku xla kimakamaxkinit, wata nakkamalakastakwani kxaʼawatiya kilhtamaku. Xlakata wa uma xtalakaskin kinTlat: pi putum tiku namakgamakglhtinan xaKgawasa chu nalimasiya pi kanajlani, nakgalhi latamat nema ni kgalhi xlisputni» (Juan 6:35-40).

Akxni judíos kgaxmatkgo uma, sitsikgo chu tsukukgo lichuwinankgo Jesús. ¿Tuku xlakata wan pi xla «kaxtalanchu nema taktanitanchi kʼakgapun»? (Juan 6:41). Xlakan lakpuwankgo pi kaj xkgawasa akgtum tamakgaxtokgat xalak Nazaret. Wa xlakata kgalhskininankgo: «¿Ni wa uma Jesús, xkgawasa José, chu lakgapasaw xtlat chu xtse?» (Juan 6:42).

Akxni akxilha la kgalhtinankgo Jesús kawani: «Nialh kalitaʼakglhuwitit. Nila tiku nakilakgmin komo ni wa kinTlat tiku kimalakgachanit natlawa pi nakilakgmin, chu akit nakmalakastakwani kxaʼawatiya kilhtamaku. Tatsokgnit kxtatsokgnikan Palakachuwinanin: “Xputumkan wa Jehová nakamasiyani”. Putum tiku kgaxmatninit xaTlat, chu katsininit, kilakgmin. Ni wamputun pi chatum chixku akxilhnit xaTlat; tiku akxilhnit xaTlat kajwatiya wa tiku malakgachanit Dios. Lu xlikana kkawaniyan pi putum tiku nakanajla kgalhi latamat nema ni kgalhi xlisputni» (Juan 6:43-47; Isaías 54:13).

Akxni Jesús litachuwinalh Nicodemo latamat nema ni kgalhi lisputni tamalakxtumilh takanajla nema kgalhinikan xKgawasa chixku, uma kilhchanima xachastum xKgawasa Dios. Jesús wa pi putum tiku nakanajlanikgo xKgawasa Dios, nakgalhikgo latamat  nema ni kgalhi xlisputni (Juan 3:15, 16). Pero xlakata la uku lhuwa tiku katachuwinama kawani pi kaj xpalakata xla tlan namakglhtinankgo latamat nema ni kgalhi xlisputni, tuku maná nila kamaxkilh chu kaxtalanchu xalak Galilea na nila kamaxki. Wa xlakata, Jesús kawanipara la tlan namakglhtinankgo latamat chu kawani: «Akit kaxtalanchu xla latamat» (Juan 6:48).

Uma takgalhchuwin xlakata kaxtalanchu xalak akgapun ni unu kgalhsputa, wata Jesús tlakg lichuwinan uma ksinagoga xalak Capernaúm.