Titaxtunita akgtum kata a itat lata Juan Mununa wa pi Jesús xBorrego Dios. Akxni Jesús matsukilh xtaskujut kkatiyatni, makgapitsi lakchixkuwin tsukukgolh stalanikgo. Makgapitsi wa Andrés, Simón Pedro, Juan, max nachuna Santiago (xtala Juan), Felipe chu Natanael (tiku na wanikan Bartolomé). Chu chuna la titaxtulh kilhtamaku, lhuwa amakgapitsin na stalanikgolh (Juan 1:45-47).

La uku chanit kilhtamaku xlakata Jesús nakalaksaka x’apóstoles, tiku nataskujkgo chu nakamamakgatawakga. Pero pulana, Jesús an k’akgtum sipi nema max lakatsu wi kpupunu xalak Galilea, lakatsu kCapernaúm. Anta tantaskaka tlawani oración xTlat, max skinima liskgalala chu xtasikulunalin. Lichali, katasani xlimakgalhtawakgat chu kalaksaka kgalhkutiy xlakata x’apóstoles nalitaxtukgo.

Jesús kalaksaka kgalhchaxan tiku xapulana kalichuwinaw chu Mateo, xmatajina lilakgaxokgon. Amakgapitsin kgalhkitsis wa Judas (nema na wanikan Tadeo o «xkgawasa Santiago»), Simón tiku cananita, Tomás, Santiago xkgawasa Alfeo chu Judas Iscariote (Lucas 6:16; Mateo 10:2-4).

Uma kgalhkutiy lakchixkuwin lhuwata kilhtamaku talapulakgo Jesús, wa xlakata xla liwana kalakgapasa. Makgapitsi asta xtalilakgapasni. Santiago chu Juan max xnatapuxnimatni. Chu komo xlikana tuku makgapitsi lakpuwankgo, pi Alfeo xtala xwanit José, xtlat Jesús, tlan wanaw pi Santiago, xkgawasa Alfeo, na xtapuxnimat Jesús.

Jesús xkatsi xtukuwani putum x’apóstoles. ¿Chu wix? ¿Lakapastaka xtukuwani kgalhkutiy apóstoles? Tuku namakgtayayan wa nakatsiya pi xwilakgo chatiy tiku xkawanikan Simón, chatiy tiku xkawanikan Santiago chu chatiy tiku xkawanikan Judas. Makgapitsi apóstoles natalan xwankgonit: Simón Pedro chu Andrés, nachuna Santiago chu Juan, xkamanan Zebedeo. Komo nakatsiya uma, nalakapastaka xtukuwani kgalhtsayan apóstoles. Amakgapitsin wa Mateo, xmatajina lilakgaxokgon; Tomás, tiku ni kanajlalh pi Jesús xlakastakwananit; Natanael, tiku Jesús akxilhli kxtampin xakiwi higo, chu Felipe, x’amigo Natanael.

Kgalhkawitu xalak Galilea xwankgonit, niku Jesús stakli. Natanael xalak Caná. Felipe, Pedro chu Andrés xalak Betsaida, maski alistalh, Pedro chu Andrés ankgolh kCapernaúm, niku max xlama Mateo. Santiago chu Juan na xlamakgo kCapernaúm o lakatsu, chu anta kskujkgo la skitinanin. Chu max kaj Judas Iscariote, tiku alistalh makamastalh Jesús, xalak Judea xwanit.