Max Jesús wi kCapernaúm akxni kastakyawa fariseos. Alistalh, watiya ama kilhtamaku, taxtu kchiki niku tamakgxtakgma chu an kpupunu xalak Galilea nema lakatsu wi. Akxni chan latamanin lakgtastokgkgo. Xla tawaka kbarco, tamakgatli tsinu kxkilhtun pupunu, chu tsuku kamasiyani xlakata Tamapakgsin xalak akgapun. Maklakaskin liʼakxilhtit nema latamanin lakgapaskgo xlakata ni tuwa naʼakgatekgskgo tipalhuwa tuku xaxlikana xlakata Tamapakgsin.

Xapulana liʼakxilhtit nema kalitachuwinan wa xla chixku tiku chananama. Makgapitsi talhtsi tamakgo ktiji chu tsiktsi o chakglhni wakgo. Makgapitsi tamakgo kkachiwixni, niku ni lhuwa tiyat anan. Akxni pun, nila pulhman makan xtankgaxekg, wa xlakata akxni Chichini taxtu, xnakgkgo chu skakkgo. Amakgapitsi talhtsi tamakgo kkalhtukunin, chu akxni pun, lhtukun malankgakgo. Xaʼawatiya, makgapitsi talhtsi tamakgo kxakatlan tiyat, chu mastakgo xtawakat: makgapitsi mastakgo akgtum ciento nixawa tuku chanka, atanu, tutupuxam chu, atanu, puxamakaw (Mateo 13:8).

Jesús kalitachuwinan atanu liʼakxilhtit chu kawani pi xTamapakgsin Dios xtachuna akxni chatum chixku chan talhtsi. Kʼuma liʼakxilhtit, talhtsi pun chu xʼakstu staka, maski chixku lhtatama o ni, «xla ni katsi chuna la stakma» (Marcos 4:27). Talhtsi nema pun masta xtawakat, chu alistalh chixku makgala.

Alistalh, Jesús kalitachuwinan xlipulaktutu liʼakxilhtit nema na lichuwinan tachanan. Kalitachuwinan chatum chixku tiku chan kxpukuxtu xatlan talhtsi. Pero akxni putum lhtatamakgo, chatum talamakgasitsin chan kxlakgstipan trigo nixatlan tuwan. Xlakskujnin chixku kgalhskinkgo komo lakaskin napulhukgo nixatlan tuwan, pero xla kakgalhti:  «Ni, xlakata max akxni napulhuyatit nixatlan tuwan, na nakatapulhuyatit trigo. Kamakgxtakgtit pi lakxtum kastakkgolh asta akxni namakikan tachanan, chu asta akxniku nakkawani tiku makikgo tachanan: Pulana kamamakxtupitit ni xatlan tuwan chu kakapachitit xlakata nakalhkuyuyatit; alistalh kamakitit trigo niku makikan kintamakgalan» (Mateo 13:24-30).

Lhuwa tiku kgaxmatnimakgo Jesús katsikgo la skujkan kkapukuxtun. Wa xlakata kalitachuwinan atanu tuku na lakgapaskgo: xtalhtsi mostaza. Kawani pi uma talhtsi lanka kiwi wan, chu asta tsiktsi tawilakgo kxpakganin. Xlakata uma talhtsi, Jesús kawani: «Tamapakgsin xalak akgapun xtachuna la akgtum aktsu xtalhtsi mostaza nema chixku chalh kxpukuxtu» (Mateo 13:31). Jesús ni lichuwinama uma liʼakxilhtit xlakata masiyaputun la chankan xtalhtsi mostaza. Wata kamasiyanima pi tuku lu aktsu tlan nastaka chu tlan lanka nawan.

Alistalh, Jesús kalitachuwinan atanu liʼakxilhtit nema lu lakgapaskan xlakata wi tuku nakamasiyani xlakata Tamapakgsin. Tamalakxtumi Tamapakgsin «la limaxkutin nema tiyalh chatum puskat chu talakgwilhalh lhuwa harina» (Mateo 13:33). Maski limaxkutin ni tasiya akxni talakgwilhakan harina, tlawa pi skitit nastaka chu natalakgpali maski ni tunkun tasiya.

Akxni kalitachuwinankgonita uma akgkitsis liʼakxilhtit, Jesús kawani latamanin pi kataspitkgolh chu xla taspita kchiki niku tamakgxtakgma. Chu xtamakgalhtawakgen talakatsuwinikgo xlakata katsiputunkgo tuku wamputun tuku kalitachuwinanit.

Xtamakgalhtawakgen kgaxmatkgonit liʼakxilhtit nema lichuwinanit atanu kilhtamaku, pero la uku, tlakg lhuwa maklakaskinit. Wa xlakata kgalhskinkgo: «¿Tuku xlakata maklakaskina liʼakxilhtit akxni katachuwinana?» (Mateo 13:10).

Pulaktum wa xlakata nakgantaxtu tuku xlichuwinankanita, chuna la wan Mateo kxʼEvangelio: «Ni xkatachuwinan komo ni xmaklakaskin liʼakxilhtit, xlakata xkgantaxtulh tuku xlichuwinanit palakachuwina akxni wa: “Akxni nakchuwinan nakmaklakaskin liʼakxilhtit; naklichuwinan tuku tsekg wi lata makgasa”» (Mateo 13:34, 35; Salmo 78:2).

Pero Jesús na maklakaskin liʼakxilhtit xlakata nakatsi tuku xlikana lakpuwankgo latamanin. Lhuwa lakgankgo kaj xlakata lakgatikgo kgaxmatkgo tuku xla lichuwinan chu xlakata tlawa milagros, pero ni akxilhkgo la xMalanakan, ni lakpuwankgo pi talakaskin nakgaxmatnikgo chu nastalanikgo (Lucas 6:46, 47). Ni lakgpaliputunkgo xlatamatkan chu xtapuwankan. Liwana tasiya pi ni lakaskinkgo nakalakgchan xtamasiy Jesús kxnakujkan.

Akxni xtamakgalhtawakgen kgalhskinkgo tuku xlakata kalitachuwinan lhuwa liʼakxilhtit, xla kawani: «Kmaklakaskin liʼakxilhtit akxni kkatachuwinan; xlakata lakawanankgo pero nitu akxilhkgo, kgaxmatkgo pero ni akgatekgskgo tuku kgaxmatmakgolh, chu ni katsikgo tuku kilhchanima. Chu tuku timalakpuwanilh Dios Isaías kgantaxtuma kxlatamatkan. Niku wan: “[...] Xnakujkan umakgolh latamanin xatsakat wanit”» (Mateo 13:13-15; Isaías 6:9, 10).

Pero ni putum tiku kgaxmatnikgo Jesús chuna likatsikgo. Xla kawani xtamakgalhtawakgen: «Wixin paxuwayatit, xlakata tlan akxilhatit chu kgaxpatatit putum uma. Xlikana kkawaniyan, lhuwa palakachuwinanin chu xaʼakgstitum lakchixkuwin lu xʼakxilhputunkgo tuku wixin akxilhpatit, pero xlakan ni akxilhkgolh, chu xkgaxmatputunkgo tuku wixin kgaxpatpatit, pero ni kgaxmatkgolh» (Mateo 13:16, 17).

 Chuna, 12 xʼapóstoles chu amakgapitsi xtamakgalhtawakgen xlikana katsiputunkgo tuku Jesús masiya. Wa xlakata kawani: «Wixin kamaxkikanatit talakaskin naʼakgatekgsatit tuku tsekg wi xla Dios xpalakata Tamapakgsin xalak akgapun, pero xlakan ni kamaxkikan talakaskin naʼakgatekgskgo» (Mateo 13:11). Xlakata akgatekgsputunkgo liʼakxilhtit nema kgaxmatkgonit, Jesús kawani tuku wamputun liʼakxilhtit xla chanana.

Tsuku kawani: «Talhtsi wa xtachuwin Dios» (Lucas 8:11). Chu tiyat wa xnakujkan latamanin. Uma pulaktiy lu xlakaskinka xlakata naʼakgatekgskan liʼakxilhtit.

Xlakata talhtsi nema tamacha ktiji, Jesús kawani pi «wa tiku kgaxmatkgonit, chu alistalh min Akgskgawini chu mapanu tachuwin nema wi kxnakujkan xlakata ni nakanajlakgo chu ni nalakgtaxtukgo» (Lucas 8:12). Akxni lichuwinan talhtsi nema tamacha kkachiwixni, Jesús lichuwinama tiku xatapaxuwan makglhtinankgo tachuwin, pero ni kgalhi pulhman tankgaxekg kxnakujkan. Wa xlakata, akxni kalakgchin «taʼakglhuwit o taputsastalanit xpalakata xtachuwin Dios», tunkun makgatsankgakgo xtakanajlakan. Chu «akxni kaliʼakxilhkan», max xalak xfamilia o atanu latamanin kaputsastalanikgo, makgxtakgkgo xaxlikana (Mateo 13:21; Lucas 8:13).

¿Chu talhtsi nema tamacha kkalhtukunin? Jesús wan pi wa tiku kgaxmatkgo tachuwin, pero mastakgo talakaskin pi «tuku lilakgaputsakan kʼuma kakilhtamaku chu xlitliwakga tumin nema akgskgawinan [na]malakglankga xtachuwin Dios» (Mateo 13:22). Maski pulana makglhtinankgo tachuwin, alistalh ni mastakgo tawakat xlakata nialh xlakaskinka akxilhkgo tuku xla Dios.

Xaʼawatiya, Jesús lichuwinan kxakatlan tiyat. Uma wa tiku kgaxmatkgo tachuwin chu makgamakglhtinankgo xlakata akgatekgskgo tuku xlikana wamputun. Chu mastakgo «tawakat». Pero xlakata tanu xkatakan o xlakata kgalhikgo tajatat,  ni putum watiya xlilhuwa tawakat mastakgo. Makgapitsi mastakgo akgtum ciento nixawa tuku chanka, atanu, tutupuxam chu atanu, puxamakaw. Dios kasikulunatlawa «tiku kgalhikgo lu xatlan naku chu akxni kgaxmatkgonit tachuwin, ni makgxtakgkgo chu linkgo tawakat chu tayanikgo» (Lucas 8:15).

Tuku kawani max kaks kamalakawani tamakgalhtawakgen tiku kgalhskinkgo Jesús xlakata tuku wamputun liʼakxilhtit. La uku tlakg liwana akgatekgskgo. Jesús lakaskin pi liwana kaʼakgatekgskgolh xlakata tlan nakamasiyanikgo xaxlikana amakgapitsin latamanin. Kawani: «Ni mapasikan akgtum makgskgot chu liʼakgtalakan canasta, o wilikan kxtampin putama, ¿ni xlikana? Wata wilikan niku talhman». Chu alistalh kamaxki uma tastakyaw: «Tiku tlan kgaxmata, kakgaxmatli» (Marcos 4:21, 23).

Maski kgaxmatkgonit tuku wamputun liʼakxilhtit xla chanana, tamakgalhtawakgen tlakg katsiputunkgo. Wa xlakata wanikgo Jesús: «Kakilamaʼakgatekgsniw tuku kilhchanima liʼakxilhtit xlakata nixatlan tuwan xalak pukuxtu» (Mateo 13:36).

Xlakata skinkgo uma, tasiya pi xtayatkan nixtachuna la tiku xwilakgo kxkilhtun pupunu. Latamanin kgaxmatnikgo Jesús, pero ni katsiputunkgo tuku kilhchanima xliʼakxilhtit, nipara tuku masiyaputun. Lipaxuwakgo maski kaj aktsu tuku naʼakgatekgskgo. Jesús wan pi tiku xwilakgo kxkilhtun pupunu nixtachuna xtamakgalhtawakgen, tiku tlakg katsiputunkgo. Kawani:

«Kuentajkatlawatit tuku kgaxpatatit. Chuna la kalikatsiniyatit amakgapitsin, nachuna nakalikatsinikanatit, chuna, asta nakamaliwakanikanatit» (Marcos 4:24). Xlakata tamakgalhtawakgen kuentajtlawamakgo tuku Jesús kawani chu tlakg katsiputunkgo, xla tlakg kamasiyani. Wa xlakata, akxni wanikgo pi kakawanilh tuku wamputun liʼakxilhtit xla trigo chu nixatlan tuwan, Jesús kawani:

«Tiku chan xatlan talhtsi wa xKgawasa chixku; pukuxtu wa kakilhtamaku. Xatlan talhtsi, wa xkamanan Tamapakgsin, pero nixatlan tuwan wa xkamanan tiku lixkajni likatsi, chu talamakgasitsin tiku chalh wa Akgskgawini. Tamakgalan wa xkgalhsputni akgtum kakilhtamaku, chu tiku makikgo tachanan wa ángeles» (Mateo 13:37-39).

Akxni kawaninita tuku kilhchanima pulakatunu tuku lichuwinalh kxliʼakxilhtit, Jesús kawani tuku nala xkgalhsputni kakilhtamaku: tiku makikgo tachanan, wa ángeles, tanu nawilikgo tiku litaxtukgo nixatlan tuwan chu tanu nawilikgo tiku xlikana «xkamanan Tamapakgsin». «Tiku xaʼakgstitum» nakalinkan chu «lu namakaxkgakgenankgo chuna la chichini kxTamapakgsin xTlatkan». ¿Chu tuku nakaʼakgspula xkamanan tiku lixkajni likatsi? Nakamalakgsputukan, wa xlakata «natasakgo chu namalaksanikgo xtatsankan» (Mateo 13:41-43).

Alistalh, Jesús kawilinipara akgtutu liʼakxilhtit. Xapulana wa uma: «Tamapakgsin xalak akgapun  xtachuna la tuku lhuwa xtapalh nema tsekg wi kpukuxtu nema chatum chixku tekgsli chu matsekgli; chu xlakata lu paxuwa, an chu sta putum tuku kgalhi chu tamawa ama pukuxtu» (Mateo 13:44).

Xliʼakgtiy liʼakxilhtit wa uma: «Tamapakgsin xalak akgapun xtachuna chatum stana tiku putsapula xalaktlan perlas. Akxni tekgsli akgtum perla nema lhuwa xtapalh, lakapala alh chu stalh putum tuku xkgalhi, chu tamawalh» (Mateo 13:45, 46).

Jesús maklakaskin uma akgtiy liʼakxilhtit xlakata namasiya pi talakaskin wi tuku namakgxtakgaw xlakata nakgalhiyaw tuku xlikana xtapalh. Stana «stalh putum tuku xkgalhi» xlakata natamawa akgtum perla nema lhuwa xtapalh. Tamakgalhtawakgen ni tuwa akgatekgskgo uma liʼakxilhtit. Chu chixku tiku tekgsli tuku lhuwa xtapalh nema tsekg xwi kpukuxtu na stalh putum tuku xkgalhi xlakata natamawa ama pukuxtu. Kʼumakgolh akgtiy liʼakxilhtit, Jesús lichuwinan pulaktiy tuku lu xtapalh nema lakchixkuwin xliputsatkan chu xtapalh xliʼakxilhatkan. Tuku xlakan tlawakgo xtachuna tuku akinin tlawayaw xlakata natalakatsuwiniyaw Dios (Mateo 5:3). Kxkilhtamaku Jesús, makgapitsi tiku kgaxmatnimakgo tlawakgonita lanka talakgpalit xlakata xtamakgalhtawakgen nalitaxtukgo chu natalakatsuwinikgo Dios (Mateo 4:19, 20; 19:27).

Xaʼawatiya, Jesús tamalakxtumi Tamapakgsin xalak akgapun la akgtum tsalh nema mujukan kpupunu chu makutu tipalhuwa skiti (Mateo 13:47). Akxni chan kilhtamaku nalaksakkan skiti, xalaktlan mujukan kcanasta chu tuku nixalaktlan makgankan. Jesús masiya pi kxlisputni uma kakilhtamaku nachuna nala: ángeles nakalaksakxtukgo tiku lixkajni likatsikgo kxlakgstipankan tiku xaʼakgstitum.

Akxni Jesús kawanilh xtamakgalhtawakgen pi xlitaxtukgolh “xputsananin latamanin la putsakan skiti”, xla xkaputsamaja latamanin (Marcos 1:17). Pero wan pi liʼakxilhtit xla tsalh, nakgantaxtu kkilhtamaku nema aku mima, kxlisputni kakilhtamaku (Mateo 13:49). Wa xlakata, apóstoles chu tamakgalhtawakgen tiku kgaxmatmakgo akxilhkgo pi wijku tuku lu xlakaskinka nema nakgantaxtu.

Xlakan tlakg lhuwa tuku katsikgo nixawa tiku kgaxmatnikgolh Jesús kxkilhtun pupunu, xlakata Jesús kamasiyani “akxni xʼakstu katawi” (Marcos 4:34). Jesús xtachuna «chatum chixku, xmalana chiki, tiku makutu niku maki tuku lhuwa xtapalh nema xalaksasti chu xalakgwan» (Mateo 13:52). Jesús ni lichuwinan umakgolh liʼakxilhtit xlakata namasiya pi xla tlan makgalhtawakgena, wata maklakaskin xlakata nakamasiyani xtamakgalhtawakgen tuku xaxlikana nema lu xtapalh. Xlikana, ni anan atanu makgalhtawakgena la xla.