Jesús lina akgtiy kata lata lichuwinama Dios, pero ni lakpuwan pi xlijaxata. Wata tsuku latapuli «kxliputum kachikinin chu laktsu kachikinin» xalak Galilea, masiyama ksinagogas chu lichuwinama xatlan tamakatsin xla Tamapakgsin chu mapaksama tipalhuwa tajatat chu takatsan (Mateo 9:35). Tuku akxilha akxni lichuwinan Dios, malakpuwani pi talakaskin tlakg lhuwa tiku nakamasiyani. Pero ¿la namakgantaxti?

Chuna la lapula, Jesús akxilha pi latamanin maklakaskinkgo tamakgtay xlakata xtakanajlakan chu tlan nakamamakgkatsinikan, xlakata litaxtukgo la borregos nema ni kgalhikgo xmapuchwayaninakan. Jesús kalakgalhaman. Wa xlakata kawani xtamakgalhtawakgen: «Tachanan lu lhuwa, pero skujnin ni chalhuwa. Wa xlakata, lu kaskinitit xMalana tachanan pi kakamalakgachalh tiku namakikgo xtachanan» (Mateo 9:37, 38).

Xlakata tlakg lhuwa tiku nakamakgtaya, Jesús kamapapitsi 12 xʼapóstoles, chu lichatiyun kamalakgacha xlakata nalichuwinankgo Dios chu kawani: «Ni nalakpinatit kxtijikan akgmakgat kachikinin chu nipara natanuyatit kxkachikinin samaritanos; wata chuntiya, kakalakgpitit xaʼakgtsankgan borregos xalak kxchik Israel. Akxni napinatit lichuwinanatit Dios, kawantit: “Tamapakgsin xalak akgapun talakatsuwinit”» (Mateo 10:5-7).

Tamapakgsin nema xlimasiyatkan watiya nema Jesús lichuwinalh kʼoración xla padrenuestro. Uma Tamapakgsin «talakatsuwinit», xlakata tiku Dios laksaknit la Mapakgsina, Jesucristo, anta katawi. Wa xlakata, ¿la nalimasiyakgo xtamakgalhtawakgen  pi xpalakachuwinanin uma Tamapakgsin? Litliwakga nema kamaxki Jesús, nakamakgtaya xlakata nakamapaksakgo tatatlanin chu nakamalakastakwanikgo tiku nikgonita. Ni xlimatajinatkan akxni natlawakgo uma. Pero ¿la natlawakgo xlakata nakgalhikgo tuku namaklakaskinkgo?

Jesús kawani pi ni talakaskin nalinkgo tuku namaklakaskinkgo akxni naʼankgo lichuwinankgo Dios. Ni talakaskin nalinkgo oro chu plata nipara cobre. Na ni talakaskin nalinkgo liwat nema nawakgo ktiji, nipara makatiyun xlhakgatkan, nipara xtatunukan. ¿Tuku xlakata? Xlakata chuna la kawani Jesús, «skujni minini namaxkikan xliwat» (Mateo 10:10). Xtamakgalhtawakgen natekgskgo tiku xtapalh naʼakxilhkgo tamakatsin chu nakamaxkikan tuku namaklakaskinkgo. Jesús kawani: «Akxni natanuyatit kʼakgtum chiki, anta katamakgxtakgtit asta akxni nataxtuyatit kʼama kachikin» (Marcos 6:10).

Jesús na kamasiyani la nalichuwinankgo Tamapakgsin akxni naʼankgo akgatunu chiki. Kawani: «Akxni natanuyatit, kakawanitit tiku xalak chiki: “Kakgalhitit takaksni”. Komo tiku xalak chiki kaminini, kakgalhikgolh mintakaksnikan; pero komo ni kaminini, kakalakgtaspitparan mintakaksnikan. Kaniwa niku ni nakamakgamakglhtinankanatit chu ni nakgaxmatkan mintachuwinkan, akxni nataxtuyatit kʼama chiki o kachikin, katinkxaktitit pokgxni kmintantunkan» (Mateo 10:12-14).

Max putuminika akgtum kachikin ni katimakgamakglhtinalh xtamakatsinkan. ¿La nakitaxtuni uma kachikin? Jesús wan pi nakamalakgaxokgekan. Kawani: «Kilhtamaku akxni Nalakputsanankan tlakg nitlan katikitaxtunilh ama kachikin nixawa Sodoma chu Gomorra» (Mateo 10:15).