Akxni xʼapóstoles Jesús lichuwinamakgo Dios kʼGalilea, Juan Mununa, tiku lakkaxwili tiji xlakata nachin Jesús, chuntiya wi kpulachin. Akgtiy kata lata tanuma anta.

Juan liwana wani mapakgsina Herodes Antipas pi nitlan pi tawi Herodías, xlakata xla wa xpuskat xtutala Filipo. Herodes wan pi kgalhakgaxmata Limapakgsin xla Moisés, pero xlakata makgxtakgli xapulana xpuskat xlakata natatamakgaxtokga Herodías lakatsalama Limapakgsin chu tlawama talakgxtumit xalimaxana. Xlakata Juan wanilh pi nitlan tuku tlawama, Herodes matamaknuninalh kpulachin, max xlakata Herodías mafuerzajlinilh.

Xlakata latamanin liʼakxilhkgo Juan la chatum palakachuwina, Herodes ni katsi tuku natlawani (Mateo 14:5). Pero Herodías liwana katsi tuku tlawaniputun. Lu sitsini Juan, asta makgniputun (Marcos 6:19). Chu akgtum kilhtamaku, tekgsa la natlawa tuku lakpuwama.

Akxni xtalakatsuwima Pascua kkata 32, Herodes tlawa akgtum lanka taway xlakata makgatsima xkata. Kawani kaminkgolh lakchixkuwin tiku xkalakgayawanit nakamapakgsikgo amakgapitsin, comandantes tiku pulalinkgo soldados chu tiku lu xlakaskinka xlitaxtukgo kʼGalilea. Ama kilhtamaku, chatum tsumat wanikan Salomé, xtsumat Herodías chu Filipo, tsuku tantli. Putum tiku anta wilakgo lu lakgatikgo la tantli.

Herodes na lu lakgati la tantlilh xtutsumat, wa xlakata wani: «Kakiskini tuku lakaskina chu nakmaxkiyan». Asta malaknuni: «Nakmaxkiyan tuku wix nakiskiniya, asta itat tuku kmapakgsi». Salomé an kgalhskin xtse la nakgalhtinan chu wani: «¿Tuku kskini?» (Marcos 6:22-24).

¡Wa uma tuku lu xkgalhkgalhima! Ni makgtiy lakpuwan chu wani: «Xʼakgxakga Juan Mununa». Tsumat lakapala an niku wi Herodes chu wani: «Klakaskin pi tunkun kakimaxki xʼakgxakga Juan Mununa kpakglanka pulatu» (Marcos 6:24, 25).

Uma lu makgalipuwan Herodes. Pero tiku xtawayamakgolh kgaxmatkgonit tuku malaknulh, wa xlakata, komo ni tamamaxaniputun xlimakgantaxtit xtachuwin, maski uma wamputun namakgni chatum chixku tiku nitu tlawanit. Wa xlakata, Herodes malakgacha ksoldado anta niku wi Juan chu limapakgsi pi katlawalh tuku skinimaka. Alistalh, soldado limin xʼakgxakga Juan kpakglanka pulatu, maxki Salomé chu xla maxki xtse.

Akxni xtamakgalhtawakgen Juan katsikgo tuku lanit, ankgo putsakgo xmakni, maknukgo chu wanikgo Jesús tuku lanit.

Alistalh, akxni Herodes kgaxmata pi Jesús kamapaksama tatatlanin chu katamakxtuma demonios, ni katsi tuku nakanajla. Katsiputun komo chixku tiku tlawama uma milagros wa Juan Mununa chu komo “malakastakwanikanit kkalinin” (Lucas 9:7). Wa xlakata lu akxilhputun Jesús, pero ni xlakata kgaxmatputun tuku masiyama. Kaj katsiputun komo xlikana tuku lakpuwama.