Jesús wi kDecápolis, kxʼeste pupunu xalak Galilea. Lhuwa tiku lakgankgonit xlakata nakgaxmatnikgo chu nakamapaksa chu linkgo xtawaykan klaklanka canastas.

Chan kilhtamaku akxni Jesús kawani xtamakgalhtawakgen: «Kkalakgalhaman umakgolh latamanin, xlakata akgtututa kilhtamaku kintawilakgolh chu ni kgalhikgo tuku nawakgo. Komo nakkamalakgacha kxchikkan chu ni wayankgonit, nataxlajwanitayakgo ktiji, chu makgapitsi lu makgat minkgonitancha». Pero xtamakgalhtawakgen wanikgo: «Lu makgat niku lamaw, ¿niku tlan natekgsaw kaxtalanchu nema nalikgalhkgaskgo umakgolh lhuwa latamanin?» (Marcos 8:2-4).

Jesús kawani: «¿Niku maklit kaxtalanchu kgalhiyatit?». Xlakan kgalhtikgo: «Maktujun, chu kaj makgapitsi laktsu skiti» (Mateo 15:34). Jesús kawani latamanin pi katawilakgolh katutsu. Tiya kaxtalanchu chu skiti, tlawani oración Dios chu kamaxki xtamakgalhtawakgen xlakata nakamaʼakgpitsinikgo latamanin. ¡Putum wayankgo asta akxni kgalhkgaskgo! Chu akgataxtu patujun laklanka canasta, maski wayankgonit 4,000 lakchixkuwin, nachuna lakpuskatin chu kamanan.

Akxni chuna lanita, Jesús kawani latamanin pi kataspitkgolh, pero xla chu xtamakgalhtawakgen patakutkgo pupunu kʼakgtum barco xlakata nachankgo kMagadán, kxʼoeste pupunu xalak Galilea. Akxni chan anta, makgapitsi fariseos chu saduceos putsananikgo Jesús chu wanikgo pi katlawalh akgtum milagro nema nalimasiya pi Dios malakgachanit.

Xla katsi tuku tlawaputunkgo chu kawani: «Akxni tsiswamaja wixin wanatit: “Chali natakaki, xlakata spinini akgapun”, chu lakatsisa wanatit: “Uku nalonkgnan chu nasenan, xlakata spinini akgapun pero tapuklhnit”. Katsiyatit wantuku kilhchanima chuna la tasiya akgapun, pero nila akgatekgsatit tuku kilhchanima limasiy xla uma xlakaskinka kilhtamaku» (Mateo 16:2, 3). Alistalh kawani pi ni katikamasiyanika akgtum milagro, kajwatiya xlimasiyakan Jonás.

Jesús chu xtamakgalhtawakgen tajukgo kbarco chu ankgo kBetsaida, knoreste kxkilhtun pupunu. Akxni amakgo, xtamakgalhtawakgen akxilhkgo pi kaj maktum kaxtalanchu linkgo. Wa xlakata, Jesús lakapastaka tuku aku kawanilh fariseos chu saduceos nema tatayakgo Herodes chu wi tuku kalistakyawa: «Kuentajkatlawatit ni nakapasayan xlimaxkutinkan fariseos chu xlimaxkutin Herodes». Akxni xtamakgalhtawakgen kgaxmatkgo uma, lakpuwankgo pi lichuwinama limaxkutin xlakata ni liminkgolh kaxtalanchu. Jesús akxilha pi ni akgatekgsnikgonit, chu kakgalhskin: «¿Tuku xlakata litaʼakglhuwipatit kaxtalanchu?» (Marcos 8:15-17).

Nina makgas, Jesús kamawilh lhuwa mil latamanin, wa xlakata xtamakgalhtawakgen xlikatsitkan pi Jesús ni lilakgaputsama kaxtalanchu. Jesús kakgalhskin: «¿Nialh lakapastakatit akxni klakgchakgalh makkitsis kaxtalanchu xlakata xwayankgolh akgkitsis mil lakchixkuwin? ¿Niku palit  canastas matsamatit akxni maʼakgstokgkgotit xatalakgchakgataman kaxtalanchu?». Xlakan kgalhtikgo: «Pakutiy». Jesús kawanipara: «Chu akxni klakgchakgalh maktujun kaxtalanchu xlakata xwayankgolh akgtati mil lakchixkuwin, ¿niku palit laklanka canastas matsamatit akxni maʼakgstokgkgotit xatalakgchakgataman kaxtalanchu?». Xlakan kgalhtikgo: «Patujun» (Marcos 8:18-20).

Alistalh Jesús kakgalhskin: «¿Tuku xlakata ni akgatekgsatit pi ni xakkalitachuwinaman kaxtalanchu?». Chu alistalh kawani pi kuenta katlawakgolh ni nakapasa «xlimaxkutinkan fariseos chu saduceos» (Mateo 16:11).

Xtamakgalhtawakgen akgatekgskgolh tuku wamputun. Limaxkutin limastakakan harina nema litlawakan kaxtalanchu. Wa xlakata, Jesús tamalakxtumi limaxkutin tuku nitlan. Xla kawanima pi kuenta katlawakgolh xlakata ni nakapasa xtamasiykan fariseos chu saduceos, xlakata uma tamasiy kalaktlawa latamanin (Mateo 16:12).