Jesús chu kstalaninanin xlichuwinantilhakgo “xatlan tamakatsinin ksinagogas kxliputum Galilea”, chu xatlan tamakatsin xlakata tuku tlawa katsikan kaxanikawa (Marcos 1:39). Asta chankgo niku lama chatum tiku kgalhi lepra. Makuchina Lucas lichuwinan alistalh pi uma chixku «xlitsama lepra» (Lucas 5:12). Chuna la taliwakatilha uma tajatat, tsinu tsinu tsuku lixkajnit tasiya makni.

Chixku lu snunanita chu nila katalakatsuwini amakgapitsin. Xlakata niti lu natalakatsuwini chu napasa uma tajatat, Limapakgsin wan pi pixlanka xliwanat: «¡Xataxkajwani, xataxkajwani!» (Levítico 13:45, 46). Pero ¿tuku tlawa chixku tiku kgalhi lepra akxni akxilha Jesús? Talakatsuwini, tatsokgosta chu tasaskini: «Malana, komo xlakaskinti, tlan xkimapaksa» (Mateo 8:2).

Uma chixku ¡lu kanajlani Jesús! ¡Max lilakgalhamanat tasiya! ¿Tuku tlawa Jesús akxni akxilha uma? ¿Tuku xtlawa wix? Jesús lu lakgalhaman chu asta stonkga xmakan, xama chu wani: «¡Klakaskin! Kapaksti» (Mateo 8:3). Nila takanajla, pero lepra kaj xalan putuminika tapanuni.

¿Ni xlikana pi lakaskina chatum mapakgsina tiku xalakgalhamanina chu tliwakga chuna la Jesús? Chuna la Jesús likatsini uma chixku tiku snun tatatla, liwana kinkamasiyaniyan pi akxni namapakgsinan kKatiyatni nakgantaxtu uma tamalaknun: «Nalakgalhaman tiku ni tlankajwa chu tiku limaxkgen, chu nalakgmaxtu xlatamatkan tiku lakglimaxkgenin» (Salmo 72:13). Chuna, akxni nachan kilhtamaku, Jesús namakgantaxti tuku xla lakaskin, nakamakgtaya putum latamanin tiku patinamakgo.

Chuna la akxilhwi, latamanin kaks lilakawankgo tuku Jesús lichuwinan maski nina xtlawa uma milagro. Chu la uku na nakatsikgo pi mapaksanit tiku xkgalhi lepra. Pero Jesús ni lakaskin pi latamanin nakanajlanikgo kaj xlakata tuku kgaxmatkgonit. Lakgapasa tuku xlichuwinankanit pi xʼama lay, pi xla ni xʼama lichuwinan kkatijin tuku xʼama tlawa kaj xlakata xmalankika (Isaías 42:1, 2). Wa xlakata wani chixku tiku aku mapaksalh: «Niti nalitachuwinana, wata kapit, kalakgpi sacerdote chu kamakamasta tamaskiwin chuna la wi kxLimapakgsin Moisés» (Mateo 8:4).

Pero chixku lu paxuwama xlakata paksnita chu nila matsekga tuku lanit. An chu kalitachuwinan putum latamanin tuku Jesús tlawanit xpalakata, chu uma tlawa pi latamanin tlakg nakatsiputunkgo. Uma tlawa pi Jesús nialhla natanu kʼakgtum kachikin chu naʼakxilhkan, wa xlakata tamakgxtakga makgapitsi kilhtamaku anta niku niti lama. Maski chuna, latamanin xalak lakalhuwa kachikin chuntiya lakgmimakgo xlakata nakgaxmatnikgo chu nakamapaksa.