Titaxtunita makgapitsi kilhtamaku lata Jesús lichuwinama Dios, liwaka kʼGalilea, niku latamanin tlakg tlan makgamakglhtinankgonit xtamakatsin nixawa kJudea. Akgtum liʼakxilhtit, akxni mapaksalh chatum chixku kkilhtamaku sábado kJerusalén, judíos xmakgniputunkgo (Juan 5:18; 7:1).

La uku septiembre o max octubre kkata 32, chu talakatsuwima Fiesta xla Laktsu Chiki. Uma fiesta masiya pi sputnita la makikan tachanan, latamanin lu paxuwakgo chu paxtikatsinikgo Dios. Akgtujun kilhtamaku makgapala, chu xliʼakgtsayan kilhtamaku tlawakan lanka tamakxtumit.

Santiago, Simón, José chu Judas, xtunatalan Jesús, wanikgo: «Kataxtu chu kapit kJudea». Israel kakninanikgo Dios kJerusalén chu lu tatsamakan makgtutu akgatunu kata akxni tlawakan fiesta. Xtunatalan Jesús wanikgo: «Niti kaj xatsekg wi tuku tlawa akxni lakaskin pi nalakgapaskan. Katlawa putum uma kxlakatin latamanin» (Juan 7:3, 4).

Uma xtunatalan Jesús ni kanajlakgo pi xla Mesías litaxtu. Maski chuna, lakaskinkgo pi tiku naʼankgo kfiesta kaʼakxilhkgolh makgapitsi milagros nema tlawa Jesús. Pero xla katsi pi kalipekua wili xlatamat komo naʼan chu wa xlakata kawani: «Ni anan tuku xlakata kakilhtamaku ni nakaʼakxilhputunan wixin, pero akit ni kiʼakxilhputun, xlakata klichuwinan tuku nitlan tlawakgo. Wixin kapitit kfiesta; akit nina ktiʼalh kfiesta, xlakata nina chan kinkilhtamaku» (Juan 7:5-8).

Akxni xtitaxtunita makgapitsi kilhtamaku lata xtunatalan Jesús xkataʼankgonit amakgapitsin latamanin, Jesús chu xtamakgalhtawakgen tsekg ankgo, xlakata niti nakaʼakxilha. Chipakgo tiji nema tlakg lakatsu, nema titaxtu kSamaria, chu ni pakgankgo niku latamanin lismanikgo pakgankgo, tiji nema wi kxpaxtun kgalhtuchokgo Jordán. Talakaskin natamakgxtakgkgo kSamaria, wa xlakata Jesús kamapuli makgapitsi makatsininanin xlakata nalakkaxwilikgo tuku talakaskin. Pero latamanin xalak akgtum aktsu kachikin nitlan kamakgamakglhtinankgo xlakata katsikgo pi Jesús ama kJerusalén xlakata namakgtlawa xfiestajkan judíos. Santiago chu Juan lu lisitsikgo uma chu kgalhskinkgo Jesús: «Malana, ¿lakaskina nakskinaw pi kataktachi lhkuyat kʼakgapun chu kakamalakgsputulh?» (Lucas 9:54). Jesús kawani pi nitlan tuku skimakgo, chu alistalh tiyaparakgo xtijikan.

Ktiji, chatum lakgtsokgkina wani Jesús: «Makgalhtawakgena, nakstalaniyan anta niku wix napina». Xla kgalhti: «Wekgni kgalhikgo klhukukan, chu tsiktsi xalak akgapun kgalhikgo xmasakgakan, pero xKgawasa chixku ni kgalhi niku namajaxa xʼakgxakga» (Mateo 8:19, 20). Tuku wani limasiya pi lakgtsokgkina natitaxtu tuku tuwa komo xtamakgalhtawakgen wamputun. Pero uma chixku tlankajwa  chu nichuna latamaputun. ¿Chu akinin? ¿Tuku nalimakgxtakgaw xlakata nastalaniyaw Jesús?

Alistalh, Jesús wani atanu chixku: «Kistalanina kawanti». Pero chixku kgalhtinan: «Malana, kimaxki talakaskin pulana nakkan maknu kintlat». Jesús katsi la wi xlatamat uma chixku, wa xlakata wani: «Kamasta talakaskin pi tiku nikgonita kamaknukgolh xninkan, pero wix kapit chu kaniwa kalichuwinanti xTamapakgsin Dios» (Lucas 9:59, 60). Liwana tasiya pi xtlat uma chixku nina niy. Komo xtlat aku nilh, uma kgawasa ni xtachuwinalh Jesús. Tasiya pi uma chixku nila pulana wili xTamapakgsin Dios.

Akxni chuntiya amakgo kJerusalén, tatanokglhparakgo atanu chixku nema wani Jesús: «Nakstalaniyan, Malana, pero pulana kimaxki talakaskin nakan kawani tiku xalak kinchik pi kama». Jesús wani: «Nipara chatum chixku tiku lakgwaxnama kpukuxtu chu lakgtalakgaspita tuku makgxtakga kxchakgen minini natanu kxTamapakgsin Dios» (Lucas 9:61, 62).

Tiku xlikana xtamakgalhtawakgen litaxtuputunkgo Jesús, pulana xliwilitkan xTamapakgsin Dios kxlatamatkan. Tiku lakgwaxnanan, ankgalhin kxlakatin akxilha, komo ni chuna natlawa, max ni tanks katilakgwaxnanalh. Chu komo namakgenu tuku lilakgwaxnanama chu natalakgaspita, ni katimasputulh tuku tlawama. Xtachuna, tiku lakglipuwankgo tuku makgxtakgkgolh kkakilhtamaku, max naʼakgchakgxkgo chu nataxtutayakgo ktiji nema linan klatamat nema nikxni katisputli.