Akxni xmapaksanita tiku nila xtlawan, Jesús tamakgxtakga makgapitsi kilhtamaku kCapernaúm, lakatsu kpupunu xalak Galilea. Amakgtum lhuwa latamanin lakgtalakatsuwikgo, chu xla kamasiyani. Akxni titaxtuma niku lakgaxokgonankan, akxilha pi anta wi Mateo, tiku na limapakuwikan Leví, chu wani uma: «Kistalanina kawanti» (Mateo 9:9).

Mateo max liwana katsi tuku tlawanit chu masiyanit Jesús kʼuma kachikin, chuna la katsikgo Pedro, Andrés, Santiago chu Juan. Xtachuna la uma kgalhtati kstalaninanin Jesús, Mateo lakapala stalani Jesús. Evangelio nema tsokgli, xla lichuwinan pi «tayalh chu stalanilh» (Mateo 9:9). Wa xlakata makgxtakga xtaskujut chu kstalanina Jesús litaxtu.

Alistalh, xlakata max nalimasiya pi paxtikatsini talakgalhaman nema limasiyanilh Jesús, Mateo tlawa lanka taway kxchik. Wani pi kaʼankgolh Jesús, kstalaninanin Jesús chu makgapitsi tiku xkataskuja xapulana, atanu xmatajinanin lilakgaxokgon. Uma latamanin matajinankgo tuku lakkaxwilinit mapakgsina xalak Roma nema judíos ni akxilhputunkgo. Makgapitsi tiku kamatajikgo, wa barcos nema chinkgo kxkilhtun pupunu, stananin nema tlawankgo klaklanka tiji chu na matajinankgo xlakata listat nema liminkan xalak atanu kachikin. ¿Tuku kalakpuwanikgo amakgapitsi judíos umakgolh latamanin? Ni kaʼakxilhputunkgo, xlakata min kilhtamaku kaʼakgskgawimakglhtikgo xtuminkan latamanin akxni tlakg tapalaxla matajinankgo. Kʼuma taway na minkgonit makglakgalhinanin, latamanin tiku nitlan limakgo xlatamatkan (Lucas 7:37-39).

Akxni akxilhkgo pi Jesús katawayama uma latamanin, fariseos, tiku lakpuwankgo pi xlakan tlakg tlan latamanin nixawa amakgapitsin, kakgalhskinkgo kstalaninanin Jesús: «¿Tuku xlakata mimakgalhtawakgenakan katawayamakgolh xmatajinanin lilakgaxokgon chu tiku tlawakgo talakgalhin?» (Mateo 9:11). Xlakata Jesús kgaxmatma, kawani: «Tiku ni tatatlakgo ni maklakaskinkgo makuchina, pero tiku tatatlakgo maklakaskinkgo makuchina. Kapitit, chu kaʼakgatekgstit tuku wamputun umakgolh tachuwin: “Klakaskin talakgalhaman, chu ni wa tamakamastan”. Xlakata ni kminit katasani tiku xaʼakgstitum, wata wa tiku tlawakgo talakgalhin» (Mateo 9:12, 13; Oseas 6:6). Maski fariseos wankgo pi Jesús makgalhtawakgena, ni xlikana chuna lakpuwankgo. Pero talakaskin pi Jesús lhuwa tuku nakamasiyani xlakata la tlawakan tuku xaʼakgstitum.

Max Mateo kawaninit xmatajinanin lilakgaxokgon chu makglakgalhinanin xlakata nakgaxmatnikgo Jesús chu tlan natawila xtakanajlakan, xlakata lhuwa umakgolh latamanin stalanimakgo Jesús (Marcos 2:15). Chu Jesús kamakgtayaputun xlakata tlan natalalinkgo Dios. Jesús ni kalakgmakgan uma latamanin la tlawakgo fariseos, wata kalakgalhaman. Jesús xtachuna makuchina nema tlan nalakgankgo tiku nitlan wi xtakanajlakan.

Jesús kalakgalhaman xmatajinanin lilakgaxokgon chu makglakgalhinanin, pero ni wamputun pi katataya xtalakgalhinkan, wata kalakgalhaman chuna la kalakgalhaman tiku tatatlakgo. Kalakapastakti akxni lu lakgalhamalh tiku xkgalhi lepra chu wanilh «¡Klakaskin! Kapaksti» (Mateo 8:3). Akinin na kiliskujatkan xlakata nalakgalhamaninanaw chu nakamakgtayayaw tiku maklakaskimakgo tamakgtay, liwaka komo xla xtakanajlakan.