Akxni xlichuwinanita kxchik Simón pi Dios tapatinan talakgalhin, Jesús tsukupara lichuwinan Dios kxlikalanka Galilea. Uma wa xliʼakgtiy kata lata masiyama xlakata Dios, chu la uku taʼankgo 12 xʼapóstoles chu makgapitsi lakpuskatin «tiku xkatamakxtunikanit demonios chu xkamapaksakanit xtajatatkan» (Lucas 8:2). Makgapitsi wa María Magdalena, Susana chu Juana, xpuskat tiku xkuentajtlawa xchik mapakgsina Herodes Antipas.

Chuna la tlakg lakgapaskan Jesús, tlakg litaʼakglhuwikan tuku tlawa. Akgtum li’akxilhtit, wa tuku lay akxni mapaksa chatum chixku tiku kgalhi demonio, ni lakawanan chu kgokgo. Akxni latamanin akxilhkgo pi chixku nialh kgalhi demonio chu tlantiya lakawanan chu chuwinan, kaks lilakawankgo chu kgalhskininankgo: «¿Pi ni max wa uma xKgawasa David?» (Mateo 12:23).

Lhuwa latamanin stiliwilikgonit chiki niku wi Jesús, wa xlakata nipara xla chu xtamakgalhtawakgen tlan wayankgo. Pero ni putum lakpuwankgo pi Jesús wa tiku xwankanit pi «xKgawasa David» x’ama wan. Makgapitsi lakgtsokgkinanin chu fariseos minkgonitancha kJerusalén, pero ni xlakata namakgtayakgo o nakatsikgo tuku masiya. Wata kawanikgo latamanin pi «Laktanunit Belcebú» chu pi taskujma «xmapakgsinakan demonios» (Marcos 3:22). Akxni xfamilia Jesús katsikgo tuku lama, ankgo asta niku wi xlakata nalinkgo. ¿Tuku xlakata?

Asta la uku, xnatalan Jesús ni kanajlakgo pi xla wa xKgawasa Dios (Juan 7:5). Nachuna, Jesús tiku lhuwa lichuwinamaka, ni watiya Jesús tiku lakgapaskgolh akxni stakli kNazaret, wa xlakata lakpuwankgo pi «akgwitinit» (Marcos 3:21).

¿Pero tuku masiya xtatlaw? Jesús mapaksanit  chixku tiku xkgalhi demonio chu chixku tlantiya lakawanan chu chuwinan. Xlakata nila wankgo pi uma ni xlikana, lakgtsokgkinanin chu fariseos limawakakgo tuku nitlan. Wankgo: «Uma chixku wa kalitamakxtu demonios xlitliwakga Belcebú, xmapakgsinakan demonios» (Mateo 12:24).

Jesús katsi tuku lakpuwamakgo lakgtsokgkinanin chu fariseos, wa xlakata kawani: «Putum tamapakgsin nema xʼakstu tapapitsi lakgsputa, chu putum kachikin o chiki nema xʼakstu tapapitsi lakxla. Nachuna, komo Satanás tamakxtu Satanás, xʼakstu tapapitsinit; wa xlakata, ¿la tlan tliwakga natawila xtamapakgsin?» (Mateo 12:25, 26).

¡Lu xlikana tuku kawani! Fariseos katsikgo pi makgapitsi judíos katamakxtukgo demonios (Hechos 19:13). Wa xlakata Jesús kakgalhskin: «Komo akit kmaklakaskin xlitliwakga Belcebú xlakata nakkatamakxtu demonios, ¿tiku xlitliwakga maklakaskinkgo mintamakgalhtawakgenkan xlakata nakatamakxtukgo?». Xlakan na tlan xkalimawakaka pi taskujkgo demonios. Jesús kawanipara: «Pero komo akit xʼespíritu Dios kkalitamakxtu demonios, xTamapakgsin Dios xlikana kalakgchinitana» (Mateo 12:27, 28).

Alistalh, maklakaskin akgtum li’akxilhtit xlakata namasiya pi xla tlan katamakxtu demonios xlakata tlakg tliwakga nixawa Satanás. Kawani: «Komo wi tiku tanuputun kxchik chatum tliwakga chixku chu makglhtiputun tuku kgalhi, pero ni pulana chiwili uma tliwakga chixku, ¿la tlan namakgkgalhan putum tuku wi kxchik? Putum tiku ni akit kintataya, kintalalakatakima; chu putum tiku ni kintaskujma xlakata latamanin nakilakgminkgo, wata kaj katlakgalima» (Mateo 12:29, 30). Lakgtsokgkinanin chu fariseos talatlawamakgo Jesús, wa xlakata tasiya pi tatayakgo Satanás chu tlawakgo pi latamanin natamakgatlinikgo xKgawasa Dios, tiku tlawa milagros xpalakata xlitliwakga Jehová.

Jesús kawani tiku ni akxilhputunkgo: «Dios nakatapati lakchixkuwin tipalhuwa talakgalhin nema natlawakgo chu laklixkajni tachuwin nema nawankgo. Pero tiku lixkajni lichuwinan espíritu santo nikxni katitapatika, wata putum kilhtamaku litawila kuenta xlakata uma talakgalhin» (Marcos 3:28, 29). Kalakpuwanti tuku kilhchanima uma xpalakata tiku wankgo pi Jesús litlawama milagros xlitliwakga Satanás, maski liwana tasiya pi wa litlawama x’espíritu Dios.