Jesús chu xtamakgalhtawakgen chankgo kBetsaida. Akxni anta wilakgo, linikan chatum chixku tiku ni lakawanan chu tasaskinikan kaxamalh xlakata namapaksa.

Jesús makgachipaxtu chixku kkachikin. Alistalh litlawa xchujut kxlakgastapu chixku chu kgalhskin: «¿Tuku akxilha?». Chixku kgalhtinan: «Kkaʼakxilhma latamanin, pero tasiyakgo xtachuna akgalhuwa kiwi nema tlawamakgolh» (Marcos 8:23, 24). Wa xlakata, Jesús xama xlakgastapu chixku chu xla tlan akxilha. Akxni mapaksanita, malakgacha kxchik chu wani pi ni katanulh kkachikin.

Alistalh, Jesús chu xtamakgalhtawakgen ankgo knorte, niku wi Cesarea xalak Filipo. Uma kachikin wi kʼakgtum talhman sipi, chu tankgenu wi sipi Hermón, nema tlakg talhman chu litsama miki. Max akgtiy kilhtamaku lichankgo o liwaka.

Akxni tlawamakgo ktiji, Jesús an alakatanu xlakata natlawa oración. Kaj akgnajatsa o akgkaw papaʼ tsankga xlakata namakgnikan chu kalilakgaputsama xtamakgalhtawakgen. Nina makgas, lhuwa tiku makgxtakgkgolh chu amakgapitsin ni katsikgo tuku natlawakgo chu lipuwankgo. Max akstu kakgalhskinkan tuku xlakata Jesús ni mastalh talakaskin mapakgsina xlimaxtuka o tuku xlakata ni limasiyalh tiku xla litaxtu.

Akxni xtamakgalhtawakgen ankgo niku tlawama oración, xla kakgalhskin: «¿Tiku wankgo latamanin pi litaxtu xKgawasa chixku?». Xlakan kgalhtikgo: «Makgapitsi wankgo pi Juan Mununa; amakgapitsin pi wa Elías; chu atanu pi Jeremías o chatum tiku na palakachuwina». Chuna, latamanin lakpuwankgo pi Jesús max chatum palakachuwina nema lakastakwananit. Xlakata Jesús nakatsi tuku xlakan lakpuwankgo, kakgalhskin: «Pero wixin, ¿tiku wanatit pi klitaxtu?». Pedro lakapala kgalhtinan: «Wix Cristo, xKgawasa xastakna Dios» (Mateo 16:13-16).

Jesús wani Pedro pi kapaxuwalh, xlakata Dios makatsininit uma, chu wampara: «Wix Pedro, chu kʼuma lanka chiwix nakmalakatsuki kincongregación, chu xlitliwakga linin ni katimakgatlajalh». Jesús wamputun pi namalakatsuki akgtum congregación chu komo tiku anta natapakgsikgo ni namakgxtakgkgo asta akxni nanikgo, ni putum kilhtamaku katitawilakgolh kkalinin. Alistalh wani Pedro: «Akit nakmaxkiyan llaves xla Tamapakgsin» (Mateo 16:18, 19).

Jesús ni kilhwama pi Pedro tlakg xlakaskinka apóstol, chu na ni laksakma xlakata namalakatsuki congregación. Jesús wa Chiwix nema nalimalakatsukikan congregación (1 Corintios 3:11; Efesios 2:20). Pero Pedro namakglhtinan akgtutu llave. Tlan nawanaw pi xla nalakgayawakan namalakki malakcha xlakata tanu tanu latamanin natanukgo kTamapakgsin xalak akgapun.

Pedro namaklakaskin xapulana llave kPentecostés kkata 33, akxni nakamasiyani tuku xlitlawatkan xlakata tlan nalakgtaxtukgo judíos chu tiku xalak atanu kachikinin, nema makgamakglhtinankgonit xtakanajlakan judíos chu nitlan limakgkatsikgo xtalakgalhinkan. Namaklakaskin xliʼakgtiy llave xlakata nakamaxki talakaskin natanukgo kxTamapakgsin  Dios samaritanos tiku nakanajlakgo. Chu xaʼawatiya, kkata 36, namaklakaskin xliʼakgtutu llave xlakata nakamaxki talakaskin natanukgo kTamapakgsin tiku ni judíos, chuna la Cornelio chu amakgapitsi latamanin (Hechos 2:37, 38; 8:14-17; 10:44-48).

Apóstoles lu lilipuwankgo akxni Jesús kawani tuku nialh makgas napati chu la namakgnikan kJerusalén. Pedro ni akgatekgsa pi Jesús nalakastakwanan chu nataspita kʼakgapun, wa xlakata lin alakatanu xlakata nakilhni: «Miʼakstu kalakgalhamankanti Malana, nichuna katiʼakgspulan». Pero Jesús talakgaspitni chu wani: «¡Kakintapanuni Satanás! Kilakgapaxtokgpat kkintiji, xlakata ni kgalhiya xtalakapastakni Dios, wata xtalakapastaknikan lakchixkuwin» (Mateo 16:22, 23).

Ama kilhtamaku katasani latamanin chu amakgapitsi apóstoles chu kawani pi tuwa nakitaxtuni tiku xtamakgalhtawakgen litaxtuputun. Kawani: «Komo wi tiku kistalaniputun, akstu kalakgmakganka, chu katiyalh xkiwi nema makgapatinan chu chuntiya kakistalanilh. Xlakata putum tiku nalakgmaxtuputun xlatamat namakgatsankga, pero nalakgmaxtu putum tiku namakgatsankga xlatamat kaj kimpalakata chu kaj xlakata xatlan tamakatsinin» (Marcos 8:34, 35).

Chuna, xlakata Jesús tlan nakamakgamakglhtinan, talakaskin pi xtamakgalhtawakgen ni napekuankgo chu wi tuku nalimakgxtakgkgo xlakata nastalanikgo. Jesús wan: «Komo wi tiku nakilimaxanan chu nalimaxanan kintachuwin kxlakgstipan umakgolh latamanin tiku makgxtakgkgonit Dios chu makglakgalhinanin, xKgawasa chixku na nalimaxanan akxni namin kxlitliwakga xTlat chu nakatamin xasantos xʼángeles» (Marcos 8:38). Xla wan pi akxni namin «nakaxokgoni chuna la likatsikgonit chatunu chatunu» (Mateo 16:27).